ʼn Desperate verlatenheid dwarrel soos ʼn tolbos deur die eerste drie episodes van die familiedrama, Desert Rose, nou op Showmax beskikbaar om te stroom.
Desert Rose, wat geskep, geskryf en vervaardig is deur Rohan Dickson, wentel om die Greyling-kinders wat met ʼn ysere wil veg om oorlewing op ʼn plek waar selfs die landskap vyandig voel.
Dis die Wilde Weste in die barre Noord-Kaapse landskap, kompleet met slange in glashokke en vroue wat haelgewere soos handsakke ronddra.
Volgens Dickson, wat die reeks deels op persoonlike ervaring en oorlewering gegrond het, is Desert Rose ʼn ode aan verlies, eksentrisiteit en buitestanders.
En dít is elk van die Greyling-kinders, wat alleen op die familieplaas agtergebly het ná hul musikant-pa Freddy “Fingers”(Neil Sandilands) in die niet verdwyn. Daar is verantwoordelike ousus Rosie (Tinarie van Wyk-Loots), wilde middelsussie, Jana (Amalia Uys), jongste sussie Ishara (Christia Visser) met drome van sing, en die verwonde broer Eben (Kai Luke Brümmer).
Stukkend, met ʼn strop om die nek
Elkeen van die Greylings is stukkend en elkeen dra sy stukkendheid op sy eie manier. Maar waaraan hulle die heel swaarste dra is die skuldlas van hul pa teenoor die gruwelike Eugene van As (Ben Voss), wat soos ʼn strop om hulle nekke is.
Voss, veral bekend vir sy komiese werk, versinnebeeld alles wat jy van ʼn bad guy sou verwag. Hy is grillerig en skelm en brutaal en Voss vertolk hom met smalende oorgawe.
Die akteurs wat die lede van die Greyling clan vertolk, is fantasties gecast. Van Wyk-Loots verleen ’n gewigtigheid aan elk van haar tonele as Rosie, wat op die rand van ʼn afgrond staan.
Amalia Uys lewer van haar beste werk nog as die sensuele Jana, wat haar seksualiteit as wapen inspan. Haar karakter het ʼn broosheid wat sy probeer wegsteek agter haar tawwe koekie-houding. Uys speel haar karakter, wat alles vir haar gesin sal doen, met teerheid en humor.
Brümmer is die ‘beautiful boy’ in die karavaan. Die intensiteit van Eben se hopeloosheid; van sy eensaamheid en die groot juk van sy pa se skuld vierkantig op sy skouers, kry uiting in elke fyn trek van sy mond en hangskouer-stap oor die vlakte.
Dan is daar ook die veelsydige Brendan Daniels as Piet ‘Panga’, die gesin se beskermengel, wat ʼn duistere verlede van sy eie het.
Denkbeeldige dorpie word storie-karakter
Net soos in die geval van Nêrens, Noord-Kaap, word die landskap in Desert Rose een van die belangrikste karakters. Die Namakwalandse dorpie Kamieskroon, sowat 70km van Springbok af, staan in as die denkbeeldige dorpie Desert Rose.
Dis ʼn verlate, stofbruin plekkie in die middel van nêrens, waar nie eers ʼn stukkie groen lafenis beloof nie.
Die kinematograaf Devin Toselli toor met die bruine om ʼn grainy, Western-gevoel te verkry. Hier is nie ʼn enkele woestynroos in sig nie – blomtyd in dié plek is onwaarskynlik.
Brümmer het in ʼn publisiteitsvideo vir die reeks gesê die plek is sό geïsoleer, dat daar geen plek is om heen te ontsnap nie: “Die familie maak sekere keuses omdat hulle nooit uit Desert Rose sal kan wegkom nie.”
Ragfyn spanningslyn
Die regisseur Cindy Lee skep ʼn ragfyn spanningslyn wat reeds in die openingstonele begin tril met die afwagting van onheil.
Dit is in die intense sweet wat op die lywe van die karakters uitslaan; in die benouende donkerte van ʼn woonwa en in ʼn bottel suur melk as die voorloper van slegte nuus.
Odes aan die Amerikaanse Western is volop. Wees veral op die uitkyk vir karakters wat in silhoeët in die raam van oop deure vasgevang word, oorgehaalde vuurwapens oor die skouer.
Die Greylings lewe nie eintlik nie, hulle oorleef net en met die slim gebruik van waskommetjies en staalbaddens van ouds; ʼn vuur wat in ʼn herd brand en die vervallenheid van die plaashuis wat veronderstel is om hulle erfenis te wees, sinspeel hierop.
En dan is daar die musiek, wat ook ʼn karakter word en die storie van Desert Rose melancholies help vertel. Baie daarvan is geskryf vir die reeks deur Neil Sandilands. Sandilands vang iets van Anton Goosen, iets van Valiant Swart, in sy nostalgiese ritmes vas.
Die oorspronklike klankbaan ego die Americana wat die reeks geïnspireer het.
ʼn Mens kan net hoop dié reeks kry ʼn internasionale gehoor. Dit hou vir seker kers vas by oorsese reekse terwyl dit ʼn unieke Suid-Afrikaanse perspektief behou.
Ná net drie episodes was ek reeds heeltemal hooked.
Vanaf Maandag, 24 Julie 2023, op Showmax beskikbaar om te stroom.
