Wat om te kyk op TV en aanlyn te stroom hierdie week – hier is ons top-keuses vir 16 tot 22 Oktober 2023.
Neem asseblief kennis dat datums en titels moontlik kan verander.
Boetie Boer
Vanaf 18 Oktober 2023 op Showmax.
Boetie Boer, Inside The Mind Of A Monster is Showmax se nuutste ware misdaad-dokkiereeks waarin die reeksmoordenaar Stewart ‘Boetie Boer’ Wilken oor sy grudade vertel. Dit neem kykers terug in tyd na 1990 toe Wilken sy moordtog in Port Elizabeth, nou Gqeberha begin het. Soos die joernalis Brett Adkins in die lokprent sê: “Toe hy in hegtenis geneem is, het dit geklink soos iets uit ‘n fliek. Skielik het ons ’n reeksmoordenaar gehad.”
In die vyfdelige dokkiereeks bespreek Wilken openlik sy misdade met dr. Gérard Labuschagne, die voormalige afdelingshoof van die polisie se ondersoekende sielkunde-afdeling.
Buiten Wilken se weergawe van gebeure is daar ook verskeie onderhoude met onder andere sy kinders, Sonika en Sergius, die familie van een van die slagoffers, asook sers. Ursula Barnard van die polisie se kinderbeskermingseenheid, en sers. Derick Nosworthy van die moord-en-roof-eenheid wat albei sleutelrolle in Wilken se vervolging gespeel het.
Straat
Weeklikse episodes vanaf 17 Oktober om 20:00 op kykNET en DStv Stream (kanaal 144).
kykNET se nuwe drama is ’n tong-in-die-kies-storie oor ’n fluitjieblaser wat in witness protection beland as ’n gevaarlike sakeman ’n hitman huur om van hom ontslae te raak voordat hy teen hom kan getuig. Dit blyk egter gou dat Robert Muller (Nico Panagio) nie die enigste een is wat geheime hou nie… Terwyl hy wegkruip – en wegsteek dat hy in witness protection is – is sy bure in Aarbeistraat nie sonder hul eie sondes nie. Ken enige van die inwoners in dié cul-de-sac (werklik) mekaar?
Onder die ander akteurs in die rolverdeling tel Leandie du Randt, Amalia Uys, Hélène Truter, Hannes Brümmer, en Nicole Holm.
Killers of the Flower Moon
Vanaf 20 Oktober 2023 op Apple TV+.
Martin Scorsese se nuutste fliek, Killers of the Flower Moon, het groot lof op vanjaar se Cannes-rolprentfees ontvang, met die draaiboek wat gegrond is op die gelyknamige boek deur David Grann.
Maar, wees gewaarsku, dié vertelling, so intens en briljant soos wat dit is, is lank. Blerrie lank. 206 minute lank.
Die storie, ’n epiese Western misdaaddrama, beeld die reeksmoord op lede van die olieryke Osage-stam in Oklahoma in Amerika uit. Dié reeks grudade sou later as die “Reign of Terror” bekendstaan. Die verhaal, wat in die 1920’s afspeel, is op ware gebeure gegrond en word vertel deur die onwaarskynlike romanse tussen Ernest Burkhart (Leonardo DiCaprio) and Mollie Kyle (Lily Gladstone).
Ook in die rolverdeling is Scorsese-gunsteling, Robert De Niro, en Jesse Plemons.
Dana Stevens van Slate beskryf dit in haar resensie só: “Killers of the Flower Moon is ’n katedraal van ’n fliek; groot in ambisie en omvang, maar tog vreemd intiem in die effek daarvan op die kyker.”
1923
Vanaf 16 Oktober 2023 op Showmax.
As jy dié reeks op M-Net vroeër vanjaar gemis het, kan jy dit nou op Showmax kyk. Sommer als op een slag, want dis moeilik om op te hou as jy eers begin het.
1923 spog met veteraan- en bekroonde akteurs soos Helen Mirren, Harrison Ford en Timothy Dalton en dien as ’n prequel vir die uiters gewilde dramareeks, Yellowstone. Soos met Yellowstone, draai die verhaal in 1923 om die Dutton-familie. Hier word daar egter op vroeër generasies gefokus met die vertelling wat in 1923 afspeel. Dis ’n periode van geweldige broekskeur. En nie net vir die Duttons nie, maar ook vir die groter Amerikaanse volk met onder meer die beginstadium van die Groot Depressie en die Prohibisie-tydperk.
Die reeks het ’n punt van 90% op die resensiewebwerf Rotten Tomatoes met talle kritici wat Mirren en Ford se gemaklike chemie uitwys as genoegsame rede om te kyk.
Domina S2
Kyk die tweede seisoen vanaf 16 Oktober 2023 op Showmax.
