Niggies, ’n dramareeks gegrond op hierdie misdaad wat die land geruk het, is geskep deur ’n gedugte span – voor en agter die kameras. Die reeks sal in Maart vanjaar op kykNET debuteer. Die première-datums en ’n meer volledige rolverdeling sal later bekend gemaak word, maar vir nou weet ons dat dit die veelbekroonde Jaco Bouwer is wat die regie behartig, met die akteur en skrywer Beer Adriaanse wat die rol van die ouer André vertolk. Adriaanse is bekend vir flieks soos Wonderlus en Kanarie, asook reekse soos Hotel en Fynskrif. Die talentvolle nuweling Janru Steenkamp speel die jong André.
Bouwer is bekend vir sy grensverskuiwende teaterwerk, asook die bekroonde ekorillerfliek Gaia, en die internasionale trefferreeks Spinners.
Ook te sien is Carel Nel, wat verskyn het in die HBO-reeks Raised by Wolves, en wat reeds voorheen met Bouwer as deel van Gaia se rolverdeling gewerk het.
Die storie
Niggies begin met die dubbele ontvoering en moorde van Issie Fourie en Petro Nel in Odendaalsrus in 1966. Die reeks strek egter oor die 1960’s en 1980’s met die gebeure wat in Odendaalsrus, Allanridge en Kroonstad in die noordoostelike Vrystaat, ’n erg konserwatiewe deel van ’n konserwatiewe land (veral gegewe die tydstip en breër sosio-politiese konteks), afspeel.
Niggies is vervaardig deur Wolflight Films, met Roelof Storm (Kanarie, Poppie Nongena) as uitvoerende vervaardiger. Die bekroonde Saartjie Botha en Philip Rademeyer het die draaiboek geskryf.
“Hoewel die ontvoering en moorde destyds opslae gemaak het, het die besonderhede van die storie vergete geraak, behalwe natuurlik vir diegene wat direk deur die trauma geraak is,” verduidelik Bouwer. “Ons wou nie ou wonde oopkrap nie – maar eerder ondersoek wat werklik gebeur het, met ’n bietjie kreatiewe vryheid, en dit in die konteks van die moderne Suid-Afrika plaas, waar sulke misdade meer algemeen is as 60 jaar gelede.”
“Niggies is ’n rou ondersoek na verlies en hoe onverwerkte trauma gesinne kan vernietig,” sê M-Net se direkteur van Premium-kanale, Waldimar Pelser. “Dit is nie ’n sensasionele verhaal oor geweld nie; eerder ’n sensitiewe verkenning van hoe pyn hanteer en genesing gevind kan word in ’n plek waar hoop nie veronderstel is om te bestaan nie.”
Die reeks volg ook op die onlangse suksesse van kykNET-dramas soos Plan B, Spoorloos en Nêrens, Noord-Kaap Deel II.
