Wat om te kyk vandeesmaand – hier is my redakteurskeuse vir Desember 2023.
Neem asseblief kennis dat datums en titels moontlik kan verander.
Die Byl S5
Weeklikse episodes vanaf Dinsdag, 16 Januarie 2024, om 20:00 op kykNET en DStv Stream (DStv-kanaal 144). Ook op Catch Up (ná uitsending).
Nuwe sleutelkarakters en senutergende raaisels (as per usual) wag op kykers in die vyfde seisoen van Die Byl.
Dié reeks is geskoei op die loopbaan van een van Suid-Afrika se bekendste – en suksesvolste – misdaadjagters, Piet Byleveld. In Die Byl word die titelkarakter deur Waldemar Schultz as ’n ewe uitnemende speurder uitgebeeld wat saam met ’n briljante span op reeksmoordenaars jag maak.
In die vierde seisoen ons het weer gesien hoe Van Bijl, oftewel Die Byl, hoëprofielsake ondersoek om reeksmoordenaars te laat boet. (Kyk hier na ons lys van die boosaardigste, gruwelikste moordenaars op die reeks.) In die nuutste seisoen wag daar nog rillende storievertelling, maar so ook is daar nuwe spanlede wat by die eenheid aansluit.
Hoewel Byl uiteindelik geheel en al in charge is, bring dié nuwe spanmaats nuwe uitdaging met hulle saam… Veral die sielkundige wat aangestel is om die span se psigiese welstand te monitor…
Juan (Marvin-Lee Beukes), Nicki (Milan Murray) en Lena (Lika Berning) keer terug, met die sluipskutter Jo Verwey (Amalia Uys) wat as wapendeskundige vir Byl en sy span bystaan. Kaptein William Miller (Tyrone Keogh) is die nuwe profiler wat in Lena se plek aangestel word – dark and broody deluxe! Hy dra egter swaar aan sy verlede. Dr. Anton Fourie (Marcel van Heerden) is die nuwe patoloog wat by die span aansluit.
Ander spelers wat gereeld hul verskyning maak, is Ira Blanckenberg as die sielkundige dr. Mia Labuschagne, Jacques Bessenger as die joernalis Alex Kruger, en Anrich Herbst as kaptein Buks Botha.
Magda Louw S2
Weeklikse episodes van Magda Louw vanaf Maandag, 1 Januarie 2024, om 20:00 op kykNET (DStv-kanaal 144) en DStv Stream. Ook op Catch Up beskikbaar (ná uitsending).
Ons moes ’n hele jaar wag vir die nuwe seisoen van die plaaslike komedie-juweel, Magda Louw.
Die reeks is aanvanklik deur Desiré Gardner, wat ook die naamrol vertolk as ’n eenvrou-verhoogproduksie geskep. Nadat dit eers in 2021 deur kykNET tot ’n storiefilm ontwikkel is, is dit toe in ’n komediereeks omskep.
Die storie draai meerendeels om Magda en haar man Erhard, wat aan ’n werklikheidsreeks deelneem. So gebeur dit dan dat daar ’n kameraspan is wat hulle oral volg om hul lewens vas te lê. Die akteur en Kwêla-aanbieder Hannes van Wyk is as Erhard te sien. Die rol van Magda se dogter, Gertrude, is in die eerste seisoen deur Cintaine Shutte vertolk, met Binnelanders se Cindy Swanepoel wat in die nuwe seisoen dié karakter lewe gee. Die rol van Baltus, die paartjie se seun, word deur Taktiek se Bennie Fourie gespeel.
Gershwin Mias is die kameraman Shaun, wat die Louws oral heen rondvolg.
Desiré het al voorheen gesê dat is Magda Louw ’n “tong-in-die-kies” en “knop-in-die-keel”-kykie op die onvermydelike dinge in die lewe is. Dinge soos ouer word en onkeerbare draai van die horlosie.
“Dit gee ook ’n blik op die uitdagings wat ma-wees bied, huweliksprobleme, hoe om jou lewenspad saam met een mens te stap, menopouse, die uitdagings van die middeljare, jaloesie en botoks,” lui ’n mediaverklaring.
Ook in die rolverdeling is bekendes soos Shimmy Isaacs, André Weideman, Margit Meyer-Rödenbeck, Wynand Kotze, Elzet Nel en Mandri Sutherland.
Reyka S2
Weeklikse episodes vanaf Donderdag, 11 Januarie 2024, om 20:00 op M-Net en DStv Stream (DStv-kanaal 101). Ook op Catch Up beskikbaar (ná uitsending).
Nuwe karakters en volgehoue aksie en drama wag op kykers in die senutergende tweede seisoen van die plaaslike misdaaddrama, Reyka.
Reyka, wat die lewe van die briljante misdaad-profiler, Reyka Gama (vertolk deur Kim Engelbrecht) volg, se eerste seisoen het al heelwat pryse ingepalm, waaronder vier Safta-toekennings, en spog ook met twee benoemings by die internasionale Emmy-toekennings. Reyka word ook wyd internasionaal versprei en staan in sommige lande eerder as The Cane Field Killings bekend.
In die tweede seisoen is Reyka op die spoor van ’n moordenaar wat paartjies by ’n uitkykpunt langs die kus, nogal Lover’s Lane genoem, teiken. Hoewel dié moordenaar die manlike slagoffers baie kil, koud en klinies uit die weg ruim, bespeur Reyka ’n wroeging oor sy vroue-slagoffers. Intussen spook Reyka se verlede steeds by haar. Angus Speelman (Iain Glen, Game of Thrones), die Skotse boer wat haar as jong kind ontvoer het, is nou in ’n instelling vir seksoortreders. Reyka sukkel egter steeds om tot verhaal te kom en haar trauma te verwerk.
Reyka kry ook ’n nuwe partner, Ayanda Jali, vertolk deur die bekroonde aktrise en musikant Samkelo Ndlovu (iNkaba, Freedom). Ayanda is, baie soos Reyka, ’n taai vrou met sterk morele waardes en integriteit en die twee wod gou vriende en vertrouelinge.
Ook in die rolverdeling is Pallance Dladla (DAM), Frank Rautenbach (Lioness), Lemogang Tsipa (Shaka iLembe), Joey Rasdien (Bunny Chow), Zane Meas (Ludik) en Deon Lotz (Taktiek).
Masters of the Air
Dié reeks première op Vrydag, 26 Januarie 2024, met twee episodes op Apple TV+. Daarna word nuwe episodes weekliks tot en met Vrydag, 15 Maart 2024, vrygestel.
Dié epiese oorlogdramareeks is gegrond op die gelyknamige boek deur Donald L. Miller met Tom Hanks en Steven Spielberg wat deel van die vervaardigingspan uitmaak. Oor die loop van nege episodes word daar vertel oor die “Bloody Hundredth”, oftewel die Amerikaanse lugmag se “100th Bomb Group” wat lugaanvalle oor Nazi-Duitsland geloods het. Maar dit is die sielkundige en emosionele prys wat die jong mans in die stryd teen Hitler betaal wat sentraal tot die vertelling staan. Sommige is afgeskiet en gevang; ander is ernstig gewond, ander is dood. En ander was gelukkig genoeg om dit tot terug by die huis te maak.
Onder die rolverdeling tel Austin Butler, Callum Turner en Barry Keoghan. Die reeks dien ook as ’n tipe van pasmaat vir die reekse Band of Brothers (2001) en The Pacific (2010).
