Menu terloops
In Wat om te kyk [21 Jun 2023]

Wat om te kyk op die 2023 Silwerskermfees


Die 11de kykNET Silwerskermfees vind tussen 23 en 26 Augustus 2023 plaas, en sluit vir die eerste keer ook kort dokkies en TV-programme in.

Wat om te kyk op die 2023 Silwerskermfees

Van Donnalee Roberts in die sielkundige riller Blindelings en die verwerking van Annie Klopper se boek Die tragiese saak van Pamina Vermaak, tot die Gotiese romanse Helmhart en die kort dokkie oor die gesiggestremde paralimpiese atleet Louzanne Coetzee in ’n Gids vir Louzanne – vanjaar se Silwerskermfees-aanbod blyk uiteenlopende kykstof te bied.

Die films wat meeding om die Silwerskermtoekennings sluit die vyf speelfilms, veertien kortfilms en ses dokumentêre wat tydens die fees première.   

Ná afloop van die fees sal al die Silwerskermfeesfilms op kykNET uitgesaai word, en sal ook later op Showmax beskikbaar wees om te stroom. Dié veertien kortfilms en ses kort dokumentêre sal ook by die Toyota US Woordfees se Filmfees in Oktober vertoon word.

Die fees se suksesvolle kortfilmmentorskapprojek kring vanjaar uit na dokumentêre. Vir die eerste keer sluit die feesprogram ook die loodsepisodes van nuwe TV-reekse in. Top-televisie sal ook vanjaar vir die eerste keer by die Silwerskermfeestoekennings vereer word. Dié geleentheid vind op die laaste aan van fees op 26 Augustus plaas en word die volgende aand, Sondag 27 Augustus, op kykNET (DStv-kanaal 144) uitgesaai. Die benoemdes in die verskeie televisiekategorieë sal teen einde-Junie aangekondig word.

Speelfilms op die fees

Hans steek die Rubicon oor

Die knorrige ou Hans wat in ’n ouetehuis gestop word en sy mede-inwoners opsweep tot ’n rebellie teen dié “tronk” se drakoniese reëls word deur die geliefde Pierre van Pletzen vertolk. Onder die akteurs wat die rolle van sy kostelike troepe speel, is die legendes Tobie Cronjé, Sandra Prinsloo en June van Merch. Die veelbekroonde aktrise Nicola Hanekom is die bitterbekmatrone wat almal se pret bederf.

Dié heerlike komedie is nog ’n spanpoging van die gedugte TV- en film-egpaar Corné en René van Rooyen, wat in 2017 die Silwerskermfees se toekenning vir beste speelfilm met Vaselinetjie verower het. Hulle was ook die kreatiewe geeste agter die gewilde TV-reeks Alles Malan.  

Die tragiese saak van Pamina Vermaak

Die bekende televisiepersoonlikheid Kabous Meiring maak haar debuut as speelfilmregisseur met Die tragiese saak van Pamina Vermaak, die verwerking van Annie Klopper se gelyknamige boek. Carla Smith, wat verlede jaar as die fees se beste aktrise in ’n kortfilm vir haar spel in Skyn aangewys is, vertolk die rol van Pamina, die joernalis wat na ’n skilderagtige Weskusdorpie vlug nadat sy ’n herrie op kantoor veroorsaak het. Dis waar sy haarself vasloop in die rockster Wolf de Jager, wat ook ná ’n skandaal wegkruip. Christiaan Schoombie (Troukoors en Desert Rose) is die aantreklike Wolf. Anna-Mart van der Merwe, Lee-Ann van Rooi, Albert Pretorius, Armand Aucamp en Duane Willams is almal deel van die sterbelaaide rolverdeling.

Frankie en Felipé

Vir dié romantiese komedie het Bradley Olivier en Solomon Cupido die toutjies vóór en agter die kamera getrek. Hulle het die fliek vervaardig, die draaiboek saam met Brett Michael Innes (Sink en Fiela se kind) geskryf én die hoofrolle gespeel. Bradley is Frankie, en Solomon is Felipé, twee broers wie se lewens heeltemal verskillende paadjies geloop het nadat hulle as kinders vanmekaar geskei is. Wanneer hulle net voor Frankie se troue herenig, lei dit tot ’n warboel van misverstande. Marvin-Lee Beukes is die regisseur en onder die ander spelers tel Ilse Klink, Zane Meas, Kim Syster en Bouwer Bosch.

Blindelings

Met Blindelings takel die glanspaar Ivan Botha en Donnalee Roberts, wie se romantiese komedie Vir altyd loketrekords laat spat het, ’n nuwe genre – ’n sielkundige riller. Ivan behartig Blindelings se regie en Donnalee speel die uitdagende hoofrol. Haar karakter is ’n briljante blinde pianis wat ly aan sinestesie. Jacques Bessenger vertolk die rol van haar man en Ludwig Binge en Wilhelm van der Walt is die ander akteurs wat sorg dat dié speelfilm kykers enduit naels gaan laat kou.

Silwerskermfees 2023
Donnalee Roberts vertolk die hoofrol in Blindelings wat in Augustus op die 2023 Silwerskermfees première.

