Vir byna twee dekades is Carmen Maarman ’n bekende naam in die Suid-Afrikaanse vermaakbedryf. Van die verhoog by die Baxter-teater tot televisieskerms regoor die land, het sy vroue van elke vorm, kleur en storie uitgebeeld. Tog erken Carmen, soos sy nader aan 50 beweeg, dat haar eie groei en lewenservaring nie net haar lewe verander het nie, maar ook hoe sy die vroue wat op ons skerms verskyn, vertolk.
“Daar is iets so kragtig aan hoe vroue se stories oor die jare verander het,” sê Carmen.
“Toe ek jonger was, sou ek sekere karakters heeltemal anders gespeel het. Nou is ek meer geïnteresseerd daarin om vroue as multi-dimensioneel te wys, want dit is wie ons is. Ons is sterk, ja, maar ons is ook menslik. En vir my maak daardie menslikheid, daardie lae, deesdae soveel meer saak.”
Van verhoog tot skerm
Teater, sê sy, sal altyd haar eerste liefde wees. “Daar gebeur altyd iets in teater,” sê sy.
“Ek glo daarin om vir mense hul blomme te gee terwyl hulle nog leef en daarom het dit so baie vir my beteken om deel te wees van die David Kramer se tribute show.”
Maar in onlangse jare het gehore Carmen meer op televisie as op die verhoog gesien. Die rede? Telenovelas en sepie-rolle bring dikwels intense skedules en lang kontrakte wat min tyd vir verhoogproduksies laat.
“My hart bloei, want teater sal altyd my eerste liefde wees,” erken sy, “maar ek is dankbaar om te kan werk. ’n Akteur is nie net een ding nie, ons doen TV, verhoog, radio en stemwerk. Ons vertel stories in elke medium en ek is mal daaroor dat ek na al die jare nog steeds kan doen waarvoor ek lief is.”
Die vroue wat sy speel en die vroue wat sy ken
Carmen het oor die jare ’n wye verskeidenheid vroue uitgebeeld, maar sy sê haar vertolking het verdiep namate sy ouer geword het. “Ek is amper 50 en jy leer om karakters anders te vertolk omdat jy self verander,” verduidelik sy.
“Op Skemergrond is ek trots om Hazel te speel, ’n vroue-karakter wat gehore nog nie regtig gesien het nie. Sy bestuur ’n groot familieplaas, sy is ’n vrou, ’n ma en gerig op haar loopbaan. Sy is nie die tipiese gebroke vrou wat uit mishandeling of verslawing kom nie. Sy het haar eie foute en uitdagings, maar sy is op ’n ander manier sterk. En dan is sy ook menslik.”
Dit is juis hierdie menslikheid waarmee Carmen wil hê gehore moet aanklank vind. “Wanneer jy soveel rolle as ’n vrou vervul, is dit maklik om te vergeet dat jy ook mens is,” sê sy.
“Hazel wys daardie kwesbaarheid. Sy is modern, layered en onvolmaak. As akteurs het ons ’n verantwoordelikheid om vroue se stories outentiek te vertel, om mense te laat voel. Wanneer iemand jou kom bedank vir ’n storielyn, maak dit alles die moeite werd.”
Stories wat die lens verskuif
Carmen se gesig straal as sy praat oor hoe die narratief rondom vroue verander. “Ons sien uiteindelik stories wat nie net oor vroue se stryd gaan nie,” sê sy. “Vir so lank was ’n sterk vrou net op een manier uitgebeeld, jy moes ’n sekere manier lyk of optree. Maar vroue bring mans in die wêreld, hoe sterk is ons dan nie! Daar is soveel maniere om sterk te wees. En nou vertel ons daardie stories.
“En soms beteken sterkte om te erken jy is moeg. Dat jy ’n breek nodig het. Dat jy nie altyd 100% kan gee nie. As vroue gee ons soveel vir ons gesinne, ons werk, ons gemeenskappe. Soms is die dapperste ding wat jy kan doen om vir jouself tyd te gee.”
Hazel se volgende groot kinkel
Wat Hazel betref, kan Skemergrond-aanhangers groot drama in die komende paar weke verwag. Sonder om te veel te verklap, laat Carmen bietjie deurskemer dat daar emosionele storms op pad is vir haar karakter.
“Ek hoop gehore is vriendelik teenoor haar wanneer dit afspeel. Sy is altyd daar vir almal, gee altyd, maar wanneer jy overlooked of verwerp voel, kan dit jou lei om keuses te maak wat jy dalk nie normaalweg sou maak nie. Ons is almal menslik. Party dae gee jy 30% en iemand anders moet dan 70% gee. Dis die lewe.”
Gemaklik in haar eie vel
Op 46 straal Carmen dankbaarheid en selfvertroue uit. “Ek is so bly ek het gekry wat ek in my 40’s gekry het,” sê sy. “Toe ek jonger was, het ek gebid en gehuil en gewonder wanneer die volgende werk sou kom. Nou kan ek terugkyk en die seëninge sien. Ek waardeer dit alles nou soveel meer.”
En al is sy lief vir haar werk, het sy ook die waarde van grense en balans geleer. “Ek kry elke dag die kans om saam met my vriende te werk en te speel, en ek is mal daaroor,” vertel sy.
“Maar ná ’n lang dag geniet ek dit net soveel om huis toe te kom na stilte en vrede. Ek is in ’n fase van my lewe waar ek die stilte waardeer, die tyd om weer krag op te bou. Om ouer te word is ’n geskenk en ek wil dit teen volle benut.”
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
