As jy nog altyd iets soos Grey’s Anatomy, The Good Doctor, Chicago Med of New Amsterdam in Afrikaans en binne ’n plaaslike konteks wou sien, is kykNET se nuwe reeks glo net die regte doepa, lui ’n mediaverklaring van die kanaal.
Hartklop, wat ’n merkwaardige 178 rolle met dialoog het, het verskeie groot name in die rolverdeling. Sommige van dié is deurlopend, terwyl ander gasrolle is. Buiten Leandi du Randt, David Louw, Simoné Pretorius, Dawid Minnaar en Jacques Bessenger, is daar ook spelers soos Renate Stuurman, David Louw, en Oros Mampofu. Nog bekendes sluit Carla Classen, Marlee van der Merwe, Christel van den Bergh, Arno Marais, Rika Sennett, Thulani Mtsweni, Susan Coetzer, Vusi Thanda, Esmeralda Bihl, Christo Davids, Elma Postma, Francois Jacobs en Bouwer Bosch in.
Die reeks is deur Zoë Laband (The Girl from St. Agnes, op Showmax) geskryf. Die regisseurs is Harold Hölscher (Ludik, op Netflix) en Christo Davids (Spoorloos, op Showmax).
Agter die skerms
Die hospitaaltonele is in sale en teaters in die Solomon Stix Morewa-gedenkhospitaal en by die Universiteit van die Witwatersrand in Johannesburg verfilm. Die storielyne se mediese gevalle is gegrond op werklike gevalle en ’n span dokters en mediese kenners het as konsultante gedien. Opgeleide verpleegsusters het met die verfilming van die operasietonele gehelp om dit so realisties moontlik te maak.
“Ons het besluit om die reeks in ’n staatsopleidingshospitaal te laat afspeel omdat dit nie net verteenwoordigend van Suid-Afrika is nie, maar ook om te wys dat ons van die beste mediese fakulteite in die wêreld het,” sê Zoë.
“Ons plaaslike dokters is superhelde. Daar is militêre dokters van oral oor wat Suid-Afrika toe kom vir hul opleiding, juis omdat ons hospitale soms soos oorlogsones lyk. Dan is daar natuurlik die ander kant – die dokters se persoonlike lewens en die impak wat hulle werk daarop het.”
Kykers sal dus ook in die TV-dokters se persoonlike lewens ingetrek word. Of dit so smartsage-agtig soos Grey’s Anatomy gaan wees, sal ons moet sien!
Hartklop begin op Dinsdag 18 Julie om 20:00 op kykNET (DStv-kanaal 144) en sal ook op Catch Up beskikbaar wees.
