In M-Net se eerste lokprent vir die nuwe plaaslike reeks Devil’s Peak, kry kykers ’n voorsmakie van die drama, spanning en intrige wat in dié storie op hul wag.
Dié misdaadriller van vyf episodes is gegrond op Deon Meyer se topverkoper Infanta (Devil’s Peak is die Engelse vertaling van die boek) wat vanaf Sondag, 29 Oktober om 20:00 op M-Net uitsaai. (Jip, dit beteken dat die Sondagaand-fliek vir die duur van die reeks om 21:00 uitgesaai word.)
Devil’s Peak is ’n veelvlakkige misdaaddramareeks wat in een van die mooiste, maar ook sosio-ekonomies verdeelde stede op aarde afspeel: Kaapstad. Dié reeks volg die verhaal van die talentvolle maar gebroke speurder Benny Griessel, wat die vigilante-reeksmoordenaar, Thobela Mpayipheli, probeer vastrek.
Terwyl hulle mekaar probeer uitoorlê, kruis Benny en Thobela sê paaie met dié van ’n desperate enkelma, Christine. Sy is bereid om enigiets te doen om ’n beter lewe vir haarself en haar dogter te verseker. Die lot van dié drie karakters raak verstrengel terwyl die reeks opbou na ’n naelbyt-klimaks.
Sisanda Henna (Griekwastad) vertolk die rol van Thobela, met Tarryn Wyngaard (Pulse, Dwaalster) wat Christine speel. Ook in die rolverdeling is Albert Pretorius, Gérard Rudolf, Shamilla Miller en Masasa Mbangeni.
Die regie is deur Jozua Malherbe, bekend vir sy werk op Lioness, Griekwastad, Beurtkrag en meer.
