Summertide draai om ’n mariene-bioloog, Martin Field (Frank Rautenbach) wat ná die dood van sy vrou (Amalia Uys) saam met sy twee kinders na die Valsbaai-omgewing verhuis. Hier begin hy ’n nuwe bewaringstrust, maar die lewe is nie so sonnig en droomagtig soos die see-uitsig nie.
Die reeks verken die lewens van die Field-familie en die interessante karakters wat hul paaie kruis – elkeen met hul eie geheime en begeertes. Ons ontmoet Martin se ma, Wilma, en pa, Jack Field, ’n afgetrede vlootbevelvoerder.
Martin se kinders, Tristan en Lucy, sukkel intussen om tot verhaal te kom ná hul ma se dood. Dis nou buiten die gewone druk en spanning wat hulle op skool ervaar.
Dan is daar ook Martin se broer, Gavin, ’n afgetrede professionele branderplankryer wat ’n klein branderplankbesigheid bedryf en ’n sorgvrye lewe lei.
Martin se eks, Rebecca Solomons, is ook in die prentjie. Sy het as ’n bekende Michelin-ster-sjef in New York gewerk en gaan nou met Gavin uit.
Summertide se 52 episodes sal vanaf einde-Januarie aanstaande jaar op Sondae om 18:00 uitgesaai word. Die episodes se storielyne is gemik daarop om vir die hele gesin bedoel te wees.
Die akteurs
Frank Rautenbach as Martin Field
Rautenbach is bekend vir sy kragtige optredes in rolprente soos The Bang Bang Club en Hansie: A True Story. Hy het ook ’n paar sterk TV-dramas op sy kerfstok, waaronder sy rol as Jason Hugo in M-Net se bekroonde Lioness (nou op Showmax). Hy het bekendheid verwerf as Tiaan in 7de Laan.
“Ek is oor die maan! Ek hou daarvan om stories te vertel, veral stories oor gesinne. is die perfekte voertuig om dit te doen,” sê hy in ’n mediaverklaring.
Amalia Uys as Julia Field
Julia was die sonskyn in Martin se lewe en saam met haar sterf ’n groot geheim… Amalia Uys is tans op die kassie in die kykNET-reeks Straat en is ook bekend vir haar rolle in Desert Rose en Die Byl.
Monique Rockman as Rebecca Solomons
Die SATFA-benoemde aktrise Monique Rockman voeg ’n laag van romantiese kompleksiteit by die intrige in die reeks. Sy is bekend vir haar rolle in Suidooster, Die Spreeus, Binnelanders en die veelbekroonde eko-gruwelfilm, Gaia (op Showmax).
Andre Jacobs en Terry Norton as Jack en Wilma Field
Norton is veral bekend vir haar rol as Trish Greeff op die ikoniese sepie Egoli. Sy het reeds in meer as 33 rolprente en 22 TV-reekse gespeel en ook drie Fleur du Cap-teatertoekennings vir beste aktrise gewen.
Jacobs is ook ’n veteraan in die bedryf. Buiten sy teaterwerk het hy al in onder meer Invictus, Mandela: Long Walk to Freedom, The Mauritanian en Hammerskjold rolle vertolk.
Jan Combrink as Tristan en Evangelina Hallock as Lucy
Combrink het ’n hoofrol in die bekroonde Oliver Hermanus-fliek Moffie vertolk.
Die jong Hallock het ’n rits teaterrolle en TV-advertensies agter haar naam.
Tyrone Keogh as Gavin Field
Hy is bekend as die ster van M-Net se sepie The Wild. Keogh het ook in The Girl from St. Agnes (Showmax), Blood Diamond en 24 Hours to Live gespeel. Hy is ook ’n nuwe gesig in die vyfde seisoen van Die Byl en vertolk die rol van kapt. William Miller, die ondersoekeenheid se nuwe profiler.
Ook in die rolverdeling:
Ntombi Makhutshi (Devil’s Peak, Cold Harbour, Disgrace)
Cassiel Eatock-Winnik (Kite, The Dark Tower)
Euodia Samson (Arendsvlei)
Maurice Carpede (Chappie)
Morné Visser (Dis Ek, Anna)
Weeklikse episodes vanaf Sondag, 28 Januarie 2024 om 18:00 op M-Net (DStv-kanaal 101) en DStv Stream. Ook op Catch Up ná uitsending beskikbaar.
