Wat om te kyk op TV en aanlyn te stroom hierdie week – hier is ons top-keuses vir 2 tot 8 Oktober.
Neem asseblief kennis dat datums en titels moontlik kan verander.
Taktiek S1
Taktiek begin op Maandag 2 Oktober om 20:00 op kykNET (DStv-kanaal 144) en DStv Stream. Ook op Catch Up ná uitsending beskikbaar.
Iewers in Suid-Afrika is daar ’n dorpie genaamd Schusterton. En soos enige ander dorpie in die land, het Schusterton ’n sekuriteitsmaatskappy wat na die veiligheid van die inwoners omsien – Taktiek.
Daar is net twee probleme… Eerstens is Schusterton die veiligste dorp in die land waar daar min tot niks aangaan nie. Tweedens is die grootbaas tronk toe gestuur vir allerlei ongerymdhede, en is die sekuriteitsmaatskappy is nou in die hande van sy dogter.
Taktiek, vervaardig deur Nagvlug Films wat ook vir die trefferreeks Hotel verantwoordelik was, spog met onder andere, Bennie Fourie, Schalk Bezuidenhout, Marion Holm, Mandri Sutherland en Keeno-Lee Hector in die rolverdeling. Lees ook Riëtte van der Wat se resensie oor dié heerlik-snaaks komedie.
Beckham
Vanaf 4 Oktober 2023 op Netflix.
David Beckham is sekerlik een van die bekendste sportsterre ter wêreld én van alle tye. In Netflix se Beckham, ’n vierdelige dokkiereeks, span die Oscar-wenners Fisher Stevens en John Battsek kragte saam om dan dié sokkerspeler se verhaal te vertel.
Stevens, bekend vir The Cove, en Battsek, bekend vir onder meer Searching for Sugar Man, is hier ongeëwenaarde toegang tot Beckham, sy vrou, Victoria, familie, vriende en spanmaats gegee. Dis die samekoms van al dié stemme wat van Beckham ’n intieme vertelling maak; ’n gedetailleerde portret van dié speler en mens. Dit plaas sy opgang vanaf nederige, werkersklas-wortels na ’n wêreldwye sokkerfenomeen en ikoon ook in konteks van moderne celeb-kultuur wat veral fel op sokkerspelers in Engeland val.
Dié storie is ’n dikwels verrassende tuimeltreinrit.
Diepe Waters S1
Vanaf 5 Oktober 2023 op Showmax.
Terwyl dié telenovela se tweede seisoen ook vandeesweek op kykNET afskop, kan laatkommers die eerste seisoen op Showmax kafdraf.
Die storie draai om die Swarts-gesin, hul swemklub, en die baie, baie drama wat bo en onder die water afspeel. Die eerste episode is in Oktober verlede jaar uitgesaai en sedertdien het die tonge nooit ophou klap nie. Van die skok toe Gys (Justin Strydom) sy nuwe (veel jonger) vrou, Meghan (Lea Vivier) aan sy familie voorgestel het, tot die onthulling dat einste Meghan toe heeltyd kop in een mus met Gys se aartsvyand, Zelda (Sandi Schultz) was. En dít was maar die minste van die skandes en skandale…
Ook in die (baie groot) rolverdeling tel die sepieveterane Nadia Valvekens en Werner Coetser, en nuwelinge Daniélle Swanepoel en Liam Bosman.
Fair Play
Vanaf 6 Oktober 2023 op Netflix.
Bridgerton se Phoebe Dynevor vertolk een van die hoofrolle in dié riller wat draai om ’n onverwagte werksbevordering wat ’n jong paartjie se verhouding ’n helse, sinistêre, knou toedien en dreig om veel meer as hul onlangse verlowing te laat ontrafel.
Ook in die rolverdeling tel Alden Ehrenreich, Eddie Marsan, Rich Sommer en Sebastian De Souza.
Love to Love You, Donna Summer
Vanaf 4 Oktober 2023 op Showmax.
