Hoe voel Aniska self oor die reeks en die pad vorentoe? Sy vertel vir terloops meer oor wat tot haar skokbesluit gelei het en gee ook raad aan diegene wat in die toekoms vir Boer soek ’n vrou wil inskryf.
Dit neem waagmoed om ’n brief aan ’n totale vreemdeling te skryf. Hoe het jy jou gedagtes georden voordat jou brief aan boer Niel in die posbus beland het?
“Ek het lank gedink voordat ek pen op papier gesit het. My hoofdoel was om baie doelbewus met my woorde te wees. Ek het besef dat boere baie besige mense is en daarom wou ek nie Niel se tyd mors met ’n lang brief nie.
“Ek het besluit om my brief kort en kragtig te hou sodat Niel vinnig ’n idee kon kry van wie ek is. Dit was vir my belangrik om nie net my persoonlikheid en belangstellings oor te dra nie, maar ook om iets van my drome en toekomsvisie met hom te deel. So kon Niel dadelik sien of ons waardes en aspirasies by mekaar pas.
“Ek het my brief op die laaste oomblik ingestuur omdat ek seker wou wees dat my bedoelings reg en opreg is. Ek wou net die regte boodskap oordra en het dit nie ligtelik opgeneem nie.
“Dit het vir my saak gemaak om my hart op die regte plek te hê voordat ek daardie stap geneem het.”
Hoekom boer Niel?
“Eerstens is Niel ’n baie aantreklike man wat beslis my aandag getrek het. Maar wat vir my werklik belangrik is, is die eienskappe wat hy genoem het – waarvan daar verskeie is wat ek graag in my toekomstige man wil hê.
“Hy lyk ook soos ’n rustige mens wat terselfdertyd avontuurlustig is, en dis presies hoe ek hom opgesom het. Dit het gevoel asof ons moontlik dieselfde waardes deel.”
Met jul ontmoeting in Oudtshoorn was dit duidelik dat daar ’n vonkie tussen jou en boer Niel was. Maar toe kies jy sélf om huis toe te gaan. Wat het werklik agter jou besluit gesteek?
“Ek het nie gedink dié vraag gaan my so raak nie, maar tog doen dit juis omdat ek dink daar was werklik ’n konneksie tussen ons. Ek dink ons almal kon dit sien.
“Het ek gedink dit gaan so uitdraai? Glad nie, maar nadat ek gesien het wat ek gesien het, en toe “daai stemmetjies” – wat eintlik die Heilige Gees verteenwoordig, soos my pa sal sê – begin praat het . . . toe weet ek.
“Tydens die middag van aktiwiteite het ek en Niel so eenkant gesit en gesels terwyl die ander twee dames in onderhoude was. Toe een van hulle van agter af na ons stap en ek die manier sien hoe sy oë begin blink het, toe weet ek.
“Daar het ek reeds my besluit gemaak en geweet ek gaan dalk al daardie aand huis toe. Boer soek ’n vrou het ons met nog ’n ekstra dag verras, maar ongelukkig het niks verander nie.”
Dit is ook belangrik om hierdie ervaring ten volle te geniet en oop te wees vir wat ook al mag kom. Die proses gaan nie net oor die moontlikheid om iemand spesiaal te ontmoet nie, maar ook oor selfontdekking en persoonlike groei.
Aniska Moller
Wat is die beste raad wat jy kan deel aan diegene wat vir die volgende seisoen se boere wil skryf?
“Wees net jouself! Niemand ken jou beter as jyself nie, en daar is soveel faktore wat ’n rol speel in die hele proses. As jy probeer voorgee om iemand anders te wees, beroof jy jouself van ’n geleentheid vir ongelooflike groei. Ek het as ’n vrou uitgestap wat soveel sterker is en baie van myself geleer het.
“Jy gaan nie daardie waardevolle lesse leer as jy nie jouself is nie – maak nie saak hoe ongemaklik of hoe droog jou grappies is nie. Dis jou hart wat tel, en dit gaan natuurlik uitstraal as jy opreg en getrou aan jouself bly.
“Dit is ook belangrik om hierdie ervaring ten volle te geniet en oop te wees vir wat ook al mag kom. Die proses gaan nie net oor die moontlikheid om iemand spesiaal te ontmoet nie, maar ook oor selfontdekking en persoonlike groei.
“Wees geduldig met jouself, eerlik oor jou gevoelens, en moenie bang wees om kwesbaar te wees nie. Dit is juis in daardie momente van kwesbaarheid dat jy jou ware self en jou ware gevoelens ontdek.
“Onthou ook, as vrou het jy net soveel ’n keuse soos die boer. Jou gevoelens, jou instinkte, en jou besluit is net so belangrik. Hierdie reis is oor wedersydse keuses en respek, en dis iets wat jy ten volle moet omhels.”
Boer soek ’n vrou (S16) word Donderdae om 20:00 op kykNET en DStv Stream (DStv-kanaal 144) uitgesaai. Episodes is ook op Catch Up ná uitsending beskikbaar. Ons recaps word weekliks ná afloop van die program, omstreeks 21:00, gepubliseer.
