Hoe goed ken jy jou bure? Dís wat jy gaan wonder (en oor gaan worry) as jy eers sien hoe die drama in kykNET se nuwe dramareeks, Straat, ontvou.
In Aarbeistraat, ’n cul-de-sac in ’n middelklasbuurt wat op die oog af heel rustig lyk, het elkeen van die inwoners immers hul eie storie…
Morné du Toit, bekend vir flieks soos Hoofmeisie, Nul is nie niks nie en Vuil wasgoed, is die reeks se regisseur. Daarmee saam sluit Straat se rolverdeling akteurs in wat bekend is vir uithaler-spel. Dit sluit in Hartklop se Leandie du Randt, Desert Rose se Amalia Uys en Marisa Drummond wat onlangs amok gemaak het in die kykNET-sepie Suidooster.
Nico Panagio, bekend vir sy rol in kykNET se Vallei van Sluiers en flieks soos Semi-Soet en Vrou soek boer, is ook as een van die hoofspelers in dié aksiebelaaide drama te sien.
Wie’s wie?
Die skelm Anton Videns (Frank Opperman), grootbaas van ’n finansieringsmaatskappy, en sy vennote is diep in die moeilikheid. ’n Fluitjieblaser gaan in die hof teen hulle getuig, en hulle sal enigiets doen om dit te verhoed.
Die fluitjieblaser, wat ’n IT-boffin is, woon onder die skuilnaam Robert Muller (Nico Panagio) in Aarbeistraat – sy wegkruipplek in witness protection.
Zelda Postma (Amalia Uys) woon ook in dié doodloopstraat. Sy is ’n vlymskerp prokureur wat die taak het om Robert veilig te hou met die hulp van Potifar Vorster (Morné Visser), of Pote, soos almal hom noem. Pote is ’n afgetrede polisieman, en hy en sy vrou, die verpleegster Lorrie (Marisa Drummond), is benewens Zelda die enigste mense in Aarbeistraat wat weet wie Robert werklik is.
Trix Louw (Hélène Truter) is ’n hartseer weduwee en eiendomsagent. Haar seun woon in Kanada, en dis net haar honde wat haar enige vreugde verskaf.
Hannes Brümmer is Maxwell Smit, die plaaslike apteker wat meer as net pille smous. Hy en sy floskoppie-vrou, Retha (Cintaine Schutte), woon naby Jakkie van Tonder (Leandie du Randt) en Hendrikkie Fourie (Arno Meyer). Jakkie, ’n weeskind, het haar eie onderneming wat mense met rekenaarstelsels by die huis help.
Nicole Holm is Vinkie Beerwinkel, ’n vrou met ’n oordonderende persoonlikheid wat tot die uiterstes sal gaan om ’n sekuriteitsmuur om die hele Aarbeistraat te laat bou. Deon Coetzee is haar man, Basie, op wie se kop sy vierkantig sit.
Wiseman Sithole en Edith Plaatjies is die Makebas, Xolani en Nyakallo, met Wilhelm van der Walt as Billy Vogel, ’n glibberige fotograaf wat enigiets sal doen vir geld.
Kate Normington, Josias Moleele en Kiroshan Naidoo speel Anton Videns se vennote. Kevin Smith, Melt Sieberhagen, Mandri Sutherland en Celeste Loots is in van die ander gasrolle te sien.
Straat saai op Dinsdae vanaf 17 Oktober 2023 om 20:00 op kykNET (DStv-kanaal 144) uit. Ook op Catch Up en DStv Stream.
