Diepe Waters-kykers moes vandeesweek een van dié telenovela se oorspronklike karakters groet – en dit was omtrent ’n dramatiese exit vir Neels van Jaarsveld se Wim. Met sy dood laat hy ’n hele paar gebroke harte agter.
Waar is ons in die storie?
Toe Rose (Eloise Cupido) Kaap toe is vir werk, het Wim in Johannesburg gebly om die huis op te pak en te verkoop. Hy het egter gesukkel om ’n koper te vind, en hy en Rose het al verder van mekaar gedryf.
Terselfdertyd het Ben (Eric Bouwer) vir Sanet (Nadia Valvekens) laat weet dat hy gevra het om na ’n gemeente in Klerksdorp verplaas te word om nader aan sy dogter, Mari (Diandra Slabbert), te wees. Sanet wou nie saam Klerksdorp toe trek nie en het begin twyfel oor haar besluit om met Ben te trou.
Intussen het Sanet en Wim saam AA-vergaderings begin bywoon, en die een ding het tot die ander gelei… Sanet het haar verlowing verbreek, en Wim het besluit om Kaap toe te gaan en Rose vir ’n egskeiding te vra. En dis waar hul gelukkige einde in sy dinges in gestuur is met Wim wat op pad na die lughawe verongeluk het.
Wim se laaste storielyn in Diepe Waters het ’n hele paar kinkels gehad, maar hy geniet ’n karakterkinkel, sê Neels. “Dit maak dit uitdagend vir die speler en hou dit stimulerend vir die kyker. Dit was belangrik om die tonele so opreg, eerlik en weerloos as moontlik te benader.”
Oor sy tyd op Diepe Waters, vertel Neels dat dit juis sy mede-akteurs is wat dit so besonders gemaak het. “Ek het die jonger akteurs se energie en die ouer akteurs se stamina die meeste geniet. Die mense agter die skerms werk ook ongelooflik hard, en dis belangrik om ook vir hulle krediet te gee.”
Vir eers woeker hy nou voort met sy produksiemaatskappy, Met Eish. Vorentoe sal hy ook graag ’n bundel van sy skryfwerk wil uitgee. Daar is ook ’n filmprojek waaraan hy tans as vervaardiger, skrywer en protagonis werk, in die pyplyn.
Neels groet egter nie net vir Wim en die res van Diepe Waters nie – dis ook vaarwel aan Johannesburg en terug Kaap toe met hom. “Twee jaar is nogal ’n lang tyd om weg van die huis te wees. Maar as daar ’n interessante projek opduik, sal ek weer my tassies pak. Hoe sê hulle? Aanhou beweeg en geraas maak.”
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
