Redakteurskeuse vir Januarie 2025

Wat om te kyk vandeesmaand – hier is my redakteurskeuse vir Januarie 2025.

Neem asseblief kennis dat datums en titels moontlik kan verander.

The Day of the Jackal

Vanaf Maandag, 13 Januarie 2025 om 20:30, op Showmax beskikbaar om te stroom. 

The Day of the Jackal het reeds verlede jaar in Amerika en ander lande uitgesaai en so het dit dan op etlike “beste TV-reekse van 2024”-lyste beland. Veral Eddie Redmayne is vir sy meeslepende toneelspel uitgesonder met ’n konsensus onder talle resensente dat dié rillerreeks vir hulle aan die toprillers van ouds herinner.

Die Britse TV-verwerking van Frederick Forsyth se gelyknamige 1971-boek volg lank ná destydse filmpogings. Maar in televisieformaat is die storievertellers tien episodes gegun en kon hulle só dit in ’n hedendaagse konteks herverbeel. Die basiese premis is wel dieselfde – ’n kat-en-muis-speletjie soos ’n Britse intelligensiebeampte (Lashana Lynch)  jag maak op ’n sluipmoordenaar (Redmayne), slegs bekend as The Jackal. 

Die reeks is reeds vir ’n tweede seisoen hernu met Variety wat dit as ’n “asemnemende avontuur tot die laaste” bestempel. 

Die Byl S6

Weeklikse episodes vanaf Dinsdag, 14 Januarie 2025, om 20:00 op kykNET (DStv-kanaal 144 en DStv Stream). 

In dié seisoen van die Afrikaanse misdaaddrama Die Byl is daar ’n genadelose moordmasjien wat vasberade is om vir Byl en sy speurderspan hel op aarde te gee. 

Byl (Waldemar Schultz) lei steeds die eenheid wat op reeksmoordernaars jag maak. Hy word ondersteun deur die speurders Juan (Marvin Lee Beukes) en Lena (Lika Berning), die regskenner Nicki (Milan Murray), en Jo (Amalia Uys), ’n voormalige sluipmoordenaar wat nou as wapenkenner ingespan word. Kapt. William Miller (Tyrone Keogh) is ’n profileerder, en dr. Anton Fourie (Marcel van Heerden) is ’n patoloog.

Daar is ook ’n paar nuwe karakters in dié seisoen. Eliaan Slee (Melissa Willering) is klein en tengerig maar hiperintelligent. Dr. Elize Opperman (Roeline Daneel) is ’n ambisieuse wetenskaplike. En Daniël Weyers (Sherman Pharo) is ’n oud-polisieman en dr. Opperman se handlanger.

Ander karakters wat weer deel van die intrige is, sluit in Benjamin Vlok (Danny Ross), die webontwikkelaar Stephen (Sean van Noordwyk) en kapt. Tarina Spies (Ronel Stander). Van die bekende gesigte in die nuwe seisoen is Melanie du Bois, Hannes van Wyk, en Antoinette Louw.

Severance S2

Vanaf Vrydag, 17 Januarie 2025, op Apple TV+ beskikbaar om te stroom. 

Net minder as drie jaar sedert die briljante wetenskapfiksiereeks, Severance, sy debuut op Apple TV+ gemaak het, keer dié bekroonde en geloofde storie terug vir ’n tweede seisoen. In Severance se eerste seisoen, wat 17 Emmy-benoemings ontvang het, het ons ’n groep werknemers aan ’n korporasie ontmoet wat tot ’n eksperimentele “severance”-prosedure ingestem het. Mark Scout (Adam Scott) is een van dié werkers wie se sogenaamde “werk-geheue” chirurgies van sy herinneringe van sy persoonlike lewe geskei is. In die tweede seisoen vind Mark en sy vriende meer uit oor die gevolge van rondspeel met dié versperring.

Severance se ryk tematiese (en visuele) aanbieding gryp jou aan die strot soos dit veel meer vrae opper as wat dit antwoorde bied. As kyker word jy dikwels vasgevang in die grysareas van moraliteit en konsepte soos vrye wil wat die storie uitbeeld. As ’n geheel is die reeks ’n besonderse thought experiment, met fantastiese toneelspel deur onder andere Scott, John Turturro, en Patricia Arquette, en regie deur Ben Stiller en Aoife McArdle. 

