Let wel: Dié artikel word gereeld bygewerk soos nuwe Afrikaanse reekse en sepies aanlyn beskikbaar word.
Reekse
1
Speurder Piet van der Bijl (Waldimar Schultz) en sy span maak jag op reeksmoordenaars in die briljante, senutergende misdaaddrama Die Byl.
Die reeks is geskoei op die ware loopbaan van sekerlik die bekendste speurder in Suid-Afrika, Piet Byleveld.
2
Drie vervreemde broers vind die kronkelpad terug na hul ouerplaas in die dorre Noord-Kaap, Nêrens, waar hulle die geheime, hartseer en waarheid oor hul ma se dood moet aanspreek om uiteindelik heling te vind.
Die storie is gegrond op die gelyknamige verhoogstuk deur Nico Scheepers wat in 2017 sy debuut gemaak het. Dit is sedertdien wyd geloof en Scheepers se omskepping van sy hartroerende verhaal na ’n TV-reeks is iets meesterlik. (Lees Riëtte van der Wat se onderhoud met Scheepers hier.)
Kyk op Showmax.
3
Donkerbos draai om ’n senutergende moordraaisel wat begin met die ontdekking van die liggame van ses kinders in ’n verlate woud in die klein dorpie van Donkerbos in Limpopo. Erica Wessels (van Dwaalster en I Am All Girls) vertolk die hoofrol. Sy speel Fanie van Wyk, ’n speurder wat drie jaar tevore onder ’n donker wolk uit Pretoria ná ’n rampspoedige ondersoek gevlug het. Nou moet sy dié haglike saak probeer ontsyfer.
Kyk dit op Showmax.
4
Alles Malan, wat deur Red Letter Day Pictures vervaardig is, begin as ’n tipiese homecoming-verhaal as Frik, sy vrou, Tessa, hul tienerdogter en aangenome seun uit Engeland na tuisbodem in die Paarl terugkeer. Dis nie ’n…sal ons sê…maklike aanpassing vir enigiemand nie.
Lees ook ons onderhoude met van die reeks se spelers, onder andere Nadia Valvekens en Ivan Zimmerman.
Kyk op Showmax.
5
Drie speurders word in Projek Dina vir ’n nuwe taakmag gekies om sake oor vermiste mense op te los. Die reeks is op ware gebeure gegrond.
Die eerste twee seisoene is op Showmax.
6
Geliefde aktrise Brümilda van Rensburg speel die hoofrol in hierdie kykNET-komedie. Dit gaan oor ouer word en draai om die mense van Ian en Ander, ’n winkeltjie in George. Dit behoort aan ene Ian Jantjies, ’n middeljarige man wat die gedruis van die stad agterweë laat vir die sogenaamde vrede van ’n klein dorpie. Maar toe is dit als behalwe! Sy drie…effens ouer werknemers, maak hom by die dag gryser.
Kyk dit op DStv en Showmax.
7
Twee tieners ontmoet en alles verander in Kompleks, ’n drama in die styl van reekse uit die 90’s soos Dawson’s Creek.
Kyk op Showmax.
8
Die Fransen Hotel was eens die klein fiktiewe dorpie van Fransenburg in Mpumalanga se trots. Daar het intussen baie verkeerd geloop en die hotel is nou sub-sub-standaard. Maar die middeljarige hotelbestuurder en sy vreemde versameling van quirky personeellede probeer steeds om die hotel se deure oop te hou.
Dié skreeusnaakse sitkom is deur Bennie Fourie geskep en die rolverdeling sluit onder andere vir die grapjas Schalk Bezuidenhout, Beer Adriaanse, Mila Guy en De Klerk Oelofse in.
Al vyf seisoene is op Showmax beskikbaar om te stroom.
9
In Showmax se eerste oorspronklike romkom speel Getroud met Rugby se Ilse-Lee van Niekerk ’n borrelende, altyd-glimlaggende trouebeplanner wat tussendeur ander se liefdesvieringe self ook ’n pasmaat soek.
Kyk die eerste twee seisoene op Showmax.
10
Al drie seisoene van dié regsdrama, geskep deur Louis Pretorius en Albert Snyman, is nou op Showmax.
11
Lena Schoeman (Liezl de Kock) stel misdaadprofiele oor reeksmoordenaars vir die polisie saam, maar dan blyk dit die grootste gevaar is dalk tuis…
Kyk Siende Blind se eerste seisoen op Showmax.