Domina speel af in antieke Rome en vertel die verhaal van Livia Drusilla (gespeel deur die bekroonde Poolse aktrise Kasia Smutniak), die magtige vrou van die Romeinse Keiser Augustus.
Die storie word in die tweede seisoen – waarvoor ons sowat twee jaar moes wag – weer vanuit ’n vroulike oogpunt vertel. Livia, verstrengel in ’n disfunksionele gesin en in ’n onstuimige heerskappy, verkeer midde ’n magstryd om beheer oor die Romeinse Ryk.
Soos The Guardian dit gestel het, vul dié bloederige reeks die gat wat deur Game of Thrones agtergelaat is.
Rain Dogs S1
Vanaf 19 Oktober 2023 op Showmax.
Rain Dogs, ’n Britse tragi-comedy, volg ’n sukkelende enkelma, Costello Jones (Daisy May Cooper), en haar jong dogter, Iris (Fleur Tashjian). Sy hustle om ’n beter bestaan vir haar dogter te skep, maar ons weet mos it takes a village. Sy moet dus ook staatmaak op ander, soos Selby (Jack Farthing), Iris se kamma-pa, asook Costello se holderstebolder beste vriendin, Gloria (Ronkẹ Adékoluẹjo). Saam-saam vorm hulle ’n anderste tipe familie vir wie weinig dinge glad verloop…
Die New Yorker beskryf die reeks as ’n “vertoonvenster vir gebrekkige menslikheid en (soms verregaande) galghumor”. Dít terwyl TIME die reeks prys as “manjifiek donker… soos geen ander gesinskomedie op TV nie…”
The Guardian beskryf Rain Dogs weer as “ ’n somber en pragtige drama waarin die min ligpunte ’n kwessie van oorlewing is, soos gate wat deur die donker geslaan word.”
Die reeks het ’n punt van 93% op die resensiewebwerf Rotten Tomatoes en word daar ook tans aangedui as nommer 37 op die ranglys van vanjaar se beste TV-reekse (tot dusver).
Vjeran Tomic: The Spider-Man of Paris
Vanaf 20 Oktober 2023 op Netflix.
In dié dokumentêr vertel Vjeran Tomic, die sogenaamde “Spider-Man van Parys”, hoe hy – met erg min moeite – dit reggekry het om in 2010 kunswerke van Picasso, Braque, Matisse, Léger en Modigliani uit die Museum of Modern Art in Parys te steel.
Ook nuut hierdie week:
Vanaf 16 Oktober 2023:
It Takes a Killer S1, 20:00 op CBS Justice en DStv Stream (kanaal 170)
Essex County S1, weeklikse episodes om 20:00 op M-Net en DStv Stream (kanaal 101)
Oggy Oggy S3, Netflix
A Quiet Place, Showmax
Black Cat, Showmax
Coach Carter, Showmax
Forrest Gump, Showmax
Geduld Is ’n Virtue, Showmax
S.W.A.T, Showmax
Tiger Cage 3, Showmax
Vat Jou Goed En Trek S9, Showmax
Zu: Warriors from the Magic Mountain, Showmax
Vanaf 17 Oktober 2023:
I Woke Up A Vampire, Netflix
Heather McMahan: Son I Never Had, Netflix
The Devil on Trial, Netflix
Vanaf 18 Oktober 2023:
Kaala Paani, Netflix
Vanaf 19 Oktober 2023:
Bodies, Netflix
Cocaine Bear, Showmax
Bumblebee, Showmax
Dankie Lottoland S7, Showmax
Hannes Aan Huis S8, Showmax
Hotel Transylvania 3: Summer Vacation, Showmax
Transformers, Showmax
Transformers: Age of Extinction, Showmax
Transformers: Dark of the Moon, Showmax
Transformers: The Last Knight, Showmax
Transformers: Revenge of the Fallen, Showmax
When A Stranger Calls, Showmax
Witness To Murder: A Darrow Mystery, Showmax
Crashing Eid, Netflix
Neon, Netflix
Crypto Boy, Netflix
Vanaf 20 Oktober 2023:
Upload S3, Prime Video
The Pigeon Tunnel, Apple TV+
Big Mouth S7, Netflix
Creature, Netflix
Doona!, Netflix
Elite S7, Netflix
Surviving Paradise, Netflix
Disco Inferno, Netflix
Flashback, Netflix
Kandasamys: The Baby, Netflix
Old Dads, Netflix
Vanaf 21 Oktober 2023:
Young Sheldon S6, weeklikse episodes om 18:30 op M-Net en DStv Stream (kanaal 101)
Riverdale S7, weeklikse episodes om 21:00 op M-Net en DStv Stream (kanaal 101)
The Bala Family S1, Showmax
Vanaf 22 Oktober 2023:
The Rookie: Feds S1, Showmax
Nog aanbevelings
Kry Netflix met DStv
DStv-intekenare kan met die nuwe Explora Ultra toegang tot Netflix kry. Kry dit nou →
