Menu terloops
In Wat om te kyk [16 Aug 2022]

Kyk nou: Eerste lokprent vir ‘Fraksie’, nuwe kykNET-drama van ‘Die Boekklub’-skeppers


Die hoofkarakter in ‘Fraksie’ het net dollartekens in sy oë…

Kyk nou: Eerste lokprent vir ‘Fraksie’, nuwe kykNET-drama van ‘Die Boekklub’-skeppers
Kyk lokprent

“Geld is vuil,” sê een van die karakters in die pas vrygestelde lokprent vir Fraksie, ’n nuwe Afrikaanse drama wat in September op kykNET begin. Geld, en geldsug, blyk ’n kragtige dryfveer in die lewe van dié reeks se hoofkarakter, Schalk Smit, te wees. Die vraag is net hoe ver Schalk, vertolk deur Edwin van der Walt (Troukoors, Fynskrif) sal gaan om te kry wat hy wil hê? Veral as dit kom by sy gierige drome om ’n dollar-miljoenêr te word…

Fraksie is geskep deur die skrywer-vervaardigers Louis Pretorius en Albert Snyman. Hulle is ook vir treffer-reekse soos Die Boekklub, Troukoors en Fynskrif (al drie is op Showmax) verantwoordelik. Buiten Van der Walt spog die reeks met ’n skitter-rolverdeling met nog bekroonde spelers. Onder dié tel Marlo Minnaar, Trix Viviers, Crystal Donna Roberts, Melt Sieberhagen, Roeline Daneel en Lee-Ann van Rooi.

Die karakters: Wie is wie?

Schalk is ’n beleggingsbestuurder met drome om eendag ’n dollar-miljoenêr te word. Hy is getroud met Nina (Roeline Daneel) wie se ma, Deidré (Hélène Truter), van “ou geld” kom. Nina se pa, Willem (André Jacobs), is ’n onkoloog en haar suster, Bianca (Daneel van der Walt), ’n narkotiseur. Schalk en Nina het twee tienerkinders, Zac (Alex van Dyk) en Mari (Jana Malan).

Tim (Marlo Minnaar) is ’n dosent in rekenaarwetenskap in Pretoria en is onlangs met Chantel (Crystal Donna Roberts) getroud. Hy het in sy vrye tyd die QPI (Quick Payment Interface) ontwikkel en is op soek na ’n belegger daarvoor.

Jana (Trix Viviers) is ’n kommersiële prokureur en was saam met Schalk en Tim op skool. Sy het ses maande tevore Stellenbosch toe getrek en haar man, Alwyn (Sean Marco Vorster), en dogter, Emmy (Rizane Rossouw), in Johannesburg agtergelaat. In Stellenbosch ontmoet Jana egter vir Jack (Duane Williams) wat probleme in haar en Alwyn se huwelik veroorsaak.

Ander spelers in die reeks is Melt Sieberhagen as Henk, ‘n IT-spealis met ’n moeilike verlede, en Brendon Daniels as Donovan, ’n geleentheidsbeplanner en Henk se huismaat. Ilse Klink is Judy, Chantal se ma, en Gerwen Simon is Anél, haar suster. Ook te sien is Natalia Da Rocha as Jack se ouma, Lee-Ann van Rooi en Pierre van Pletzen as Schalk se baas by T&M Holdings en Hendrik Nieuwoudt as Henk se seun, JP.

Temas

Fraksie bestaan uit 17 episodes. “Die episodes word aaneen uitgesaai, maar is as’t ware twee mini-reekse,” verduidelik Louis. “Die eerste agt episodes wys hoe QPI opgebou word. Die laaste nege wys hoe dit, én die mense betrokke, verder ontwikkel.”

Behalwe vir die temas rondom die Schalk-karakter en geldsug, is daar ander kwessies soos tweede kanse, huwelik-uitdagings en ouer-kind-verhoudings wat onder die loep kom.

“Die hoofkarakter, Schalk Smit, is meer van ’n anti-held,” sê hy. “Alhoewel dit met tye nie maklik is om van die karakters te hou nie, hoop en glo ek kykers gaan nie anders kan as om van hulle te hou nie. Die reeks speel af in Stellenbosch wat met sy geskiedenis en ou geld deesdae die tegnologiese hoofstad van Suid-Afrika is.”

Kyk Fraksie vanaf Dinsdag, 13 September om 20:00 op kykNET (DStv-kanaal 144), DStv Online en Catch Up.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

15

Van ‘Bridgerton’ tot ‘Shaka iLembe’: 15+ periodedramas om nou te kyk

Van die Shelby-broers se bloederige vuiste in ‘Peaky Blinders’ tot dáái koetstoneel in die derde seisoen van ‘Bridgerton’. Hier is ons keur van die beste periodedramas wat jy tans kan stroom. 

Meer
18

Wat om te kyk: 18+ epiese boeke wat in TV-reekse omskep is

Soveel boeiende boeke wat omskep is in soveel skitterende TV-reekse. Hier is ons keur van dié reekse wat jou gaan bekoor, inspireer en ontroer.

Meer

Redakteurskeuse vir Junie 2024: Grootse ‘House of the Dragon’ keer terug, Federer se finale dae, Celine Dion se stryd, en nog

Wat om te kyk: Roerende dokkies oor Celine Dion en Roger Federer, die tweede seisoen van die epiese 'House of the Dragon' en deel twee van 'Bridgerton' se derde seisoen tel onder my keur van TV-vermaak vir vandeesmaand se redakteurskeuse.

Meer

Jou ‘Diepe Waters’-gids vir Junie 2024

Daar is ’n skokkende voorval by die swemklub, Zelda is ongelukkig en ’n onwelkome gas verskyn op Sanet se drumpel. Dít en nog meer is waarna 'Diepe Waters'-kykers in Junie kan uitsien. Hier is ons handige kykgids.

Meer
Sien alle opsies