Wat gaan in sepieland aan!? Het ek die memo gemis of kort ons sepieskrywers net ’n bietjie meer romcoms in hul lewens? Sjoe, dinge lyk op die oomblik donkerder as verlede week se tornadowolk in KwaZulu-Natal!
Dit voel asof almal tans op ’n moord-en/of-ontvoering-mission is. Mens kan skaars byhou! Oor die afgelope paar weke het elke sepie al ’n beurt gekry en verlede week was dit Diepe Waters.
Ek het mos gesê Damian (Luan Jacobs) gee vir my erg creepy vibes, maar arme Nina (Reze-Tiana Wessels) het geen idee gehad nie. Die arme Nina het glad bleek gelyk toe Damian die vermomming van sy gesig af trek en sy besef dat haar kaartjie Amerika toe haar gesin wil vermoor. Om so verkeerd oor iemand se karakter te wees, kan ook nie lekker wees nie. Ek sou soos ’n totale idioot gevoel het, maar dit wys jou net hoe slinks die kamstige scout is!
Ek het regtig vir ’n oomblik gedink die Diepe Waters skrywers gaan ons met ’n triple moord los. Dit sou ’n eerste vir my wees, want ek kan nie onthou dat ek al ooit ’n hele familie in een aand op ’n sepie sien sterf het nie. Maar daar is altyd ’n eerste keer… Ek is seker Rose (Eloise Cupido) het fyn poepies gegee, want dit was darem amper of sy het haar hele familie voor haar sien sterf!
Uiteindelik sien Gys (Justin Strydom) vir Rossouw (Altus Theart) raak, dit is net ’n jammerte dat hy eers moes bedank en toe homself van ’n motorfiets gegooi het voordat sy pa begin aandag gee het.
Pam (Tracey-Lee Oliver) beter haar plek ken, want iets sê vir my dat sy nie meer pappa se gunsteling-kind gaan wees nie.
Arendsvlei
So gepraat van too close for comfort – Rachel (Kim Syster) en Bompie (Jarrid Geduld) in Arendsvlei het daardie selfde fyn poepies as Rose gegee toe Desmond (Alistair Izobell) hulle betrap. Bompie is meer blaf as byt en kan nie ’n sin bymekaar sit wanneer sy pa hom laat skrik nie, maar gelukkig vir hom is lieg tweede natuur vir Rachel en het sy vinnig ’n storie gespin. Hulle beter ophou, want hier kom moeilikheid.
Ten minste het Hein (Merlin Balie) en Yvette (Charlene le Roux) ná hoeveel tragedies en mislukte verhoudings hul pad na mekaar se arms gevind.
Arendsvlei is elke Maandag tot Donderdag op kykNET & kie (DStv-kanaal 145, ook op DStv Stream) om 19:30 te sien. Dit is ook op Catch Up beskikbaar.
Binnelanders
Ek weet sy bedoel goed, maar Ciska (Deoudoné van der Merwe) moet nog leer dat jy jou neus uit ander mense se sake moet hou. Ciska vat dinge te ver hierdie week en dit het ernstige gevolge vir haar en Brenda (Elisabeth Nisbet). Tertius (Reynardt Hugo) en Tracy (Melinda Viljoen) probeer hul nuwe lewe saam met Leah navigeer, maar Tracy vind dit baie moeilik om haar te deel.
Naomi (Je-ani Swiegelaar) en Louis (Germandt Geldenhuys) begin besef dat dinge glad nie goed gaan met Karen (Luandri Reynders) nie. Maar gaan sy toelaat dat mense haar help? Of gaan sy haar gevoelens wegdrink?
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
Suidooster
Carlo (Jadon Booysen) en Lee-Ann (Portia Joel) se verhouding hang aan skerwe ná Ty (Maurice Paige) se dood. Die hele Ruiterbosch rou, maar die mense wat daar moet wees vir mekaar sukkel om mekaar se rouproses te respekteer.
Bianca (Simone Biscombe) en Riaan (Daniel Coetzee) neem hul verhouding na die volgende vlak toe, maar property guru Riaan besef hy is dalk nie ’n kenner in sekere velde nie.
Kaashifa (Jawaahier Petersen) en Rhafiek (Irshaad Ally) se huwelik is besig om te verbrokkel. Selfs Mymoena (Jill Levenberg) kan hulle nie help nie.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