American Primeval

Netflix se nuwe Western-reeks wys ’n woeste, wrede en wilde Amerikaanse Weste in 1857. ’n Heel ander aanslag as Yellowstone en sy spin-offs. Dié reeks, bestaande uit ses episodes, se regie is deur een van my gunsteling-skeppers, Peter Berg (Friday Night Lights), met die draaiboek deur die The Revenant se Mark L. Smit. Onder die rolverdeling tel Taylor Kitsch (Painkiller, True Detective, Friday Night Lights) en Betty Gilpin (GLOW, Gaslit, Mrs. Davis). 

Gilpin vertolk Sara, ’n ma wat saam met haar jong seun haar man probeer opspoor. Maar die tog is verraderlik en bloedbedrup – vrou-alleen gaan sy dit nie maak nie. Maar dan kruis hul paaie met Isaac (Kitsch) wat onderneem om hulle veilig te hou soos hulle die Wilde Weste deurkruis. 

Elders: Ligtoringroete

Weeklikse episodes vanaf Maandag, 6 Januarie 2025, om 20:00 op kykNET (DStv-kanaal 144 en DStv Stream).

Die stapper en skrywer Erns Grundling keer terug na die kassie met die sewende seisoen van sy Safta-bekroonde leefstylreeks Elders. In die nuwe seisoen, Elders: Ligtoringroete, stap Erns die nuwe Ligtoringroete tussen die ikoniese ligtorings van Mosselbaai en Kaap Agulhas. Die roete is sowat 340 km lank. Erns en die span van Bonanza Films het sowat ’n maand op die roete spandeer en geskiet.

Nog voorstelle: 

On Call, vanaf 9 Januarie 2025 op Prime Video. Dié grinterige polisiedrama speel met ’n mengsel van beeldmateriaal (waaronder van bodycams en dash-cams) om die harde alledaagsheid van polisiebeamptes se werk uit te beeld. Die storie volg die veteraanbeampte, Traci Harmon (Troian Bellisario, Pretty Little Liars), soos sy haar nuwe rookie partner, Alex Diaz (Brandon Larracuente, The Good Doctor), probeer touwys maak. Ook in die rolverdeling tel Lori Loughlin (Fuller House) en Eriq La Salle (Chicago PD). 

Don’t Die: The Man Who Wants to Live Forever, vanaf 1 Januarie 2025 op Netflix. Dié bondige dokumentêre film (dit strek oor 88 minute) vertel oor Bryan Johnson, ’n man wat oor die afgelope paar jaar telkens die nuusblaaie gehaal het met sy pogings om – soos die titel lui – die dood te omseil. Of minstens die natuurlike gang van sake (ouer word) wesenlik te vertraag. Buiten ’n blik op die dikwels vreemde, soms absurde, praktyke en gebruike wat Johnson toepas om ewig jonk te bly, bied die filmmaker Chris Smith (Fyre, 100 Foot Wave) ook meer insig tot die impak van hoe Johnson se lewensmissie diegene rondom hom affekteer. 

The Night Agent S2, vanaf 23 Januarie 2025, op Netflix. Dié aksiereeks is gegrond op die boek deur Matthew Quirk. In die eerste seisoen het ons die jong FBI-agent Peter Sutherland ontmoet. Saam het ons naels gekou toe hy sy eie bas moes red toe hy by ’n regeringskomplot betrek is. Die tweede seisoen sien hoe Peter, nou ’n volwaardige lid van die geheime Night Action-taakspan, vir selfs meer vuiste – en koeëls – moet koes. 

Die Ondernemers, weeklikse episodes vanaf 7 Januarie om 21:30 op kykNET (DStv-kanaal 144 en DStv Stream). Dié Showmax-reeks word nou ook op kykNET uitgesaai. Die reeks volg drie begrafnisondernemers: Candice Austin, eienaar van Goodall & Bourne Funeral Undertakers, Jano van der Berg van Van der Berg Funeral Services en die voormalige Stormers-rugbyspeler Ramone Samuels, hoof van SamWill Funeral Services, wat hy saam met sy broer, die Springbok-rugbyspeler Damian Willemse, besit.