Toe Christia Visser se Diepe Waters-karakter, Candy, ’n paar maande gelede op die toneel verskyn het, het sy saam met haar kêrel, Bert, vir Rossouw (Altus Theart) ontvoer en vir ’n losprys aangehou. Rossouw dra steeds die letsels van daardie traumatiese ervaring.
Vanaand (Donderdag, 21 November 2024) maak sy onverwags weer haar opwagting in Diepe Waters. En dié keer stel sy haarself as Alisa – haar regte naam – voor. Maar Alisa steek steeds haar verlede weg en begin ’n vriendskap met Sanet (Nadia Valvekens). Die twee vroue raak vinnig goeie vriendinne, met Sanet wat salig onbewus is van Alisa se betrokkenheid by Rossouw se traumatiese verlede.
Christia deel dat Alisa nou ’n nuwe koers inslaan: “Ja, sy keer terug, maar wat haar aanbetref, tree sy vorentoe. Sy raak ontslae van al die gimmicks en is op ’n herontdekkingsreis.”
Hoe gaan kykers op hierdie nuwe kant van Candy reageer? “Ek hoop dat hulle sien hoe hard sy probeer… Ek dink daar gaan baie onsekerheid wees.”
Vir Christia was dit ’n heerlike ervaring om weer op stel te wees: “Lieflik soos altyd. Dis ’n lekker span en die storielyn beweeg vinnig, so dit hou mens op jou tone.”
Wat kan kykers verwag van die nuwe storielyn? “Hulle kan uitsien na ’n eerlike, steeds feilbare Candy, en al die drama wat daarmee saamgaan.”
Maar hoe gaan Rossouw reageer as hy die vrou sien wat verantwoordelik was vir sy grootste trauma?
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