12
4 Mure handel oor die Hotel 4M se nuuskierige skoonmaker, kelner en ontvangspersoon, Marcelina (Lida Botha). In elke episode word daar by die hotel se nuwe gaste gespook – Kamer 7 is waar die euwels afspeel, met die stories wat tussen die hede en verlede spring.
Kyk dit op Showmax.
13
Armand Aucamp vertolk die rol van ’n stadsjapie-skrywer, Tom Niemand, wat ná die dood van sy ouma (wat hy gedink het, is reeds dood…) ’n draai in haar tuisdorpie op die platteland, Merweville, reis. Hier ontmoet hy ’n eklektiese groep mense wat sy lewe onherroepbaar verander. Al drie seisoene is op Showmax beskikbaar.
14
In ’n poging om van sy probleme (insluitend ’n egskeiding) te vergeet, maak Bertie (Wilhelm van der Walt) ’n cocktail bar oop. Met sy laaste sente ook nog. Lewenskrisis of briljante idee? In ieder geval word die plek vinnig ’n bymekaarkomplek vir vriende, familie en vreemdelinge.
15
Twee mense word dood in ’n babadogtertjie se ouerhuis aangetref. Beide die oppasser en die baba het spoorloos verdwyn. Wat het daardie nag gebeur? Wie het die ouers vermoor? Waar is die dogtertjie? Dis met dié raaisels wat Spoorloos 3: Steynhof begin.
Die agt episodes van Spoorloos 3: Steynhof volg dieselfde draad as die vorige Spoorloos-seisoene: Dit speel af in ’n plattelandse gemeenskap en die verlede se geheime ontketen ’n drama in die hede. In hierdie seisoen is dit bietjie anders omdat dit nie ’n dorp in rep en roer is nie, maar die mense van Steynhof, ’n spogplaas.
Die rolverdeling van Spoorloos 3 sluit onder andere is Stiaan Smith (Hotel), Jane de Wet (Griekwastad), Brent Vermeulen (Die Stropers), Vinette Ebrahim (Skemerdans), en Kim Cloete (Fynskrif) in.
Stroom al drie seisoene nou op Showmax.
16
’n Briljante psigiater ontwikkel ’n dwelm wat pasiënte se onderbewussyn kan binnedring.
Kyk op Showmax.
17
’n Neo-noir moordraaisel speel af op die Kaapse Vlakte in die Oasis Jazz Club, die middelpunt van ’n magstryd tussen twee broers, ’n weduwee en ’n misdaadsindikaat.
Skemerdans ontvou oor 13 episodes met Kaapse jazz en die stad se ewe eiesoortige Engels-Afrikaans-geselstaal. Kyk dit op Showmax.
18
Sara se Geheim is ’n drama wat in Kaapstad afspeel en vertel oor die lewens van twee families wat in en om Athlone en Durbanville woon. En dan is daar natuurlik die saak van Sara se geheim wat sal al etlike jare wegsteek…
Kyk al drie seisoene op Showmax.
19
Vyf vroue in moeilike situasies moet lewensveranderende besluite neem in die reeks Afgrond wat tans op Showmax te sien is. Magsmisbruik in intieme verhoudings en in die werkplek; manlike chauvinisme; narsisme; manipulasie; affairs en die duur prys wat mense betaal wanneer hulle uit vrees besluit om stil te bly, is ʼn paar van die komplekse en ontstellende temas wat in dié drama ondersoek word.
20
Die paaie van drie susters, Julia (Milan Murray), Anna (Rolanda Marais) en Kate (Trix Vivier) het jare terug reeds geskei, maar ʼn familie-tragedie bring hulle terug na die plek waar hulle jeug en kinderdae afgespeel het: die Waterfront in Kaapstad. Dis hiér waar hul pa, Ben Myburgh (Dawid Minnaar), ʼn bootbou-onderneming bedryf. Ten spyte van die pragtige ligging, wag donker geheime en hartseer oral hier vir die susters.
Marida Swanepoel was die skepper en Jaco Bouwer het die regie gedoen. Bouwer het in 2018 ʼn ATKV Mediaveertjie vir sy werk op Waterfront gewen. Die bekroonde Leon Kruger, wat verlede jaar oorlede is, het die draaiboek geskryf.
Kyk dit op Showmax.
21
Tydelik Terminaal is ’n hartverwarmende verhaal vol hoop en gegrond op die reeks se skepper, Elanie Rupping, se eie stryd teen kanker.
Kyk dit op Showmax.
22
Die Afrikaanse sci-fi-riller Die Spreeus is ’n senutergende affere – met elke episode raak die angs al groter soos twee speurders na bonatuurlike gebeure ondersoek instel. Elke episode sien hoe Bas Koorts en Beatrick Mack van die Starling-ondersoekspan op anderwereldse misdadigers jag maak.
