Melt Sieberhagen was baie naby aan in sak en as sit met die aanvang van die Covid-19-pandemie. Dinge het egter aan die begin van 2021 skielik begin spoed optel en die man is deesdae in groot aanvraag. Jy kan hom in etlike reekse op Showmax en kykNET te siene kry in reekse soos Troukoors, Raised By Wolves en Desert Rose. As jy ’n aanhanger van Turkse telenovelas is, sal jy sy stem ook daar in die oorklankings bespeur. Verder was hy deel van die skryfspan vir die nuwe Afrikaanse dramareeks, Fraksie, wat ook vir hom ’n rol daarin besorg het. Ons gesels met Melt oor die splinternuwe maltrap-komediefilm, Dina Dagbreek, waarin hy die rol van ’n chauvinistiese aanbieder van ’n 80s-ontbytprogram vertolk.
Jy moes sekerlik vir jou eie karakter, Karel, gegril het. Hy is soos ’n Ron Burgundy van Randfontein met die emosionele IK van ’n aartappel. Dit is ’n ander tipe goor as om die karakter van ’n moordenaar of skurk, byvoorbeeld, te vertolk. Waar gaan delf ’n mens om só ’n goor karakter uit te beeld?
“Ja, mens gril vir Karel, maar as jy gril vir Karel, dan doen jy vir Karel reg. Dit is anders as ’n gewone bad guy, maar ook enige bad guy doesn’t know he’s the bad guy. Every antagonist is the protagonist of his own story. So enige karakter wat dalk teen die grein gaan, hanteer ’n mens maar net eerstens as ’n regte karakter. Hy is iemand met gevoelens en drome en wense. Karel se gevoelens en drome en wense is obviously… fucked up. Maar hy is steeds ’n gewone mens. Omdat dit komedie is, kan jy hom larger than life laat wees, so jy kan op plekke gaan delf en elemente bysit wat dit lekkerder en snaaks en meer pret maak. Dit was weird, maar ’n mens delf maar op die absurde plekke. Wat sou gebeur het as Riaan Cruywagen ’n ketamien-probleem en die doelgerigtheid van Rian Van Heerden gehad het?
By the way, die oomblik wat daai pruik op is, is Karel daar. En dis ook dieselfde pruik as wat Cindy Swanepoel gedra het in die kortfilm, Fluit Fluit. ”
Die Storiefilm-projek is aanvanklik geloods met die doel om werksgeleenthede tydens die Covid-19 pandemie te skep. Het ons regtig ’n pandemie nodig gehad vir so projek om af te skop?
“Nee, ons het nie ’n pandemie nodig gehad nie. Dit was ’n baie goeie poging. Ek dink ook dit het ’n jaar of so gevat om te stabiliseer in terme van die gehalte en dat mense gewoond raak aan “daar is ’n begroting maar dis ook ’n beperkte begroting”. Ek dink ook dit is wat Dina Dagbreek so nice maak. Ons het oor vier dae, in een plek, geskiet. Die probleem met die begrotings vir die Storiefilms – daar is beperkinge, so jy kan nie twee, drie, vier locations per dag skiet nie, want jy het net vier dae. Ek dink dis wat Luan, die skrywer van Dina Dagbreek reggekry het – om ’n storie te skep wat op een plek afspeel wat jy oor vier dae alles in een location kan skiet. Dit lyk nie geforseerd nie en dis ’n goeie ding. Ek dink dis waar die Storiefilm-mense leer om kreatief te dink in terme van tekste en oor hoe jy dit skiet.”
Julle is nogal ’n sterk groep van gesoute komedie akteurs. Dink jy die feit dat meeste van julle vriende is die produksie gladder laat verloop het?
“Ja, ons is ’n sterk groep en ons ken mekaar lank. Ek en Hannes Brümmer en Neels Clasen het saam geswot. Maude (Sandham) is fantasties, die hele spul. Jakkie Groenewald is ’n ou hand. Hy weet presies wat hy doen. Cindy Swanepoel is net fantasties. Die feit dat ons mekaar ken, is seker great, maar die feit dat ons kon werk met mense wat so goed is soos daai klomp het dit laat vinniger gaan. Hulle sê die grootste deel van sukses is om net op te daag. Ek dink die grootste deel van talent is om net jou werk reg te doen. Ons weet wat om te doen en hoe om dit te doen. Dit was nie maklik nie, maar dit was lekker. Ek het nie omgegee om elke aand met ’n snor huis toe te gaan vir hierdie produksie nie. Dit was die moeite werd.”
Enige uitstaan-oomblikke wat jy met ons wil deel?
“Ek weet nie, want daar was so baie uitstaan-oomblikke. Dit kan eintlik soos ’n montage kom: die tweeling in die leotards, die weerman met sy gulp wat oop is, die kooktannie wat in die wyn duik en die man met sy ‘klawertaar’ was net fantasties. Dit was pret!”
Dina Dagbreek saai 17 September om 20:00 uit op op kykNET. Hou kykNET dop vir nog uitsaaidatums.
Jy kan Melt ook te sien kry in:
