Lea Vivier vertolk die hoofrol in regisseur Alex Yazbek se sielkundige riller, DAM.
In die eerste seisoen het ons Vivier as Yola Fischer ontmoet. Yola is ’n jong vrou wat vanaf Chili na haar klein tuisdorp in die Oos-Kaap teruggekeer het om haar vervreemde pa te begrawe. Dis dan wanneer haar duistere verlede haar inhaal. Dis asof die plaashuis wat sy, tot haar suster se ontsteltenis, van haar pa geërf het, met haar probeer praat. Amper asof dit geheime met haar wil deel…
Die tweede seisoen, wat vanaf 16 Februarie 2023 op Showmax in weeklikse sarsies beskikbaar gestel word, tel die drade van die storie sowat drie maande ná die Lentefees op. Dit lyk of die kultus se rituele offer gewerk het: reën het immers geval en die land vernuwe. Maar Yola onthou niks sedert sy van haar pa se begrafnis teruggekeer het nie…
Buiten dat DAM die meeste benoemings vir ’n dramareeks by die 2022 SAFTA’s ingeryg het, is dit ook goed deur kykers én resensente ontvang, met laasgenoemde wat telkens verwys het na die manier waarop die reeks grense in Suid-Afrikaanse TV verskuif het.
DAM is in Adelaide en Bedford in die Oos-Kaap verfilm, en die rolverdeling sluit ook sterre soos Natasha Loring, Antoinette Louw, Tarryn Wyngaard, Faniswa Yisa, Laudo Liebenberg en Marvin-Lee Beukes in.
