Eers verloor Suma-Lee haar werk, en dan vind sy uit haar eksman Dries (Roche Killian van Plaasjapie) staan op trou… Met ’n model (Emma van Heyn van Eksie Perfeksie en Matilda en Matthys). Mos elke vrou se droom vir haar eks. Ja-nee, Tarryn Wyngaard se karakter in Showmax se nuwe Afrikaanse romkom, Gebokste Liefde, het beslis meer leed as liefde op haar kerfstok… En haar woede en frustrasie begin eet aan haar. Something’s gotta give. Sy begin dan met bokslesse om van die opgestopte emosies ontslae te raak, maar die vonke spat sommer vinnig tussen Suma-Lee en haar afrigter, Clive (Jandre le Roux). Dis net jammer sy lewe is net so deurmekaar as hare…
terloops het met Tarryn gesels oor haar eerste hoofrol in ’n romantiese komedie, asook wat haar vertolking van Suma-Lee geïnspireer het.
Wat was jou eerste indrukke van Suma-Lee?
“Ek het gedink sy is ’n baie elegante vrou wat haar woede onderdruk, en dit skep dan net meer frustrasie vir haar. Dit was opwindend om maniere vir haar te vind om aan haar woeding uiting te gee op ’n manier wat by haar pas – nie op ’n manier wat haar minder soos haarself sou laat voel nie, maar eerder op ’n manier wat haar sterker sou laat voel, meer beskermend van haar energie, en daarom meer soos haarself. Haar vroulikheid is pragtig, maar vir dit om te blom moet sy leer hoe om streng met haar grense te wees.”
Was dit ooit senutergend om die hoofrol te speel, veral omdat dit jou eerste romantiese komedie was?
“Op ’n manier, nee, want Zoë (Laband, skrywer), Annelize (Frost, regisseur), en Vlokkie (Gordon, vervaardiger) het my vertrou, en dit het die kreatiewe proses makliker laat vloei. Dit was ’n seëning, want ons het net 18 dae gehad om die film te skiet en daar was baie stelle en groot stelstukke soos vir die bokstonele. Ek het wonderlike waaghalse soos Natalie (Walsh), Christy (Morcos) en Trevor (Byrom) gehad wat my op daardie dae ondersteun het.”
Waarom hou jy so baie van romkoms?
“Ek dink (die aard van) liefde het verander – soms ten goede, soms nie. Vriendskappe tussen vroue word deesdae meer waardeer soos mense sukkel om blywende verhoudings met die teenoorgestelde geslag of ’n lewensmaat te vind. Gemengde gesinne word ook meer algemeen. Om ’n geleentheid te kry om by te dra tot die storie van hoe ons steeds probeer om mekaar te vind, al raak dinge deurmekaar, was ’n ware vreugde.
“Ek hoop ook ons kan iets by Suma-Lee leer. Sy word ’n paar keer verneder en platgeslaan deur haar eksman en haar baas, en dit verpletter haar, maar sy is altyd so grasieus daaroor. Ek dink dit is omdat sy haarself goed genoeg ken om te verstaan dat die selfsugtige, minagtende manier om jou eie mag te eien nie haar styl is nie. Sy moes net eksperimenteer met hoe om vir haarself grense te stel. Uiteindelik ontdek sy dat sy altyd die sleutel tot haar eie mag gehou het. Dít was vir my baie lekker om te verken.”
En wat spesifiek was dit van dié storie wat jou belangstelling geprikkel het?
“Dit het my geïnteresseer dat die fliek om ’n vrou soos Suma-Lee gedraai het. Gewoonlik sou sy (haar karakter) die behulpsame, toegewyde vrou wees. Sy sou ’n randkarakter wees. Om haar die spil te maak waarom die film draai, het vir my, ten minste as ’n akteur, verfrissend gevoel.
“Ek het al baie survivors gespeel, vroue wat ondanks die moeilikste omstandighede daarin geslaag het om hulself te bevry. Dit was heerlik om die keer deel te wees van ’n storie wat ’n bietjie sagter is.”
Ons is mal oor hoe die film verhoudings tussen vroue uitbeeld. Kan jy my meer daaroor vertel?
“Ek was bly dat die beste oomblik van haar lewe nie was om met die hunk te trou soos ons gewoonlik in films sien nie… En dan gaan alles goed soos ons saam die toekoms inbeweeg, nie waar nie? Ek dink my vriende sal lag vir daardie outdated idee. Dit was egter belangrik om ’n mate van ’n gelukkige einde te hê – ons het dit net ’n bietjie herskep.”
Hoe het jy voorberei vir die meer fisieke tonele, en hoe uitdagend was dit?
“Dit was baie uitdagend, meestal omdat ons nie baie tyd gehad het nie. Ons het al die fisieke tonele – al die hardloop, boks, die leer om te boks, stap, boksgevegte, rondrol op die strand, spring – aaneen oor die verloop van drie dae geskiet. Dit was intens, en ek is fisiek uitgedaag. Maar dit was vir my belangrik vir ons om haar geestelike transformasie te koppel aan die transformasie van haar verhouding met haar liggaam. Om te sien hoe sy verander, fisiek sterker voel, en hoe daardie vryheid en krag haar gemoed, haar gedrag en haar gewilligheid om ’n kans op haarself te neem, beïnvloed, was net so ’n plesier om uit te lê. Stadig, sagkens, maar meedoënloos, bietjie vir bietjie herskep sy haarself. Dít was so cool.”
Wat dink jy is die grootste les wat Suma-Lee leer?
“Ek dink sy sit gemaklik terug in haar wese en leer hoeveel beter sy voel as sy só leef. Dit moedig haar aan om aan te hou, maar jy moet eers die eerste stap neem, dan die volgende een, en dan nog een en nog een…”
En watter lesse het jy op persoonlike vlak uit hierdie ervaring geleer?
“Dat jy vroulik én aggressief kan wees. Skop gat wanneer jy moet. Maar ek hou ook van die vreugde daarvan om sag en warm te wees. Ek verkies daardie tipe energie.”
Gebokste Liefde is vanaf Vrydag, 7 Februarie 2025, op Showmax beskikbaar om te stroom.
