Mooiweer en warm is uit die pen van die veelbekroonde skrywer Paul C. Venter, bekend vir trefferreekse soos Arende en Konings. Die storie begin met ’n klein dorpie se dominee wat instem – in ’n poging om die kerk se leë koffers effe voller te kry – tot ’n weeklikse vlooimark op die kerkgronde. Dis dan só wat ons die aweregse inwoners – met alledaagse én buitengewone dramas wat in hul lewens afspeel – leer ken.
Mooiweer en warm is deur Nagvlug Films, ook die span van Dinge van ’n kind, Nêrens, Noord-Kaap en Hotel, vervaardig. (Jy kan Nêrens, Noord-Kaap en al vyf seisoen van Hotel op Showmax kyk.)
Die regisseurs is Zandré Coetzer en Ephraim Gordon. Pieter Bezuidenhout het die titelsnit geskryf en gekomponeer en dit word deur Amanda Strydom gesing.
Maar wie is wie in die reeks? Hier is ’n kort opsomming van die hoofkarakters.
1
Geon Nel as Alex Kemp
Alex Kemp, in sy 40s, is ’n suksesvolle organiseerder van popkonserte, vlooimarkte, ens. Hy is geskei en woon in ’n mooi huis saam met sy eks-skoonma – huh?
2
Brümilda van Rensburg as Sonica Winters
Sonica Winters, ’n stunning weduwee in haar 60’s, kyk mooi na haarself, is briljant met syfers, en was Alex se finansiële bestuurder voordat hy met haar dogter getrou het. Ná die egskeiding het dié twee vriende gebly en deel nou, benewens die besigheid, ook ’n huis. Ja, dít hou die skindertonge besig.
3
Marissa Drummond as Ds. Isabella Boshoff
Isabella Boshoff, in haar 40’s, is die eerste vroue-predikant van die kerk, en het ’n deal met Alex Kemp gemaak om elke Saterdag ’n vlooimark op die kerk se parkeerterrein te hou. Sy raak mettertyd aangetrokke tot Alex. Sy het natuurlik haar eie issues, onder meer probleme met die kerkraad wat wonder of hulle fouteer het om ’n vrou op die preekstoel toe te laat.
4
André Samuels as Bokkie Oktober
Bokkie Oktober is die skriba van die kerk en in sy 50’s. Dié alleenloper glo dat alles – ook ’n vlooimark op kerkgrond – volgens Bybelse reëls bestuur moet word. Hy is eensaam as hy nie met kerksake besig is nie en in die geheim koester hy ’n crush op sy dominee.
5
Beer Adriaanse as Meyer Basson
Meyer Basson, is ’n 30-something kerkouderling en voëlkenner wat in die berg langs die dam voëls fotografeer en skets. Dis waar hy die jong geoloog, Cezanne, ontmoet. As die vlooimark begin, kry hy ’n stalletjie waar hy met onder meer sy voëlboeke en sketse smous. Op die oog af is hy nie jou tipiese held nie, maar hy word Cezanne se ridder teen die bose magte.
6
Carla Smith as Cezanne Dippenaar
Cezanne Dippenaar is ’ n geoloog in haar 20’s. Sy het haar hele familie in ’n ongeluk verloor en so ryk geërf dat sy nie hoef te werk nie, maar sy volg in haar geliefde geoloog-pa se voetspore en probeer haar bes. Sy is obsessief oor haar werk en dit dra daartoe by dat die bestuur van Geo Solutions haar nie ernstig opneem nie. Snags, in die ontsaglike familiehuis waar sy nog steeds – stoksielalleen – woon, spook haar familie by haar.
7
Susan Danford as Hannah Brand
Hannah Brand, in haar laat 40’s, is die bestuurder van Geo Solutions waar Cezanne werk. Sy is van Engelse afkoms en nie getroud nie. ’n Pligsgetroue, goeie mens wat onder politieke en finansiële druk swig, en nie meer van haarself hou nie.
8
Jacques Theron as Dieter
Dieter, in sy 30’s, is ’n geoloog by Geo Solutions. Hy is getroud, met kinders. Hy is bang dat iemand soos Cezanne die maatskappy sal sink en dat hy sy werk sal verloor. Dit maak hom gevaarlik.
9
Carlo Daniels as Ruben Arendse
Ruben Arendse, in sy 20’s, is ’n toegewyde en slim weerkundige met ’n ding oor sy weerballon. Eintlik is hy vreeslik gelukkig getroud en lojaal aan sy Maddy.
10
Athina Jansen as Maddy Arendse
Madison “Maddy” Arendse is in haar 20’s en ’n fisionterapeut by ouetehuise. Sy het ook ’n stalletjie by die vlooimark vir mense wat gou ’n seer spier gevryf wil hê. Maddy is ook ’n getroue lidmaat van die kerk en met Ruben getroud. Sy wil graag haar eie familie begin en worry dat Cezanne haar man die afgrond in gaan lei.
11
Antoinette Kellerman as Berta Engelbrecht
Berta Engelbrecht is ’n ou, hoogs intelligente hippie wat boom rook en boeke by die vlooimark verkoop. Almal wat tel in haar lewe is al dood, behalwe vir haar bipolêre dogter, die groot liefde en nog groter kruis van haar lewe.
12
Tinarie van Wyk-Loots as Aletta Engelbrecht
Aletta Engelbrecht, 40, smous sonbrille by die mark reg langs haar ma se boekstalletjie. Sy is mooi, maar ontplof ongelukkig te maklik en dan raak sy gewelddadig. ’n Afgryslike fout in haar verlede spook by haar.
13
Paul du Toit as Lood Momberg
Lood Momberg is ’n 40-something biker, blues rocker en tattoo artist by die mark wat ook met T-hemde en boom smous. Tog is hy die tipe wat jy aan jou kant wil hê in ’n fight.
14
Deon Lotz as Willem Conradie
Willem Conradie, 50, was ’n gewilde radio-nuusleser en is bitter oor die pakket wat hy glo gedwing is om te aanvaar. Hy smous met take-aways by die mark – alles saam met sy vrou Nerine.
15
Ira Blanckenberg as Nerine Conradie
Nerine Conradie, in haar 40’s, is ’n uitstekende kok en inderdaad die pilaar waarop die takeaway-besigheid rus. Willem doen basies niks behalwe om haar te verniel. Sy neem wraak met ’n affair – ’n gevaarlike affair.
16
Kim Cloete as Carmen Booysen
Carmen Booysen is Nerine se vriendin. Sy ken van swaarkry en maak tuisgemaakte lekkergoed en probeer dit by die mark smous. Sy is afgerem, en jonger as wat sy lyk. Sy moet vir drie kinders en haar blinde pa sorg. Die kinders se pa sit in die tronk waar hy hoort.
Mooiweer en warm begin op Dinsdag 7 Februarie om 20:00 op kykNET (DStv-kanaal 144) en DStv Online. Die reeks sal ook op Catch Up beskikbaar wees.