Love to Love You, Donna Summer is ’n diep en persoonlike huldeblyk aan die geliefde “Queen of Disco”. Die legendariese musiekvervaardiger Quincy Jones het nie verniet dié trefferskepper se stem as die “hartklop en klankbaar van ’n generasie” verklaar nie – daarvan getuig haar etlike Grammy-toekennings en ikoniese hits soos “Hot Stuff”, “I Feel Love”, en “She Works Hard For the Money”.
Dié dokumentêre prent, waarvan haar dogter Brooklyn Sudano ’n mederegisseur is, geen ’n intieme blik op die kunstenaar se lewe op en agter die verhoog en sluit ook eksklusiewe home videos en onderhoude met haar naastes in soos haar reis van die avant garde-musiektoneel in Duitsland na die skitterligte van New York se dansklub blootgelê word.
Die prent het ’n punt van 81% op die resensiewebwerf Rotten Tomatoes.
American Auto S1
Vanaf 2 Oktober 2023 op Showmax beskikbaar.
Dié komediereeks, geskep deur Superstore en The Office se Justin Spitzer, speel af in die kantore van Payne Motors, ’n sukkelende motorhandelaar in Detroit. Hier verkeer die corporate execs by ’n kruispad: of hulle verander met die tye of hulle sluit hul deure. Gelukkig is daar ’n nuwe grootbaas wat hulle uit die penarie kan help… behalwe dat sy absoluut niks, maar niks oor karre weet nie.
American Auto het ’n punt van 100% op Rotten Tomatoes, met Globe and Mail wat dit beskryf as ’n “dolle satire oor corporate life… waar bestuurders daagliks wys dat hulle niks weet nie…”
Die rolverdeling sluit die skreeusnaakse Ana Gasteyer (Saturday Night Live), Jon Barinholtz (Superstore se Marcus) en Harriet Dyer (Colin From Accounts) in.
Ook nuut hierdie week:
Vanaf 2 Oktober 2023:
Koortjies Met Jonathan Rubain S4, Showmax
Anchorman: The Legend of Ron Burgundy, Showmax
Anchorman 2: The Legend Continues, Showmax
Dora and the Lost City of Gold, Showmax
Downsizing, Showmax
4X4 met Andre S2, weekliks om 21:30 op kykNET en DStv Stream (kanaal 144)
Billions S7, weekliks om 21:00 op M-Net en DStv Stream (kanaal 101)
Vanaf 3 Oktober 2023:
La’t Wiel S29, weekliks om 17:30 op kykNET en DStv Stream (kanaal 144)
Prontuit S10, weekliks om 21:00 op kykNET en DStv Stream (kanaal 144)
Vanaf 4 Oktober 2023:
Race to the Summit, Netflix
Vanaf 5 Oktober 2023:
Hannes aan Huis S9, weekliks om 21:00 op kykNET en DStv Stream (kanaal 144)
Crossword Mysteries: Abracadaver, Showmax
Hostile Territory, Showmax
Lake Placid, Showmax
Rocketman, Showmax
Tabaluga, Showmax
XXX: Return of Xander Cage, Showmax
Tad, the Lost Explorer and the Emerald Tablet, Showmax
La’t Wiel S28, Showmax
Everything Now, Netflix
Lupin S3, Netflix
Vanaf 6 Oktober 2023:
A Deadly Invitation, Netflix
Ballerina, Netflix
Desperately Seeking Soulmate: Escaping Twin Flames Universe, Prime Video
Ommieghellie S2, weeklikse episodes om 19:30 op kykNET&kie en DStv Stream (kanaal 145)
Vat jou goed en trek S10, weekliks om 17:30 op kykNET en DStv Stream (kanaal 144)
Vanaf 7 Oktober 2023:
Hier gaan ons alweer S22, weekliks om 18:00 op kykNET en DStv Stream (kanaal 144)
Vanaf 8 Oktober 2023:
Fiks of Niks S1, weekliks om 17:30 op kykNET en DStv Stream (kanaal 144)
KLOP! S6, weekliks om 18:00 op kykNET&kie en DStv Stream (kanaal 145)
