Recipes for Love and Murder is gegrond op die gelyknamige boek deur Sally Andrew. Die Ierse aktrise, Maria Doyle-Kennedy, vertolk die storie se hoofkarakter, Tannie Maria. Die boek is deur die Suid-Afrikaanse skrywer Karen Jeynes in ’n TV-draaiboek verwerk.
Tannie Maria is ’n Skotse vrou wat ʼn plaashuis in die Karoo geërf het en die dorpskoerant se kosskrywer- en biegtannie is. Die eerste seisoen het gedraai om die moordondersoek na een van Tannie Maria se korrespondente. Sy het kragte met ’n rookie-joernalis, Jessie September (Kylie Fisher), saamgespan om dié moord op te los.
Die tweede seisoen begin met ’n massiewe brand wat die klein dorpie Eden verswelg en dan ’n noodlottige kettingreaksie ontlok. Tannie Maria, Jessie en Khaya (Tony Kgoroge) word dan by ’n moordondersoek betrek. Boonop kom die dorp se donkerste geheime op die lappe.
Ook dié keer deel van die rolverdeling tel Wynand Ferreira (Moffie, Mooiweer en Warm, Wyfie), wat Jaco, Regardt se intense jonger broer vertolk; Gerard Rudolph (Devil’s Peak) as Ricus, ’n opgeleide sielkundige wat ’n werktuigkundige geword het; en Hlubi Mboya (Blood Psalms, I Am All Girls) as Jackie Baloyi, die nuwe begrafnisondernemer.
Recipes for Love & Murder se regie is deur Jozua Malherbe en Karen Jeynes.
Die eerste seisoen van Recipes for Love and Murder is nou op Showmax beskikbaar om te stroom.
