Binnelanders se At Koster en Laetitia Snyman (óftewel Gretha Havenga) het vandeesweek die knoop deurgehaak. Dis At se sesde keer voor die kansel en ons kan maar net hoop dat dinge die keer uitwerk, want sover was sy liefdespad met ewe veel soene as smart gesaai.
Onthou jy al At se bruide?
Lees ook ons oorsig van al die mislukte verhoudings in Binneland-kliniek hier.
1
Bruid #1
At (vertolk deur Hans Strydom) se eerste vrou was Soekie Kellerman (Antoinette Kellermann). Hy het met haar getrou toe hy nog ’n student was. Sy is ook At se seun, Conrad Bester (Hykie Berg), se ma. Soekie se suster, Bets, het onlangs haar verskyning gemaak om aanspraak op At se boedel te maak (dis nou toe hy almal met sy faux afsterwe geflous het…) Bets het haarself as Soekie voorgedoen en beweer sy en At was binne gemeenskap van goedere getroud en dus geregtig op die helfte van sy rykdom. Die regte Soekie is inderwaarheid in ’n skuba-ongeluk oorlede, en Bets is uiteindelik uitgevang.
2
Bruid #2
At se tweede vrou was Theresa Rossouw – ook etlike jare gelede. Sy het aan kanker gesterf. At is nooit werklik van Soekie geskei nie, maar hy kon dit nie vir Theresa sê nie. Hy het steeds met haar getrou, omdat sy baie familiegeld gehad het en hy het Binneland-kliniek begin met die geld wat hy van Theresa geërf het.
3
Bruid #3
Derde aan die beurt was die prokureur Ingrid Jordaan (Michelle Botes) in 2009. Sy het van At geskei nadat sy nie meer met sy agterbakshede kon uithou nie.
4
Bruid #4
At se vierde huwelik was met met Jana du Preez (Brümilda van Rensburg) in 2016. Die twee se paaie het geskei nadat Jana besef het At se hart klop steeds tjoklits vir een van sy vorige meisies… Ivanka (Leandie du Randt).
5
Bruid #5
Volgende was Annelize Roux (Cindy Swanepoel) in 2019 nadat sy vir At afgepers het om met haar te trou.
6
Bruid #6
Hopelik is Laetitia dié een en is dit nie nodig vir At om ’n sewende bruid te vind nie… Sy en At het ’n lang geskiedenis – en nie altyd ’n mooi een nie. At het byvoorbeeld ’n rol gespeel in die gebeure wat daartoe gelei het dat dié mediese navorser destyds van die mediese rol geskrap is en agter tralies beland het.
