Dié plaaslike TV-reekse tel onder terloops se topkeuses wat jy in 2023 kon (en steeds kan) stroom.
1
Spinners
Stroom dié reeks op Showmax.
Rozanne Els skryf:
“Daar is deurentyd baie op die spel vir al die karakters in Spinners. Dié stakes – wat meer as minder die verskil tussen oorlewing en dood beteken – is iets wat ons telkens aan herinner word en wat as rotsvaste fondasie vir die reeks dien. Alles wat hy kan verloor (en wat hy kan wen), is in Ethan se oë as hy agter die stuurwiel sy plek inneem, in die greep van sy hande wat styf – en los – genoeg is om daai kar te laat tol, tol, tol en die wiele te maak rook.”
Lees die volledige resensie hier.
Lees ook
2
Shaka Ilembe
Stroom die reeks op Showmax. Dit is oorspronklik op Mzansi Magic uitgesaai.
Rozanne Els skryf:
“Mzansi Magic se Shaka Ilembe is ’n skouspelagtige produksie wat só beïndruk het, ’n tweede seisoen is reeds in die pyplyn. Dit wil gedoen wees as ’n mens in gedagte hou dat dié historiese drama die grootste produksie is wat Mzansi Magic al aangepak het. Die randwaarde van die begroting ontwyk my, maar die kykwaarde is so epies soos die reeks se wrede oorlogstonele wat dui op die bloederige realiteite van die verlede. Dít terwyl die besonderse kinematografie ’n blik skep wat meesleur soos dit die storie vorentoe beur. Jy kan jouself maar net verkyk.”
Lees ook
3
Taktiek
Die reeks is op DStv Stream en via Catch Up beskikbaar om te stroom.
Riëtte van der Wat skryf:
“Dis ’n goeie teken as ’n mens binne die eerste paar minute van ’n nuwe komediereeks nie kan ophou giggel nie. En as die giggel ’n lag word, sonder dat jy dit kan verhelp, nog beter. Veral as jou verwagtinge louwarm was en dit dan heeltemal binne slegs twee episodes oortref word.”
Lees die volledige resensie hier.
Lees ook
4
Trompoppie
Kyk Trompoppie op Showmax. Nuwe episodes word weekliks op Donderdae vrygestel totdat die reeks op 8 Februarie ten einde loop.
Rozanne Els skryf:
” ’n Loopbaanbeste vertolking deur Marion Holm is net een van die fasette wat van Etienne Fourie se nuwe Afrikaanse reeks op Showmax, Trompoppie, ’n besonderse en veelvlakkige kykervaring maak.
“Marion Holm lewer as Jill die beste spel van haar loopbaan (tot dusver, kom ons hoop en bid vir nog en nog!). Sy speel die karakter as beide ’n nuutgevonde skepping en as ’n kombinasie van Cruella de Vil en Miranda Priestly. Saam is dit… majestic. Holm maak van Jill ’n kragtoer van contradictions – een wat net so ysingswekkend kil as deernisvol kan wees (of minstens, so kan voorkom). Sy is beide subtiel en heeltemal over the top, en ek weet nie hoe nie, maar sy vind ’n geloofwaardige, gewigtige balans. Sy kon so maklik die een of die ander grens oorskry het – ’n grinnik te veel of te min, ’n groter of kleiner swaai in haar stap. Maar Holm speel dit al dente. Net. Fokken. Reg.
“Die premis van Trompoppie is ’n tematiese seduction vir dié van ons wat naarstigtelik na betekenis en begrip van en in die wêreld soek. Veral soos beide mensdom en menslikheid verdof. Kuns, hier dan die middlebrow-milieu van televisie, bestaan as ’n zeitgeist-speelgrond waar ons probeer sin maak van… wel, alles.”
Lees die volledige resensie hier.
Lees ook
5
Devil’s Peak
Die reeks is nog op DStv Stream via Catch Up beskikbaar.
Rozanne Els skryf:
“Jozua Malherbe se omskepping van Deon Meyer se boek, Devil’s Peak, speel af in die smerige, skurwe kant van Kaapstad, waar ’n rou-geteisterde pa ’n bloedspoor laat wat speurder Bennie Griessel moet volg.
“Malherbe se omskepping van die skrywer Deon Meyer se boek – Devil’s Peak is die Engelse vertaling van Infanta wat dit voorafgegaan het – is iets waarop ’n mens gierig wens as ’n boek na ’n ander formaat verwerk word. Malherbe se forte is immers storie – die vertel daarvan, die inkleur daarvan, die bestaan en begrip daarvan as iets lewend; iets wat allermooi én allerverskrikliks terselfdertyd is. Dis veral in sy regie van Griekwastad waar ’n mens sy kuns kan sien sing. Maar só ook dan hier in sy vertelling van Meyer se verhaal en die pynlik menslike karakters waarmee ons kan vereenselwig. Daar is deurgaans ’n ondertoon van anticipation, aangevuur deur ratse redigering, skote van ’n toegeslikte, smerige Kaapstad, en die bloedbedrupte oorblyfsels van dolle geweld.”
Lees die volledige resensie hier.
Lees ook
Eervolle vermelding aan…
Kokkedoor Vuur & Vlam, kykNET/DStv Stream
Hartklop, kykNET/DStv Stream
Stella Murders, Showmax
Hartklop, kykNET/DStv Stream
Rosemary’s Hitlist, Showmax
