Vanjaar se oes van Boer soek ’n Vrou-deelnemers se ouderdomme wissel tussen 23 en 40, en die boere verteenwoordig sewe provinsies. Daar is ook twee vroue-boere wat deel van die groep uitmaak. Maar watter vyf boere gaan die meeste briewe ontvang? En gaan hul soeke na die liefde vrugte werp?
Hier is jou handige kykgids vir die nuwe seisoen.
Donderdag, 18 Julie
Episode 1: Marciel ontmoet die tien boere
Tien enkellopende boere soek pasmaats! Dié welbekende realiteitsreeks, aangebied deur Marciel Hopkins (vir ’n laaste keer!), volg tien boere se soeke na die liefde.
Donderdag, 25 Julie
Episode 2: Die briewe
Marciel val weer in die pad om die tien boere se briewe af te lewer. Binne 24 uur moet die vyf boere met die meeste briewe tien pasmaats kies om in die Kaap te ontmoet.
Donderdag, 1 Augustus
Episode 3: Blitsafsprake
Van reg oor die land kom die pasmaats bymekaar vir ’n kort, maar kragtige, kennismaking met die boer van hul keuse. Elkeen kry presies vyf minute om met hul boer te gesels, en daarna word vyf gekies.
Donderdag, 8 Augustus
Episode 4: Groepafsprake
Vandag kry ons boere ’n bietjie meer tyd om hul vyf pasmaats beter te leer ken. Elke boer moet drie pasmaats kies wat op die plaas vir ’n week gaan kuier. En wie weet… Dalk is een van hulle “Die Een”.
Donderdag, 15 Augustus
Episode 5: Plaasbesoek
Die pasmaats arriveer op die plase. Hulle gaan vir ’n week lank saam met die boer woon en werk, en kyk of liefde wel tussen een van die paartjies kan blom.
Donderdag, 22 Augustus
Episode 6: Drie kuiergaste op die plaas
Die boere neem hulle pasmaats op ’n avontuur weg van die plaas af om te kyk of verhoudings kan groei. En dan vang verassende nuus die boere onkant.
Donderdag, 29 Augustus
Episode 7: Dames besoek die dorp – deel een
Marciel stuur die pasmaats op hulle eie avontuur terwyl die boere oor die afgelope paar dae besin, want binnekort moet daar moeilike keuses gemaak word.
Donderdag, 5 September
Episode 8: Dames besoek die dorp – deel twee (en uitstem)
Ná ’n paar dae op die plaas moet een van die drie pasmaats huistoe gaan. Gemoedere loop hoog as sekere waarhede ontbloot word. Wie gaan die boer vra om te bly?
Donderdag, 12 September
Episode 9: Twee kuiergaste bly oor, en die familiebraai
Daar is nou net twee pasmaats op die plaas oor. Die boere nooi ook vriende en familie oor vir ’n braai sodat hulle die pasmaats kan ontmoet en hul opinie kan vorm.
Donderdag, 19 September
Episode 10: Alleentyd
Dit is die laaste voldag op die plaas. Die spanning loop hoog, want elke boer moet binnekort weer ’n keuse maak. Almal kry tyd om individueel met mekaar te gesels.
Donderdag, 26 September
Episode 11: Die finale keuse
Dis tyd vir die boer om te besluit, maar is beide pasmaats nog gretig om die boer se vrou te word? Vandag kies die boer die pasmaat wat moontlik die liefde van hul lewe kan wees.
Donderdag, 3 Oktober
Episode 12: Die skoonfamilie
Dit is tyd vir die boere om hul gekose vroue se familie en vriende te ontmoet. As die kennismaking met die skoonfamilie goed afloop, is daar dalk hoop vir ’n gelukkige toekoms saam…
Donderdag, 10 Oktober
Episode 13: Die vakansie
Die boere en hul pasmaats gaan hou vakansie. Tydens die vakansie kry die boere en hul pasmaats kans om mekaar goed te leer ken – weg van die plaas, weg van familie en vriende.
Donderdag, 17 Oktober
Episode 14: Die reünie
Al tien boere kom vir ’n eerste – en ook laaste keer – bymekaar. Ons vind uit wie van ons tien boere liefde aan die einde van die reeks gevind het.
Boer soek ’n vrou begin op Donderdag 18 Julie om 20:00 op kykNET (kanaal 144 op DStv) en DStv Stream. Ook ná uitsending op Catch Up beskikbaar.
