Kykers ontmoet vandeesweek nog ’n nuwe karakter in sepieland – dié keer is dit die akteur Chumani Pan as die Xhosa-prins Siseko Bhonga op Diepe Waters. Kykers sal Chumani onthou vir sy vertolking van Lux in Projek Dina.
Hoe pas die prins in die storie in?
Siseko Bhonga is die seun van Koning Mzukisi Bhonga en ’n Xhosa-prins wat in tradisie grootgemaak is, maar ook deur die moderne wêreld beïnvloed is. Al is hy selfversekerd, intelligent en empaties, is Siseko huiwerig om die lot wat sy koninklike bloed van hom vereis, ten volle te aanvaar. Hy worstel dus met die verwagtinge van hom as erfgenaam en die lewe wat hy werklik begeer.
As hy sy karakter in drie woorde moet beskryf, sê Chumani: “omgee, liefdevol en saggeaard.” Hy vertel ook dat sy voorbereiding vir die rol navorsing oor koninklike pligte en protokol ingesluit het — veral binne die Xhosa-monargie — ’n wêreld waarmee hy reeds ietwat vertroud is.
Chumani vertel hy was uit sy nate om deel van die Diepe Waters-rolverdeling te wees. “Ek was baie opgewonde toe ek die rol gekry het. Ek was lanklaas in ’n kykNET-reeks, en ek het die kanaal en sy kykers baie gemis. Ek het nog nooit die rol van ’n prins vertolk nie, so hierdie rol voel vars en spesiaal vir my. Siseko is ’n respekvolle en nederige man — iemand met sterk waardes en ’n diep hart. Dis ’n eer om in sy skoene te stap.”
Maar bo en behalwe tradisie en plig, bring Siseko ook ’n ligte, speelse sjarme na die skerm, meen Chumani. “Hy het ook ’n komiese kant,” sê hy. “Dit was lekker om dit te verken, veral omdat ek nie gereeld rolle kry waar ek snaaks kan wees nie.”
Chumani beskryf die Diepe Waters-rolverdeling en -span as “ ’n werklik talentvolle en vriendelike groep,” met spesiale lof vir aktrise Tracey-Lee Oliver (Pam), met wie hy dadelik gekliek het sedert hul eerste oudisie saam.
Uiteindelik hoop hy dat kykers iets van liefde en bestemming uit Siseko se storie sal neem. “Siseko se storie herinner ons daaraan dat liefde jou kan vind wanneer jy dit die minste verwag. En op die mees onverwagte plekke en tye.”
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
