Die voorlaaste episode van die kykNET-maatskoekreeks Boer soek ’n Vrou het die plaaspaaie vir die Wild Coast Sun-vakansieoord verruil.
Tussen haaie, hoogtes en hartsgesprekke raak dit duidelik wie saam vorentoe wil beweeg en wie eerder by vriendskap gaan hou. Vir een paartjie bring die wegbreek ook ’n besonderse liefdesverklaring.
Hier is ses goed wat jy moet weet:
1. Arno en Rosanne sê die groot woorde
Arno het Rosanne sy meisie gemaak, maar dié vakansie neem hul verhouding verder. Op haar verjaardag bederf hy haar met ontbyt in die bed, voordat hulle watersport aandurf. Tussen die pret en soentjies kom die liefdesverklaring. Rosanne voel dieselfde: sy wil hom by haar hê.
2. Francois en Sonel maak toekomsplanne
Sonel se liefde vir lugvaart maak hul vlug in ’n viersitplekvliegtuig ’n hoogtepunt. Sy gesels geesdriftig terwyl Francois die uitsig inneem, met drukkies tussendeur. Hulle praat ook oor Junie, hoewel haar moontlike verblyf in Katar dinge kan beïnvloed. Francois het ’n ekstra rugbykaartjie gereed indien sy beskikbaar is.
3. JD en Leonè kies eerlikheid
Hul uitstappie na ’n ontsnapkamer begin met blinddoeke en boeie. Die leidrade toets hul samewerking, maar ’n openhartige gesprek bring die belangrikste antwoord: hulle bly voorlopig vriende. JD se gevoelens is sterker, terwyl Leonè dinge stadiger wil vat. Albei stap nietemin weg met meer selfkennis en ’n beter begrip van mekaar.
4. Jack se pasmaat waag die sprong
By Oribi Gorge is Jack vasbeslote dat hy nie gaan spring nie. Sy pasmaat, Hanri, skraap haar moed bymekaar en geniet die avontuur. Hy bewonder haar dapperheid en beskryf haar as ’n sonstraaltjie. Sy sien romantiese potensiaal, maar gaan nie onbepaald wag terwyl hy sy gevoelens uitpluis nie.
5. Die haaie sorg vir uiteenlopende reaksies
JD is senuweeagtig en Arno moet een van sy grootste vrese trotseer om die hok binne te gaan. Jack ontdek weer dat ’n deinende see sy aanvanklike opgewondenheid vinnig kan demp. Willie, wat twyfel, beskou die ervaring agterna as een van sy drie beste avonture.
6. Willie erken waar hy tekortgeskiet het
Sonder ’n pasmaat aan sy sy erken Willie dat hy die dames en ander betrokkenes teleurgestel het. Hy hoop opvolgoproepe het ruimte vir vergifnis geskep. Tog neem hy aan die groep se pret deel, terwyl almal hom ’n maat toewens.
In die reünie-episode op Donderdag 22 Oktober om 20:00 op kykNET (DStv-kanaal 144) vind kykers uit watter boere se soektog na liefde suksesvol was en hoe hul verhoudings ná die kameras se vertrek ontwikkel het.
