Vier jaar gelede het Vanes-Mari du Toit en Hamilton Wessels vir kykers in die reeks In Japan, ja! al om Japan saamgesleep toe die Rugbywêreldbekertoernooi daar plaasgevind het. Dié keer is Frankryk die gasheerland en Vanes-Mari en Hammie, soos sy vriende hom ken, neem dan eersdags vir kykers op ’n Afri-Franse avontuur met hul nuwe reeks, In Frans, ja!.
Soos wat ons reeds op Erns Grundlingh se reisprogram, Elders: Frankryk, gesien het, is daar baie stories om oor dié Europese land te vertel. Dink maar net aan die land se wêreldberoemde wyne en fynproewerplesiere, die modes, die kunsskatte en van die beste strande op aarde.
Vanes-Mari sê in ’n mediaverklaring dat hoewel Japan “fun” was, gaan Frankryk “funtastic” wees: “Ons wil sien wat die land van die Hane bied.”
Die reeks sal die Bokke van Marseille na Bordeaux volg met Vanes-Mari en Hammie wat langs die pad dinge doen soos wynproe en muurkuns besigtig. Hulle gaan ook saam met die oud-Bok Flip van der Merwe in Biarritz die Bokke se wedstryd teen Ierland kyk. Dít word gevolg deur ’n rugby-bootreis met Suid-Afrikaners. Hopelik sal Hammie en Vanes-Mari dan in Parys sien hoe die Bokke die Webb Ellis-trofee lig…
In Frans, ja! word vanaf 9 September 2023 elke Saterdagaand om 19:30 op kykNET (DStv-kanaal 144) uitgesaai. Die reeks sal ook op CatchUp en DStv Stream beskikbaar wees.
