In Klein Paradys gaan ses mededingende spanne wat uit twee persone bestaan wat mekaar reeds ken, elk ’n mikro-woning opknap en stileer in ’n poging om R1 miljoen te wen. Die mikro-wonings wat vir die reeks omskep word, moet vyfster-akkommodasie aan voornemende gaste bied.
Robbie, wat sy radioloopbaan by Tuks FM aan die Universiteit van Pretoria begin het, het al ’n draai agter die mikrofoon by radiostasies soos 5FM, Jacaranda FM en RSG gemaak. Op TV was hy lank een van die aanbieders van Bravo! op kykNET. Robbie is ook ’n restaurant- en kroegeienaar, doen eiendomsontwikkeling en werk steeds as seremoniemeester.
As aanbieder van Klein Paradys gaan Robbie daarvoor verantwoordelik wees om die kykers op hoogte te hou, die deelnemers leiding gee en help om die beoordelaars se kritiek te fasiliteer.
“Toe ek gevra is om die aanbieder te wees en gehoor het waaroor dit gaan, was die besluit om ja te sê baie maklik. Ek hou van die konsep, en dis ’n voorreg om saam met die span van AfrOkaans, wat die reeks vervaardig, te werk,” sê Robbie.
“Hierdie reeks gaan ’n heerlike uitdaging vir die deelnemers wees.”
In Klein Paradys gaan die span wen wat die indrukwekkendste, mooiste en mees praktiese mikro-woning kan inrig.
Daar is nog tyd om jou naam in die hoed te gooi – inskrywings sluit op 29 Februarie 2024. Om jou span in te skryf, kliek hier.
Die reeks sal in die Wes-Kaap verfilm word en na verwagting laat-2024 op kykNET (DStv-kanaal 144) uitgesaai word. Dit sal ook op DStv Stream en DStv Catch Up beskikbaar wees.
