Sy naam voorspel al klaar dat hierdie kalant dalk soos ’n cowboy van ouds dinge gaan omverwerp in Ruiterbosch. En dit is inderdaad so: Texas Kannemyer gaan groot drama en intriges in Suidooster veroorsaak met sy aankoms in dié Kaapse woonbuurt.
Al wat hy eintlik wil doen, is om sy lewe om te swaai en ’n verskil in die gemeenskap maak. Maar onheil wag op die horison nadat sy paaie met dié van die sluwe Nazeem (Irvine van der Merwe) kruis.
Hoe sal jy Texas beskryf, en hou jy van jou karakter?
“Hy is baie slim, baie slinks en beslis met ’n heuningkwas in die hand gebore. Hy smeer dit so maklik om almal se mond. Texas is nie net een-dimensioneel nie. Alhoewel hy die ou is wat Nazeem se planne moet uitvoer, is daar tye wanneer hy vir homself opstaan as hy dink Nazeem vat dinge nou te ver. Ja, tussen alles deur is Texas ook maar net mens, een met ’n mooi hart.”
Jy het in Getroud met Rugby ook ’n moeilikheidmaker gespeel. Is dit vir jou lekker om ’n skobbejak te wees en hoekom?
“Ek hou daarvan om die rol van enige karakter te vertolk, so lank as wat dit die doel van die storie op ’n eerbare wyse dien. Tog lyk dit asof die villain-tipe karakters sterkter tot my aangetrokke voel, want dit is die soort rolle waarvoor ek in die meeste gevalle ge-cast word.”
Wat geniet jy daarvan om in ’n sepie te speel?
“Dit is altyd lekker om in ’n sepie te speel, want dit leer en help jou om jou ander vaardighede as ’n vryskutakteur op te skerp. Soos byvoorbeeld om voor verskeie kameras op te tree. Dit is ook goed vir jou loopbaan omdat meer mense jou werk kan sien.”
Wat het vir jou uitgestaan van jou tyd op Suidooster?
“Die eenheid, liefde, omgee, menswees, respek tussen almal. En die feit dat dit soos een groot familie is . . . Dit het my laat tuis voel.
“Suidooster se karakters is sout van die aarde mense. Dit vertel eerlike stories oor alledaagse dinge waarmee die gewone ou op straat mee kan relate.”
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
