“Die eerste dag op stel het ons geweet ons het die regte keuse gemaak,” het die skrywer en regisseur van ‘Nêrens, Noord-Kaap’, Nico Scheepers, in ’n onlangse onderhoud oor die jong akteur, Arnold Swart, vertel.
Volgens Nico was die rol van klein Lourens die moeilikste om te cast omdat hy ewe veel dialoog en tonele as die volwasse akteurs het. “Ons het verskriklik baie oudisies gekyk, maar daar was net iets aan Arnold. Dis moeilik om vas te vang hoekom hy ’n mens so vasgryp, maar daar is ’n rou eerlikheid aan hom. Toe ek na sy video gekyk het, het my gut wawiele en bokspringe gemaak. ’n Mens luister nie na mense om jou nie, vertrou net jou gut.”
En met Deel II was daar nog moeiliker werk vir jonge Arnold om te doen.
“Dis nie vir my nodig om sy lof te sing nie. Alles is op die skerm. Ek dink mense vergeet dat hy 13, 14 jaar oud is. Hy werk geweldig hard en ken altyd sy woorde. In al die tyd wat ek saam met hom gewerk het, het ek hom dalk nog net een keer met papiere in sy hand sien staan. En hy luister en dis hoekom hy goeie akteur is.”
Arnold vertel vir terloops meer oor sy sonderlinge Nêrens, Noord-Kaap-ervaring.
As jy terugdink aan die oomblik wat jy die rol van klein Lourens gekry, wat onthou jy?
“Wel, ek was maar net 11 jaar oud, so my kop het dadelik gegaan na, ‘Ek gaan op TV wees!’.”
Klein Lourens gaan deur geweldig baie in Deel II. Hoe het jy vir dié mallemeule voorberei?
“Ek het gehoor om die draaiboek ’n paar keer deur te lees, is nie ’n slegte idee is nie. So dis presies wat ek gedoen het. Ek het seker gemaak ek weet waar Lourens sy highs en lows oor die loop van die 13 episodes tref. Ek was in daardie stadium besig met my laaste graad 8-eksamen – ek word tuis onderrig – so om die draaiboek te lees, was natuurlik baie beter as om vir wiskunde te leer.”
Wat is die grootste les wat jy geleer het?
“Daar’s so baie goed wat ek geleer het! Ek het maar net weer eens besef dat hierdie is wat ek vir ’n lewe wil doen. Enigiets te doen met stories.”
Wat bly jou by as ’n hoogtepunt met die maak van Deel II?
“Om almal van Deel I weer te kon sien. Om as een groot familie weer te kon saam wees. Dit was ook baie lekker om saam met die nuwe spelers in Deel II te kon speel.”
Wat het jy by die ander spelers geleer?
“Ek het orals iets gesteel, maar veral ongelooflik baie by Albert Pretorius en Daneel van der Walt geleer.
“By Albert het ek geleer hoe belangrik dit is om jou karakter goed te ken. Hy is letterlik die koning van improvisasie en hou jou altyd op jou tone.
“By Tannie Daneel het ek geleer hoe om te luister. Hoe om te jou mede-akteur in die oë te kyk en net in die oomblik te wees en te reageer op wat hulle sê en doen. Albei van hulle is ongelooflik en ek is baie dankbaar dat ek weer saam hulle kon speel.”
Wat is die belangrikste dinge wat jy by die skrywer en regisseur Nico Scheepers geleer het?
“Hoe om die waarheid te praat. Ek het by hom geleer hoe om nie te act nie, maar om met eerlikheid en rou emosie Lourens se storie te vertel. Hoe om my karakter se situasie en gevoelens vir myself werklik te maak en net ’n natuurlike reaksie daarop voor die kamera te gee.
“Ek kan nie beskryf hoe baie ek by Nico geleer het nie. Hy is nie net ’n ongelooflike skrywer en regisseur nie, maar ook ’n amazing mens na wie ek baie opkyk. Ek sal vir altyd dankbaar wees vir die geleentheid wat hy en Nagvlug Films my gegee het om Lourens te kon vertolk.”
Droom jy daarvan om eendag toneelspel jou loopbaan te maak?
“Definitief! Die gogga het my gebyt. Ek wil ook graag eendag ’n skrywer word.”
Herken mense jou? Wat is hulle reaksie?
“Nogals! Dis altyd lekker om te hoor as iemand van die storie hou. Die meeste mense se reaksie is gewoonlik, ‘Kyk hoe groot het jy geword!’.”
Nêrens, Noord-Kaap Deel II saai op Dinsdae om 20:00 op kykNET (DStv-kanaal 144) en DStv Stream uit. Nuwe episodes is ook ná uitsending op Catch Up beskikbaar. Die volledige eerste reeks van dertien episodes van Nêrens, Noord-Kaap is tans beskikbaar op Showmax.
