As jy van mediese dramas hou, is The Good Doctor ’n nommerpas toevoeging tot jou kyklys (nog voorstelle hier). Dit tiek al die boksies: hoë risiko mediese gevalle; noodgevalle wat mediese speurwerk verg; ongewone simptome en siektes; persoonlike dramas onder die dokters en verpleegters; romanse; verlowings; en, in die sesde seisoen, ’n troue vir die hoofkarakter, dr. Shaun Murphy.
Murphy, wat deur die akteur Freddie Highmore vertolk word, is ’n jong dokter met outisme wat aanvanklik gesukkel het om sy kollegas van sy buitengewone gawes te oortuig. Oor die loop van die eerste vyf seisoene het Murphy as dokter en as mens geblom. Soveel so dat hy en Lea (Paige Spara) verloof geraak het.
Met die aanvang van die sesde seisoen is Murphy en Lea se vreugde op hul troudag van korte duur. Die feesvieringe op die hospitaal se dak word kortgeknip as ’n twee van hul vriende en kollegas by die hospitaal aangeval word en ’n gyselaarsdrama ontstaan.
Die Amerikaanse reeks, wat gegrond is op ’n gelyknamige Koreaanse storie, is reeds vir ’n sewende seisoen hernu. Ook onder die rolverdeling tel Richard Schiff, Christina Chang, en Noah Galvin.
Vanaf Maandag, 10 Julie 2023, om 19:00 op M-Net (DStv-kanaal 101). Ook op Catch Up beskikbaar. Binge ook die eerste vier seisoene van die reeks op Netflix.
