Menu terloops
In Onderhoude [27 Okt 2022]

‘Diepe Waters’ se Daniëlle Swanepoel verruil skoolbanke vir sepiewêreld


Die nuweling-aktrise Daniëlle Swanepoel is, soos haar karakter in die kykNET-telenovela ‘Diepe Waters’, nog op skool en met min tyd om by als uit te kom. Dís egter al wat sy en haar karakter, Karla, in gemeen het, vertel sy aan Tarren-Lee Habelgaarn.

Deur Tarren-Lee Habelgaarn

Kyk nou

‘Diepe Waters’ se Daniëlle Swanepoel verruil skoolbanke vir sepiewêreld
Kyk lokprent

In die eerste paar episodes van Diepe Waters het dit gou duidelik geword dat Daniëlle Swanepoel se karakter, Karla, die goue kind van die Swarts-gesin is.

Prestasie-hasie.

Dié tiener – met al die angs en drama so eie aan dié tyd in ’n mens se lewe – sukkel egter ook om die geweldige druk wat haar ma en oupa op haar skouers plaas, te hanteer. Hulle is so behep met die idee dat sy die beste swemmer in haar ouderdomsgroep móét wees, dat hulle haar menswees, haar tienerwees, uit die oog verloor.

Dié druk en onregverdige verwagtinge word, voorspelbaar en verstaanbaar genoeg, te veel. Sy is so bang sy stel haar ma dalk teleur dat sy ’n eetversteuring ontwikkel. 

“Die grootste ding wat my oor Karla se storielyn verbaas, is die invloed wat volwassenes op kinders kan hê… En dat hulle dit nie eens agterkom nie. Karla is onder soveel druk dat dit haar gesondheid beïnvloed en niemand is bewus daarvan nie. Hoeveel sy op haar skouers dra, is erg, en die volwassenes om haar ignoreer al die tekens dat sy swaarkry… Of hulle gee net nie om nie,” sê sy.

“As kinders, wil ons altyd ons ouers en die mense rondom ons trots maak. Tog, nou dat ek Karla se storielyn vertolk, besef ek ook hoe ongesond dit kan wees. Ek is gelukkig dat my familie nog altyd net supportive was. Ek is egter nou meer bewus van vriende rondom my wat wél onder dieselfde druk as Karla lewe. Dit is nogal skokkend en ek verstaan nou hoe hulle voel.”

Debuutrol

Dit mag dalk die 18-jarige se debuutrol op die kassie wees, maar sy vertolk die rol so oortuigend dat beide Daniëlle en Karla aan die kyker bekend voel. Sy lyk gemaklik in Karla se skoene. Dis danksy kranige waarneming van haar vriende se ervarings dat sy die rol so oortuigend kan speel, meen sy.

“Ek sien wat dit aan hulle doen, hoe dit hulle verander. Dít is wat ek gebruik om Karla se emosies outentiek te vertolk. Dit was maar moeilik aan die begin, maar soos jy die karakter leer ken, word dit makliker,” voeg sy by.

As kinders, wil ons altyd ons ouers en die mense rondom ons trots maak. Tog, nou dat ek Karla se storielyn vertolk, besef ek ook hoe ongesond dit kan wees. Ek is gelukkig dat my familie nog altyd net supportive was.

Daniëlle Swanepoel

“Ná ’n rukkie begin jy die karakter só goed verstaan dat dit vir jou voel asof jy regtig daardie persoon is. As Nadia Valvekens (wat die rol van Karla se ma, Sanet, vertolk) op Karla skree, voel dit vir my asof ek self in die moeilikheid is en dit word makliker om die emosies te wys.”

Onverwagse koers

Die rol het heeltemal onverwags oor haar pad gekom, vertel Daniëlle.

“Ons is groot sepie-aanhangers in ons huis. Ek en my ma en ouma het altyd Suidooster, Getroud met Rugby en Binnelanders saam gekyk. My suster het die rol van Petro in Getroud met Rugby vertolk, so ek was al voorheen op ’n TV-stel, maar ek het nooit regtig daarin belanggestel om voor die kamera te wees nie. Een aand het my ma in my kamer gekom omdat my sussie se agent vir haar ’n oudisie gekry het, maar dit was vir ’n ouer kind. Dit is toe dat my ma vir my vra om ’n oudisie-tape (daarvoor) te maak,” sê sy.

“Ek wou nie eintlik nie, maar het toe ingestem om my ma van my rug af te kry. Ons het dit ingestuur en toe laat weet hulle dat ek ’n call back het. Ek wou weer nie, maar toe oortuig my ma my om dit net te probeer. En nou is ons hier,” verduidelik Daniëlle.

Al wou sy nie aanvanklik die oudisie doen nie, was sy wel baie bly toe sy die rol gekry het… Altans, totdat sy besef het haar rol is nie ’n geringe een nie en dat sy eintlik een van die hoofspelers is.

