Menu terloops
In Sepies [12 Nov 2023]

Sepievoorskou: Krisisse en kinkels in ‘Suidooster’, ‘Binnelanders’ en ‘Diepe Waters’


Sepieland se karakters veg vir oorlewing hierdie week met die een krisis ná die ander wat hulle soos ’n tsunami tref. Mense gaan slim – en vinnige – besluite moet neem. Die liefde kom ook nie sonder sy eie kinkels nie. Hier is waarna jy hierdie week (13 tot 17 November) op ‘Diepe Waters’, ‘Binnelanders’ en ‘Suidooster’ kan uitsien.

Deur Tarren-Lee Habelgaarn
Sepievoorskou: Krisisse en kinkels in ‘Suidooster’, ‘Binnelanders’ en ‘Diepe Waters’

Ons het die inside scoop oor die grootste storielyne in Suidooster, Binnelanders, en Diepe Waters hierdie week. (Dié sepievoorskou het geen spoilers nie!)

Diepe Waters  

Ná die amok wat Riaan (Ryno Hattingh) gesaai het, sukkel Pam (Tracey-Lee Olivier) nog met die nagevolge van sy bose planne teen haar ma en pa.  

Zelda (Sandi Schultz) kan maar ’n miljoen kanse in die lewe kry, maar sy sal nooit luister nie! Sy is wéér met slinkse planne besig en hierdie keer lei dit tot verrassende verwikkelinge… Maar selfs dít blaas in haar gesig op. 

Gys (Justin Strydom) is in ’n persoonlike geveg tussen sy hart en kop gewikkel. Sy hart wil een ding hê, maar logika en feite oortuig hom dat dit nie die regte besluit is nie. 

Intussen gaan Charity (Dané de Waal) en Johan (Liam Bosman) moeilike besluite van hul eie moet neem en vir hul verhouding veg. Hulle sal moet besluit of hulle meer van mekaar of goue medaljes hou, want in die Swartmarlyne se wêreld kan jy mos nie albei hê nie. 

Jacques (Werner Coetser) is verpletterd nadat hy vir Meghan (Lea Vivier) en hul baba verloor het. Hy is besig om uit te rafel en is ’n groot gevaar vir homself.  

Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar. 

Binnelanders

Tracy (Melinda Viljoen) is siek van bekommernis nadat sy vir dae nie van Tertius (Reynardt Hugo) hoor nie. Sy het goeie rede, want nadat ’n bekende gesig in die middel van nêrens opdaag, het sy humanitêre sending skielik in ’n geveg tussen lewe en dood ontaard. 

Febé (Claudia Jones) wil nie erken dat haar hart nog sterk vir Uys (Gerald Steyn) klop nie. Sy neem eerder haar frustrasies op arme Karen (Luandri Reynders) uit en sien spoke wat daar nie is nie. 

Steve (Clint Brink) moet besluit tussen ’n moontlike kind of sy verhouding en dit is  nie iets waaroor hy nou wil dink nie. Maar wat beteken dit vir sy gelukkige familie se toekoms? 

Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.

Suidooster

Nazeem (Irvine van der Merwe) gee verniet voor dat sy hart van klip gemaak is. Wanneer iemand vir wie jy lief is in gevaar is, sal jy selfs met jou grootste vyand werk om hulle te red. 

Lee-Ann (Portia Joel) en Ty (Maurice Paige) is uiteindelik weer in ’n goeie plek, maar hoe lank gaan dit hou, want Lee-Ann lyk asof sy iets op die hart het?

Veroné (Zandélle Meyer) sukkel om te besluit of sy haar hele lewe vir Justin (Eden Classens) moet verander, want ons almal weet hy is een groot ladies man. Maar Justin glo sy is die een. 

Kaashifa (Jawaahier Petersen) en die res van Ruiterbosch wag vir nuus nadat Rhafiek (Irshaad Ally) en Mymoena (Jill Levenberg) saam met ’n paar ander Ruiterbosch-inwoners spoorloos verdwyn. 

Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

kykNET se nuwe mini-dramareeks is ’n verhaal van verlies, vergifnis en hoop

Twee mans se paaie kruis in ’n ondersteuningsgroep ná die verlies van geliefdes. kykNET se 'Elke donker wolk' verken hoe ’n onverwagse vriendskap ruimte skep vir vergifnis, genesing en hoop.

Meer

Rubriek: Gaan griffel in Ouma se resepteboek! ‘Kokkedoor: Klassiek’ is terug! 

Ná ’n voorskou van die eerste episode laat 'Kokkedoor: Klassiek' vir Marteni Burger verlang na haar ouma se resepte én sien sy uit na nog skeppies nostalgie - met ’n knippie kombuisdrama en verrassende kinkels daarby.

Meer

Van die veld tot die kelder – kuier dié November saam met VIA

Van wildplase en wynkelders tot huise met karakter: VIA se November-aanbod beloof vars ontdekkings. Kuier saam met Shari Kennedy, Leandie du Randt, Frank Rautenbach en JP Quickelberge, en leer ken die mense, stories en plekke wat Suid-Afrika so besonders maak.

Meer

Chanél Muller oor ‘Sy, die meeue en die Heilige Gees’

"Enige persoon se geloofsreis is ’n baie persoonlike reis, en dit gebeur alles baie innerlik", sê Chanel Muller, die skrywer, regisseur en vervaardiger van die kykNET-reeks 'Sy, die meeue en die Heilige Gees'.

Meer
Sien alle opsies