Toe Nêrens, Noord-Kaap in 2021 sy debuut as dramareeks op kykNET gemaak het, was daar ’n handvol spelers wat vir kykers onbekend was. Een van hulle was Daneel van der Walt, die geliefde Suzette wat nou, ná ’n duikongeluk, in ’n rolstoel is. Destyds het Daneel in onderhoude gesê sy was op die punt om moed op te gee wat ’n groot deurbraak betref toe sy die rol in regisseur en draaiboekskrywer Nico Scheepers se besonderse dramareeks gekry het. En nou, drie jaar later, is sy ’n bekende en welkome gesig op die kassie.
Daneel vertel vir terloops meer oor haar karakter in Nêrens, Noord-Kaap en hoekom sy dink Suzette so geliefd onder kykers is.
Suzette het baie diep in kykers se harte gekruip. Hoekom dink jy praat die karakter so met mense?
“Dit is vir my ongelooflik om te sien hoe mense hulself met haar kan vereenselwig. Ek dink dit gaan terug na die slim Nico Scheepers toe wat werklikwaar weet hoe om liefdevolle vroue te skryf. Kyk byvoorbeeld ook na Maggie (vertolk deur Ilse Klink); nog ’n sterk, liefdevolle vrou. Ek dink (die impak is ook só merkwaardig) omdat dit in skrille kontras staan met al die ander moeilike dinge wat in die reeks gebeur.”
Suzette en klein Lourens het ’n baie hegte band. Maar dieselfde geld ook vir jou en Arnold Swart wat die rol van klein Lourens vertolk, nie waar nie?
“Arnoldjie. Hy het so ’n spesiale plek in my hart. Dit is dalk iets wat in die sterre geskryf is. Hy was verskriklik skaam tydens die verfilming van die eerste seisoen, en dis wonderlik om te sien hoe hy homself intussen regtig leer ken het en weet wat hy uit die lewe wil hê. Dís vir my mooi. Ek dink hy is ’n baie sterk en unieke mens en ek het soveel liefde in my hart vir hom. Hy is een van die redes hoekom ek so dankbaar is vir Suzette.”
Voor Nêrens, Noord-Kaap se eerste seisoen was jy amper reg om handdoek in te gooi as aktrise. As jy kon teruggaan in tyd, wat sou jy vir die Daneel van die verlede gesê het?
“Moenie ophou nie. Luister na jou agent. My agent, Suzanne Boje, het vir my gesê: ‘Oukei, suster, jy gaan nie ophou nie’.”
Sedertdien was jy baie besig. Daar was Roem, ’n musiekblyspel wat by al die groot kunstefeeste te sien was, die verhoogproduksie Braam en die engel, en nog werk voor die kamera in reekse soos Trompoppie, Fraksie en Koek. Wat is jou planne vir volgende jaar?
“Daar was ditjies en datjies tussenin en daar is nog ’n nuwe TV-reeks, Spooksoeker, wat in Desember op Showmax begin. Volgende jaar? Dis nooit ’n lekker vraag vir ’n akteur nie!”
Wat hoop jy kom nog op jou lewenspad?
“Sjoe! Vrede. Gesonde liefde vir myself. Verskriklik baie treinritte verby mooi plekke. Verskriklik baie liefde. Die geleentheid om stories te vertel totdat ek stories van ou mense kan vertel. Grace. Met myself en met my medemens. Vreedsaamheid. En so baie kos!”
Nêrens, Noord-Kaap Deel II saai op Dinsdae om 20:00 op kykNET (DStv-kanaal 144) en DStv Stream uit. Nuwe episodes is ook ná uitsending op Catch Up beskikbaar. Die volledige eerste reeks van dertien episodes van Nêrens, Noord-Kaap is tans beskikbaar op Showmax.
