Sammy (Royston Stoffels) mag dalk oud wees, maar hy is beslis nie koud nie. Die man gedra hom glad soos Suidooster se grootse verliefde tiener. Mymoena (Jill Levenberg) se kos, tee en bank moet omtrent top class wees, as Sammy ná een aand se kuier in die Samsodien-huis vir Mymoena gevra het om te trou. Mymoena het gedink sy doen Sammy ’n guns om na hom te kyk nadat hy siek geword het, maar nou staan sy sommer op trou.
Terwyl een verhouding groei, val ’n ander uitmekaar. Ek het mos gesê Ty (Maurice Paige) neem ’n drastiese besluit, maar ek dink nie enigiemand het verwag dat hy soos mis voor die son gaan verdwyn en sy familie agterlaat nie. ’n Mens recover nie sommer ná so iets nie… Kom ons hoop Lee-Ann hou kop en dat sy nie al haar varkies verloor nie. Trauma laat ’n mens snaakse dinge doen, kyk net vir Zoë (Lauren Joseph).
Intussen beter Sanet (Nadia Valvekens) in Diepe Waters wakker pies eet, want ons het almal gesien wat haar engel-stiefdogter nou weer aangevang het. Sy wil nou wraggies vir mense laat dink Sanet het weer ’n drankprobleem! En met Miss Busybody Valencia (Vinette Ebrahim) wat voor in die koor staan vir skinder, gaan almal daardie leuen glo!
Die Galants is ewe uitgeslape en ek kan nie glo Rachel gooi haar seuns vir die Galant-wolwe nie. Kom ons hoop iemand in Arendsvlei kan daardie arme kinders red.
Binnelanders
Daar is niks wat seerder maak as verwerping nie. Veral as dit die liefde van jou lewe is! Louis (Germandt Geldenhuys) besef uiteindelik dat sy huwelik verby is en gee vir Naomi (Je-ani Swiegelaar) die spasie wat sy so graag wou hê. Maar in ’n verrassende wending is dit ’n geval van absence really does make the heart grow fonder. Ek wonder net of Louis bereid gaan wees om te luister, want Naomi kan regtig nie so met hierdie man se hart mors nie. As ek Louis was, sou ek ook seker teen dié tyd “time-out!” geskree het.
Maar Louis is nie die enigste een met ’n hart wat in verskeie rigtings getrek word nie. Delia (Odelle de Wet) vind die waarheid rondom Chiron se sinkende geskiedenis uit en dit tref haar harder as ’n muur wat van bakstene gemaak is. Vir ’n slim vrou maak Delia maar selde die regte besluit. Sy plaas altyd haar vertroue in die verkeerde mense se hande en ongelukkig vir haar is haar Ben Ten nie veel slimmer nie. Albei is blind vir Dawid (Deon Lotz) se manipulasie.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
Suidooster
Tim (Marco Spaumer) se plan het toe só goed gewerk dat Bridgette (Denise Newman) vir Zoë (Lauren Joseph) ’n helse klap voor almal in Oos-Wes gegee het. Zoë was so kwaad dat daar stoom uit haar ore geblaas het. As ek gedink het my antie het die masjiene van my oom, wat toe eintlik my pa was, afgeskakel, sou ek net so die moer in gewees het.
Noudat Tim die vroue van bed en tafel geskei het, is hy agter JPD en sy slice van die October-empire pie. Ons sal maar moet sien hoe ver hy kom, want Bridgette is op sy spoor!
Hopelik kom Bridgette verder as haar suster. Lee-Ann (Portia Joel) soek antwoorde in die regte plek, maar kan net nie kry waarna sy soek nie. Ty het sy spore goed uitgevee.
Intussen lyk dit asof Mymoena dalk koue voete kry.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up
