Pas nadat ’n Afrikaanse weergawe van The Office tydens vanjaar se Silwerskermfees aangekondig is, het die BBC se plaaslike produksiemaatskappy, Rapid Blue, en Primedia Studios ook nuus gehad om te deel: ’n ooreenkoms is gesluit om die übergewilde realiteitsreeks, Dancing with the Stars, se plaaslike weergawe te laat herleef.
Rapid Blue het ook die vorige plaaslike aflewering van Dancing with the Stars SA, wat vir die eerste keer in 2018 aangebied is, vervaardig. Die destydse aanbieders was die akteurs Chris Jaftha en die radio- en TV-aanbieder Tracey Lange.
Die Dancing with the Stars-formaat het al meer as 130 internasionale toekennings gewen en blyk steeds een van die gewildste en mees gekykte reekse onder beide Amerikaanse en Britse gehore te wees. In Brittanje vier dié bekroonde program vanjaar sy 20ste bestaansjaar.
Glo gaan die nuwe weergawe ’n keur van die land se sogenaamde “A-lys beroemdes” insluit. Dié celebs, sowel as die beoordelaars en professionele dansers wat saam met die beroemdes deelneem, sal later bekendgemaak word.
