Ons het Zandélle Meyer in haar eerste TV-rol as Riekie in Binnelanders ontmoet, voordat sy ook ’n draai in Ruiterbosch in Suidooster gemaak het. Boonop het sy vroeër vanjaar haar skryf- en regiedebuut by die Silwerskermfees met die kortprent O, Griet! Sy’s droog gemaak. Nou is sy te sien op Showmax in die universiteitstelenovela, Wyfie.
Van kyker na karakter
Zandélle vertel dat sy ’n kranige kyker was voordat sy as Jessie by die Wyfie-rolverdeling aangesluit het en dat dit uit die staanspoor vir haar as ’n besonderse stukkie popkultuur uitgestaan het. “As ek terugdink, was daar nooit iets (op plaaslike TV) wat my universiteitsjare weerspieël het nie. Baie goed waaroor ek skaam was om oor te praat, kon ek nou op Wyfie kyk en daarmee vereenselwig. Daar is baie goed waarmee ’n mens sukkel op universiteit in terme van jou geloof, jou seksualiteit, jou hunkering na aanvaarding, jou identiteit as mens. En om dit in Afrikaans te sien, was vir my wonderlik,” sê sy.
Hoewel haar oudisie vir die rol van Jessie nie haar eerste vir dié reeks was nie, het sy goed gevoel oor haar kanse om dié naïewe eerstejaar in die Pantera-koshuis te vertolk, juis omdat sy dikwels rolle as jonger karakters kry… Ten spyte daarvan dat sy “nou al 24!” is, vertel sy laggend.
Jessie se naïewiteit, meen Zandélle, versinnebeeld die eerstejaar op universiteit. “Dan word sy in Pantera geplaas, en een van Pantera se tradisies is dat jy ’n koshuisma kry. Só word sy dan die koshuisdogter van al die Grot-otters. In haar oë is dit ’n wen-wen: vier vir die prys van een. Al die Grot-otters is besorgd oor haar, maar dis veral Mia (Mienke Ehlers) en Shay (Beáta Bena Green) wat haar onder hul vlerk neem. Mia word vir haar ’n mentor. Dis nogal snaaks, want hulle is twee heeltemal verskillende mense. Sy noem haar Mamma Mia,” vertel sy.
Haar karakter se ervarings dui ook op ’n gedeelde ervaring van ons menslike natuur – die soeke na aanvaarding. “Omdat sy nog so nuut op kampus is en alles nog baie vreemd is, soek sy daai gevoel van aanvaarding. Deel daarvan is hoe sy die girl code tussen die Otters probeer verstaan. Sy is eintlik die eerste een wat dít opmerk, wat sien dat daar sekere goed is wat hulle vir mekaar doen. Dat hulle enigiets vir mekaar doen. En sy probeer dan dieselfde doen, maar haar naïewiteit kry haar ’n bietjie in die moeilikheid. Meeste van haar storielyne is ietwat chaoties juis omdat sy so naïef is en blindelings goed aanpak sonder om eers aan die gevolge te dink,” verduidelik Zandélle.
Leerskool
Selfs al is sy lankal nie meer ’n naïewe tiener nie, het sy beslis dele van haarself in Jessie raakgesien, sê Zandélle. “Ek het drama op Stellenbosch geswot en ek kon definitief dele van myself in Jessie raaksien, veral hoe ek in my eerste jaar was. Ek was ook naïef. Ek het vanaf Potchefstroom na Stellenbosch gekom, so van ’n klein dorpie en nie veel geweet nie. Jy voel ook bietjie soos ’n buitestaander. Later eers besef jy hoe koshuis is en hoe dit jou binne nooi; jy vorm deel van ’n susterskap.”
En, verklap sy laggend, soos Jessie bevind sy haarself ook partykeer in situasies waarin sy nie wou wees nie.
Haar ervaring op die stel van Wyfie was nie net ’n tydperk van groei en ontwikkeling wat haar toneelspel en haar selfvertroue betref nie, maar ook ’n leerskool ten opsigte van hoe storievertellers in hul benadering en aanslag verskil.
“Ek het meestal met Johan (Cronjé), Emilie (Badenhorst) en Ben (Heyns) as die regisseurs gewerk. Hulle het almal baie kalm energie wat baie gehelp het. Dit was ook die eerste keer hierdie jaar wat ek weer voor die kamera was en hulle verstaan die senuagtigheid wat jy het en help om jou kalm te maak.
“Ek het meer ervaring met sepies en sepies is baie soos ’n worsmasjien. Maar met Wyfie was daar meer tyd en meer ruimte om die karakter te verken en te speel. Meer tyd vir kreatiewe vryheid. Emilie het altyd gesê, ‘Ons doen ’n take vir Justin… Just in case…’ So daar is tyd vir sulke tipe skote waar jy net kan speel. En dan kom daar soms mooi goed uit. Hulle het ook ’n baie realistiese aanslag en ’n organiese manier van speel en skep. Partykeer het ek gedink ek het ’n fout in die toneel gemaak, soos om per ongeluk ’n boek te laat val, en dan is Johan soos, ‘Nee, dis eintlik cool. Dít is hoe goed werklik gebeur.'”
Selfvertroue op stel
Haar grootste les was egter om haarself meer te vertrou, sê sy beslis. “Op Wyfie, praat die aktrises met die regisseur en sê byvoorbeeld, ‘Ek stem nie saam dat my karakter hierdie sal sê nie. Kan ek dit verander?’
“Voorheen kon ek nie so openlik met ’n regisseur praat nie, maar nou het ek meer selfvertroue. Ek voel baie meer gemaklik om ’n gesprek met die regisseur te hê as die toneel nie reg voel nie. Net ná Wyfie het ek weer op Binnelanders gaan skiet en dié ervaring was reeds vir my anders. Ek weet met ’n sepie het ’n mens nie baie tyd nie, maar ek voel nou baie meer gemaklik om ’n gesprek met die regisseur te hê,” sê sy.
Binge al 45 episodes van Wyfie S1, met nuwe episodes van S2 elke Dinsdag tot 7 Januarie 2025 op Showmax.
