Talle kinkels en draaie in die Afrikaanse telenovela Skemergrond het kykers vasgenael voor die kassie gehou, maar veral dié vyf storielyne het die bloeddruk laat rys.
1
Gloria en Beeno se troudag
Kykers het gejuig toe Ruan (Dann-Jacques Mouton) uiteindelik met die hulp van Gloria (Hunter Plaatjies) en Kevin (Gershwin Mias) vir Beeno (Duncan Johnson) – op Gloria en Beeno se troudag! – vasgetrek het. Dít nadat dié genadelose misdaadbaas maande lank vir Gloria fisiek en emosioneel mishandel het. Skemergrond-kykers was op ’n emosionele wipwarit soos hulle moes toekyk hoe Gloria midde Beeno se gevaarlike wêreld probeer koershou.
2
Ronnie se dood
Dit was vir Skemergrond-kykers ’n groot skok toe Ronnie Maarman (Mario Haupt ) dood is. En die ergste is dat dit sy eie vrou, Hazel (Carmen Maarman), was wat die skoot (per ongeluk) afgevuur het. En net toe dit gelyk het asof dinge weer vir dié twee sou regkom…
3
Hazel se wêreld stort in duie
Dit het begin met Hazel wat troos by Fabian gevind het tydens Ronnie se verhoor. (Ronnie se loopbaan was in die weegskaal as gevolg van ’n ondersoek deur die mediese raad.) Fabian (Marunzo Thomas) het ’n skouer en ondersteuning gebied, maar hy was net effens té behep met Hazel en sy motiewe was duister… Uiteindelik het dié twee ’n verhouding aangeknoop, maar die skuldgevoelens het vir Hazel opgevreet en sy en Ronnie het ook hul pad terug na mekaar gevind.
Toe gebeur die verskriklike ongeluk met Hazel wat per ongeluk vir Ronnie skiet. Fabian was egter nie klaar met Hazel nie, en hy het haar probeer afpers terwyl hy ook ’n wig tussen haar en Junior (Ayden October) gedryf het.
Hoewel Fabian toe uiteindelik onlangs agter tralies beland het, sukkel Hazel en Junior nou om mekaar weer te vind en hul verhouding te herstel.
4
Amber vind water
Almal was op die punt om moed op te gee, maar Amber (Talia Davis) het aanhou veg om water vir Everlasting te vind. En só het sy toe uiteindelik die Louws se plaas gered!
Die watervonds het ongelukkig net tydelike verligting gebied van Christine (Devonecia Swartz) se planne om die Louws te vernietig. Dit was nie lank nie of daar was ’n nuwe bose plan aan die broei…
5
Lily en Amber
Lily (Hildegardt Whites) en Amber se ma-en-dogter-verhouding is vanjaar behoorlik getoets. Daar was onder meer ’n groot vertrouensbreuk rakende die ware identiteit van Amber se pa en Christine het ook haar beste gedoen om vir Amber teen haar ma te draai.
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
