Die finale twee episodes van Die Real Housewives van die Wynlande word op 13 en 20 Julie uitgesaai en soos gewoonlik is hierdie ’n reünie waar niemand noodwendig hul beste voetjie gaan voorsit nie . . .
Dié episodes is die huisvroue se laaste kans om vir oulaas hul sê te sê oor enige bespiegelinge, opmerkings in hul offscreen interviews en dalk ook ’n kriewelrigheid met sommige van die ander deelnemers uit te klaar.
Amy Kleinhans-Curd, Mariska Thorpe, Karen Schwentke, Candice Bester, Michelle van Zyl en Anita Lloyd het die land behoorlik laat gons, maar dit blyk die beste is vir laaste gehou!
Hier is vyf goed wat jy oor die reünie-episodes moet weet:
1
Wat is ’n Housewives-reünie sonder ’n sjarmante aanbieder?
Die aanbieder van die reünie-episodes is die aantreklike akteur en aanbieder Armand Aucamp. Hy sê dis vir hom ’n enorme voorreg om hierdie episodes aan te bied.
“Kykers kan uitsien na ’n perfekte einde van ’n omstrede maar gewilde reeks. Daar is hittige oomblikke, oorgenoeg humor, maar ook deernis en versoening; ’n dieper verstaan van wie en wat ons is. Dit wys net weer dat ons met sagter harte met mekaar moet omgaan.”
2
Die reünie is in die hartjie van die wynlande verfilm
Die reünie-episodes is by die indrukwekkende Haute Cabrière in Franschhoek verfilm. Haute Cabrière is onder meer die tuiste van Pierre Jourdan, een van Suid-Afrika se voorste Méthode Cap Classique-vonkelwyne, en is vernoem na die Franse Hugenoot wat die plaas in 1694 gevestig het.
3
Beste voetjie voor terwyl die diamante én uitrustings skitter
“Ons het besluit ons wil ’n stylvolle wintervoorkoms hê en dat elke vrou hul beste en glansrykste moet voel,” sê Efraine du Toit, hoof van die reeks se stilering- en grimeerspan. “Ek glo ons het dit goed reggekry.”
4
Hoekom Karen die reünie misgeloop het
Karen het haar sleutelbeen ’n week voor die verfilming gebreek en sy is eers die dag voor die verfilming uit die hospitaal ontslaan. ’n Filmspan het wel ’n draai by haar huis gemaak sodat sy die kans kon kry om ook haar kant te stel oor wat die ander huisvroue oor haar kwytgeraak het.
5
Soveel vrae wat nog in die lug bly hang
Nie alle probleme is opgelos nie. Vrae wat nog in die lug hang sluit in of Anita en Amy vrede gemaak het na Amy se opmerking jeens Anita in Mauritius? En wat van Mariska en Karen? Michelle en Candice het ook nie ’n sprokiesafskeid gehad nie. Gaan Candice meer verklap oor Michelle se buie? Michelle praat ook prontuit oor hoe sy die skeiding in die groep ervaar het met Anita, Karen en Michelle aan die een kant en Amy, Mariska en Candice aan die ander.
En hoe voel Anita nou oor Amy se Cap Classique, Amelia? Mariska moet ook nog verduidelik oor daai ‘Bitch stole my podcast’-kommentaar.
En wat het van die voedoe-pop geword????
Die Real Housewives van die Wynlande reünie-episodes wys Donderdae 13 en 20 Julie om 20:00 op kykNET (DStv-kanaal 144). Kyk ook op Catch Up.