“Soos ek voorheen gesê het, ons is groot sepie-aanhangers en ek was ’n massive Getroud met Rugby-fan. Toe ek by die eerste table read besef dat Altus (Theart) my pa gaan speel en Werner (Coetser) my oom, het ek onmiddellik vir my ma gevra ‘wat doen ek hier?’. Dit het gevoel asof ek nie daar hoort nie. Veral nie met sulke groot name op stel nie! Maar die produksiespan het my baie gemaklik laat voel. Hulle het verduidelik dat almal weet dat ek nuut is en dat alles fine gaan wees. Al die akteurs was ook baie nice en het my vinnig tuis laat voel.”

Ná ’n paar pep talks met haarself, het Daniëlle besluit om dit haar alles te gee en te maak asof sy weet wat sy doen. Die Engelse sê mos, “fake it till you make it”. Dít is presies wat hierdie uitblinker, met haar natuurlike talent vir toneelspel as basis, gedoen het.

Toneelspel-gogga byt

“Die toneelspel-gogga het my kliphard gebyt, so ek is dankbaar dat my ma my oortuig het om dit te probeer, al was sy bekommerd oor die ekstra werk in my matriekjaar. Ek het aan die begin gedink dit is heel maklik, want ons het in die vakansie begin skiet. Maar nou dat dit eindeksamen-tyd is, kan dit soms moeilik wees. Deesdae is daar maar min tyd vir kuier, ek is altyd besig om te studeer of om lyne te leer. Maar ek is dankbaar vir die geleentheid.”

As dinge te veel raak, is daar niks so lekker as om te gaan draf om haar kop skoon te kry nie. Sondagkerk is ook vir haar belangrik, want sy voel dit gee haar die krag vir die week wat voorlê. Om flieks saam met haar familie te binge, is nog iets wat haar laat ontspan, al kyk sy deesdae heel anders na flieks.

“Ek vind dat ek baie meer dink oor hoe die toneel geskiet is en hoe moeilik dit was en hoe hulle die shot gekry het. Dit is nogal vreemd, maar dit is seker normaal vir mense in die bedryf.”

Oor wat nog wag

Daniëlle beplan om volgende jaar ’n gap jaar te vat en enige geleentheid aan te gryp. Om eendag ’n sielkundige te word, is ook deel van haar toekomsplanne.

“Sielkunde en toneelspel het nogal baie in gemeen. In albei beroepe ontleed jy mense en moet jy in hul kop klim om die persoon of karakter te kan verstaan. Jy leer ook hoe hulle dink en dit tel vir albei beroepe. Dit is fassinerend.”

Oor haar karakter dink sy mense gaan verbaas wees om te sien in watter rigting die storielyn beweeg. Ons gaan Karla sien groei – met goeie en slegte keuses. En deur bloot in Karla se skoene voor die kamera te staan, het Daniëlle reeds baie oor die lewe, vriendskap en prestasiedruk geleer, deel sy.

“Mense sal nie verwag wat volgende kom nie. Almal moet Diepe Waters kyk want daar is nog soveel familie-, liefdes- en finansiële drama wat op kykers wag.”

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

Redakteurskeuse vir Februarie 2025

Wat om te kyk: Die popkultuur-fenomeen ‘White Lotus’ keer terug vir ’n derde seisoen, ‘Suits’ se spin-off, ‘Suits L.A.’, maak sy debuut, en Kate Hudson is in haar element in die nuwe Mindy Kaling-komedie, ‘Running Point’ – hierdie stories tel onder my keur van TV-vermaak vir vandeesmaand se redakteurskeuse.

Meer

Jou telenovela-gids vir Februarie 2025: Ontvoerings en opskuddings in ‘My naam is Farah’

Tahir neem sake in eie hande en Farah sal enigiets doen om haar ma te red. Dít en nog meer wag op ‘My naam is Farah’-kykers in Februarie. Hier is ons handige kykgids.

Meer

‘Suidooster’: Kyk uit vir dié 5 storielyn-kinkels in Februarie

Dié ‘Suidooster’ kom in Februarie nie saggies teen die hange van die berg af nie… Hier is vyf storielyne wat ‘Suidooster’-kykers in die maand van die liefde hul naels behoorlik gaan laat kou.

Meer

Jou kykgids vir ‘Kokkedoor Vuur & Vlam’ se tweede seisoen

In die tweede seisoen van die kykNET-kosreeks 'Kokkedoor Vuur & Vlam' is die bekroonde sjef Bertus Basson en braaighoeroe Kobus Botha weer op soek na die perfekte kombinasie van ’n onthoubraaier en kinkelbraaier. Hier is waarna kykers oor die loop van die tweede seisoen se 13 episodes kan uitsien.

Meer
Sien alle opsies