Het Gys (Justin Strydom) in die water geval of het iemand hom ingestoot? Dit is die million dollar vraag en hierdie week word meer as een kritieke leidraad in Diepe Waters weggegee. Die enigste probleem waarmee kykers dalk mag sukkel, is die feit dat álmal rondom Gys skuldig lyk. Nes ek dink ek het die raaisel opgelos, is daar nog ’n kinkel in die storie.
Dit is als ’n deurmekaar gemors en net een persoon kan vir ons die waarheid gee, maar gaan daardie persoon Gys wees? Of gaan Gys nes AB (Cedwyn Joel) in Suidooster net nooit weer uit die hospitaalbed opstaan nie?
’n Meer komplekse familie en gemeenskap het ek nog nooit op TV gesien nie. Dié lot laat At Koster (Hans Strydom) en sy binnekring op Binnelanders soos engele lyk. Geen wonder Pam (Tracey Lee Oliver) voel sy moet met een oog wakker slaap nie! Volgens haar weet jy mos nooit wie in die middel van die nag jou kamer gaan besoek nie. En dié keer praat sy (verbasend) nie van ’n romantiese besoek nie… Pam is weer op haar stukke dié week, terwyl nog geheime wat moontlik erge gevolge kan hê op die lappe kom. Of dalk sit ek die pot nou heeltemal mis en word dié onthullings as ’n bedekte seën gesien.
Almal het geheime en almal maak foute. Maar wie se foute is hierdie week onskuldig en wie se foute sal gevaarlike gevolge hê? In my beste Gossip Girl-stem voel dit asof ek op hierdie stadium moet sê: ‘That’s one secret I’ll never tell‘.
In hierdie show is dit moeilik om die goeie ouens en die skurke van mekaar te skei juis omdat ons almal feilbaar in ons menswees is. Almal het geheime en almal maak foute. Maar wie se foute is hierdie week onskuldig en wie se foute sal gevaarlike gevolge hê? In my beste Gossip Girl-stem voel dit asof ek op hierdie stadium moet sê: “That’s one secret I’ll never tell”. Maar gelukkig hoef julle nie lank te wag vir die antwoorde nie.
As kykers gedink het dat Sanet se eiergeveg verlede week vernederend was, moet hulle dié week inskakel. Nog ’n karakter slaan hul naam met ’n plank in die naam van liefde. Dit is nogal cringe om te kyk, maar ai, die liefde laat ’n mens darem snaakse dinge doen.
So gepraat van liefde… Iemand op die produksie-span moet sekerlik ’n Disney-liefhebber wees. Ek het sommer onmiddellik geweet watter Disney-prinses se feëverhaal as inspirasie vir die grootste skok van die week gebruik is. Dié toneel is ’n bietjie belaglik, maar ek is nie kwaad nie, want ek kon my lag nie hou nie. Die ironie van daardie oomblik is skerp en ek is mal daaroor. Dit herinner jou dat selfs die sterkste mense ook kwesbaar is.
As dit voel asof jy nie meer antwoorde of moves op die skaakbord oor het nie, is ’n nuwe perspektief dalk al wat jy nodig het. ’n Onverwagse besoek bring hierdie week broodnodige perspektief.
Dit voel asof elke toneel en storielyn in Diepe Waters ’n bom is wat wag om te ontplof. Tog sê iets vir my dat daar nog baie geraamtes in die kas is…
Kyk Diepe Waters op Catch Up en DStv Online.
