Niggies is gegrond op ware gebeurtenisse en vertel die verhaal van die twee twaalfjarige niggies, Issie Fourie en Petro Nel, wat in 1966 in die rustige dorpie Odendaalsrus in die Vrystaat ontvoer en vermoor is. Issie se broer, André, sweer daarna om alles in die stryd te werp om die skuldige aan die pen te laat ry – ’n veldtog wat sowat 20 jaar sou neem. Niggies begin dus in 1966, maar die reeks strek oor die 1960’s en 1980’s.
Die reeks se regie is deur die veelbekroonde Jaco Bouwer, bekend vir sy grensverskuiwende teaterwerk, asook flieks soos Gaia en die internasionale trefferreeks Spinners. Niggies is vervaardig deur Wolflight Films, met Roelof Storm (Kanarie, Poppie Nongena) as uitvoerende vervaardiger. Die bekroonde Saartjie Botha en Philip Rademeyer het die draaiboek geskryf.
Wie’s wie in Niggies?
Beer Adriaanse, bekend vir flieks soos Wonderlus en Kanarie, asook reekse soos Hotel, vertolk die rol van die ouer André. Die talentvolle nuweling Janru Steenkamp speel die jong André.
Carel Nel (Koek, Spinners) is kaptein At van Wyk wat die ondersoek lei. Tinarie van Wyk Loots (Dwaalster, Fynskrif) en Jacques Bessenger (Koek, Een keer om die son) speel Issie (Lane Vertue) se ouers, Marie en Dries Fourie.
Neels Clasen (Getroud met rugby, Legacy) en Erica Wessels (Dwaalster, Donkerbos) is Petro (Izebella Louw) se ouers, Henning en Ousus. Petro se ouer suster, Henda, word as 17-jarige deur Anja Taljaard (Juffrou X, Een keer om die son) vertolk. As 35-jarige word sy deur Cintaine Schutte (Dinge van ’n kind, Wyfie) gespeel.
Albert Pretorius (Donkerbos, Nêrens, Noord-Kaap,) en Roeline Daneel (Fynskrif, Spooksoekers) is Gustaff en Maks Fouché – familie van die slagoffers.
Carel Nel. Foto: Verskaf
En nog…
Ander spelers sluit in: Kristen Raath, Jana Kruger, Liam Bosman, Wessel Pretorius, Daneel van der Walt, Stian Bam, Ludwig Binge, Mbulelo Grootboom, Neels van Jaarsveld, Melissa Myburgh, Deon Lotz en Michele Burgers.
Niggies begin Dinsdag, 25 Maart om 20:00 op kykNET en DStv Stream (kanaal 144). Episodes sal ook ná uitsending op Catch Up beskikbaar wees.