Old Righteous Blues

Die drama Old Righteous Blues laat val die kollig op ’n Suid-Afrikaanse kultuurskat: die Wes-Kaap se Kersfeeskore. Hierdie boeiende Romeo en Juliet-verhaal binne ’n verskeurde Bolandse gemeenskap is in Robertson verfilm met ’n groot en indrukwekkende rolverdeling en ekstras wat in die omgewing woon. Dit vertel die verhaal van Hantjie, vertolk deur Ayden Croy, wat bitter graag sy Kerskoor se nuwe trommelmajoor wil word. Ongelukkig dra dit nie die goedkeuring van die koor se stoere leiers weg nie. Boonop is die liefde van sy lewe, gespeel deur ’n jong aktrise om dop te hou, Megan Saayman, die dogter van hul gehate oppossisiekoor se leier. Die vete tussen die kore kom ’n lang hartseer pad en die twee minnaars beland in die spervuur. Onder die talle veteraanakteurs wat in Old Righteous Blues te siene is, tel  Kevin Smith, Simon Bruinders en Ivan Abrahams.

Kort dokumentêre

Die Silwerskermfees se eerste ses dokumentêre kortfilms belig uiteenlopende onderwerpe.

Teater na die mense vertel die merkwaardige verhaal van die Cape Flats Players-geselskap wat teater ingespan het om die apartheidstelsel uit te daag en gehore bemoedig het om teen onderdrukking op te staan.

In Langafstand volg die kameras die reis van ’n rolmodel uit Cloetesville, Stellenbosch – die landloopatleet Deon-Lee Hendricks wat met die hulp van sy afrigter en die atletieklegendes Elana van Zyl en Zola Budd voorberei op die landlooproewe wat tussen hom en sy groot droom staan: om die Suid-Afrikaanse span te haal wat in Australië gaan meeding.

’n Gids vir Louzanne, nog ’n dokumentêr oor ’n inspirerende atletiekster, verken die ingewikkelde simbiotiese verhouding tussen die gesiggestremde Bloemfonteinse paralimpiese atleet Louzanne Coetzee en haar wedloopgidse.

In die aangrypende Call of the Wild sien kykers hoe ’n spesiale klanksafari ’n jong blinde meisie toegang tot die wonders van die natuur gee, terwyl Besmet ontbloot hoe die ikoniese Afrika-leeu hartverskeurend deur wrede vergiftiging bedreig word. Dan is daar ook Born Behind Bars, ’n aangrypende dokumentêr oor ’n ma wat swanger is wanneer sy tot tien jaar tronkstraf gevonnis word.

Kortfilms

Nadat verlede jaar se oes kortfilms ’n lang lys toekennings by internasionale feeste ingepalm het, is daar vanjaar veertien kortfilms deur belowende nuwe regisseurs en skrywers in hierdie feeskategorie. ’n Paar bekende akteurs wys dié keer hul slag met die pen en agter die kamera, en nuwe filmgenres maak hul buiging.

Die fees se eerste spookstorie en Gotiese romanse, Helmhart, is die handewerk van Zenobia Kloppers wat die rol van Fiela Koemoetie in die veelbekroonde Silwerskermspeelfilm Fiela se kind vertolk het.

Edwin van der Walt is die regisseur van die drama Hier|daar en Lee Roodt bring ’n kung-fu-aksiefilm na die fees met Die Swart Draak ontwaak

Van die kortfilmmakers eksperimenteer heerlik met animasie-effekte en marionettespel om hul stories te vertel, soos in Straatrotte en Thrift tot die dood.

Die lief, leed – en soms skreeusnaakse struikelblokke – van grootwordjare word in ’n hele paar kortfilms uitgebeeld. n Doop draai om die trauma wat skoolontgroening kan meebring, terwyl Dans dat die biesies bewe die lagspiere prikkel.

Moderne kwessies word uiteenlopend benader in die twee komedies Koors en Karen, en die drama Volle bors. Koors handel oor dáái tyd van die maand; Karen oor die chaos wat ’n internet-meme kan veroorsaak, en Volle Bors oor ’n jong vrou met ’n borskankergeen wat ’n volle mastektomie moet oorweeg.

Nog kortfilms om na uit te sien: Een Saam, wat die hartseer waartoe genderdisforie en ’n gender-oorgang kan lei, aanspreek; die kinkel-in-die-kabel-riller Werpsel; die drama As, oor ’n ma wat sukkel om die dood van haar kind te verwerk, en die grinterige Die Blokke, wat die Kaapse Vlakte se bendegeweld op ’n vars manier aanspreek.


Die volledige program vir die 11de Silwerskermfees is op die fees se webwerf beskikbaar. Dit sluit speeltye in.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

As jy hou van misdaadreekse
15

15+ van die beste spanningsbelaaide polisiereekse om nou te kyk

Wat om te kyk: Daar is heelwat ander meesleurende polisie- en misdaadreekse om te stroom – hier is ons keur van die huidige bestes.

Meer

Redakteurskeuse vir Mei 2024: Vonke spat in ‘Bridgerton’ S3, ‘Juffrou X’ boei, en nog

Wat om te kyk: Die nuwe seisoen van ‘Bridgerton’, kykNET se moet-kyk dramareeks ‘Juffrou X’ en nog twee boeke wat in TV-reekse omskep is, ‘Dark Matter’ en ‘Maxton Hall’, tel onder my keur van TV-vermaak vir vandeesmaand se redakteurskeuse.

Meer

‘Wyfie’: Jou kykgids vir Mei 2024

Amanda se troebel verlede kom onder die loep, terwyl Kyla dalk ’n bietjie te hard kuier. Hier is wat jy vandeesmaand op die Afrikaanse universiteitsdrama, 'Wyfie', kan verwag.

Meer

Jou ‘Arendsvlei’-gids vir Mei 2024

Die Vlei se mense kry hartseer nuus, verhoudings neem nuwe draaie, en Desmond sal moet pasop vir Audrey – 'Arendsvlei'-kykers kan na dít en nog meer in Mei uitsien. Hier is ons handige kykgids.

Meer
Sien alle opsies