Kyk dit op Showmax.
23
As ongewone, onverwagse stories met ʼn magies-realistiese kinkel jou ding is, hoef jy nie twee keer te dink daaroor of jy Dwaalster op Showmax wil kyk nie. Die reeks is uit die pen van die bekroonde dramaturg Nicola Hanekom. Die karakters het ʼn fassinasie met die sterre en sterretekens; onverklaarbare dinge gebeur en almal is so effens met die maan gepla. Buiten vir Annabel Loots (Tinarie van Wyk-Loots), ʼn ondersoekende joernalis wat ʼn groot storie in die stad oopgevlek het en huis toe vlug en haar eerste liefde Stian (Jacques Bessinger), wat saam die geheimsinnige verdwyning van kinders in die dorpsdam probeer oplos; is daar wonderlike karakters in die reeks, waaronder Gina Devine (Tarryn Wyngaard), ʼn dowe kelnerin op rolskaatse, wat by die dorp se enigste kuier- en oornagplek, Die Piering, werk.
Sepies
24
Suidooster
Suidooster draai om die mense van ’n klein winkel- en sakesentrum in Ruiterbosch, ’n fiktiewe Kaapse voorstad waar verskillende gesinne in mekaar se lief en leed deel.
Kyk op DStv, DStv Online of Showmax.
25
Arendsvlei
Arendsvlei is ’n telenovela wat draai om die leerders, hul ouers, en die onderwysers van die Hoërskool Arendsvlei op die Kaapse Vlakte.
Kyk op DStv, DStv Online of Showmax.
26
Diepe Waters
Die einde van Getroud met Rugby het plek gemaak vir ’n nuwe storiewêreld op ons kassies – die van ’n mededingende swemklub, en die swemmers en hul families wat almal hoop op goud.
Diepe Waters saai Maandae tot Donderdae om 18:00 op kykNET uit. Ook op Catch Up en DStv Online beskikbaar om te stroom.
27
Binnelanders
Dis al amper twee dekades sedert sepievrate aan die mediese personeel van die Binneland-kliniek bekendgestel is. Kykers verorber steeds met ywerigheid die sepie se nimmereindige hoogdrama. Dis eintlik werklik besonders dat daar ooit tyd is om enige werk gedoen te kry met al die drama en skandale wat sonder ophou afspeel. Maar dit is mos hoe ’n goeie sepie moet wees, natuurlik…
Kyk op DStv, DStv Online of Showmax.
28
Getroud met Rugby
Ná 14 jaar het die gewilde kykNET-sepie, Getroud met Rugby, in September 2022 tot ’n einde gekom.
Rugby is big business in die regte wêreld én in showbiz – maar in Getroud met Rugby gaan dit oor veel meer as 80 minute se lynstane en losgemale op die veld. Dié gewilde sepie was aanvanklik ’n dramareeks wat deur Deon Opperman en Hanli Rolfes vervaardig is. Ná vyf seisoene is die reeks, wat draai om die hardnekkige Stryders-rugbyspan, in ’n sepie omskep .
Kyk al die seisoene op Showmax. Kyk ook die oorspronklike Getroud met Rugby-dramareeks wat die sepie voorafgegaan het op Showmax.
29
Egoli: Plek van Goud
In 1992 het Suid-Afrika se eerste tweetalige (Engels/Afrikaans) sepie sy debuut op M-Net gemaak. Skepper Franz Marx se Bold and the Beautiful-esque karakters het later amperse huisgaste geword soos daar oor 18 jaar stories van kullery, etlike affairs, troues en egskeidings en nog troues, kultusse en ’n boef by name van Spider (Wilson Dunster), vertel is.
Ook in die rolverdeling was onder andere David Vlok as slinkse Tim, Tiffany Kelly se moenie-met-my-mors-nie-Sonet en Shaleen Surtie-Richards as Marlboro Mansions se woelige opsigter.
Kyk Egoli se 18 seisoene op Showmax.
30
Villa Rosa
Villa Rosa is in 2015 ná 11 jaar as een van kykNET se suksesvolste sepies van die kassie afgehaal. Die sepie het gedraai om al die drama wat in die fiktiewe Villa Rosa-gastehuis in Bloemfontein afgespeel het. Van Suid-Afrika se grootste sepiesterre was deel van die rolverdeling, onder andere Lieb Bester, Harald Richter en Jana Nortier. Kyk dit op Showmax.
