Drie vervreemde broers vind die kronkelpad terug na hul ouerplaas in die dorre Noord-Kaap, Nêrens, waar hulle die geheime, hartseer en waarheid oor hul ma se dood moet aanspreek om uiteindelik heling te vind.
Die storie is gegrond op die gelyknamige verhoogstuk deur Nico Scheepers wat in 2017 sy debuut gemaak het. Dit is sedertdien wyd geloof en Scheepers se omskepping van sy hartroerende verhaal na ’n TV-reeks is iets meesterlik. (Lees Riëtte van der Wat se onderhoud met Scheepers hier.)
Die hoofkarakters word deur dieselfde rolverdeling as in die teaterstuk vertolk met De Klerk Oelofse, Albert Pretorius en Geon Nel as die drie broers Andries, Ronnie en Frans.
Elkeen slaan hul eie koers in ná Ronnie se troue. Frans bly op die plaas agter, Andries reis oor die wêreld heen, en Ronnie is in die Kaap met ‘n kind en ‘n verbrokkelde huwelik.
Dis ’n sameloop van tragiese omstandighede wat hulle aanvanklik uitmekaar dryf.
Dis egter dieselfde tragiese omstandighede wat hulle weer bymekaarbring as hulle genoodsaak word om die wonde uit hul kinderjare aan te spreek in hul soeke na verlossing.
Frank Opperman is te sien as die broers se pa, Lourens Adendorff, en Tinarie van Wyk Loots as hul oorlede ma, Katja.
Die reeks is reeds vir ‘n tweede seisoen hernu.
Op Showmax vanaf 21 Februarie.
