’n Lokprent vir Troukoors, die eerste Showmax Original-romcom, is pas vrygestel in afwagting van die reeks se premiere op 13 Desember, wanneer al 14 episodes beskikbaar sal wees vir ’n sexy binge-sessie soos min.
Troukoors is deur die kreatiewe duo Louis Pretorius en Albert Snyman van Infinity Films geskep, met Nina Swart wat die regie behartig. Onder Louis en Albert se gewildste reekse tel Die Boekklub en Fynskrif.
Daar is ’n mengsel van nuwe en bekende gesigte, met Ilse-Lee van Niekerk (Getroud met rugby) in die hoofrol. Sy vertolk Jessica, ’n troubeplanner op soek na ’n perfekte onperfekte pasmaat (á la J.Lo in The Wedding Planner).
Die voormalige kinderster Blyde Smit (Erfsondes, 7de Laan) speel Jessica se suster Luca, ’n sagteware-ontwikkelaar wat meer vlot is in die Star Trek-taal, Klingon, as flirt, met Bianca Flanders (Nêrens, Noord-Kaap) as Jessica se biseksuele beste vriendin Abi, ’n professionele bakker. SAFTA-wenner Kevin Smith (Skemerdans) is Abi se pa (en Luca se baas), met Melt Sieberhagen (Proesstraat) as sy kêrel.
Die lokprent gee ons ook ons eerste blik op die drie besties se lovers hierdie seisoen, insluitend Armand Aucamp (Tom in Die Boekklub), Christiaan Schoombie (Warrior), Evan Hengst (Miles in The Kissing Booth 1-3), Danny Ross (Nommer 37), en Emma van Heyn.
“Wat ek regtig interessant vind, is dat dit alternatiewe tipes verhoudings uitbeeld,” sê Bianca. “Die wêreld beweeg in nuwe rigtings, veral in terme van hoe ons oor seks en seksualiteit dink en praat. Seks-positiwiteit neem toe. As Suid-Afrikaners is ons dikwels geneig om konserwatief te wees as dit kom by die tipe verhoudings wat ons op TV uitbeeld. Maar Troukoors weerspieël baie van die verhoudings wat ek om my sien. Dit wys die real kwessies wat mense binne hul verhoudings ervaar.”
“Die oorkoepelende idee van die reeks is love is love,” sê Ilse-Lee. “Ek hou veral van die feit dat met die twee pappas, en Abi ook, word dit net aanvaar. Dis net die norm. Dis nie nog ’n storie of ’n issue of ’n ding nie. Dit gaan oor wat vir jou werk: watter tipe liefde is die beste vir jou, en hoe kan jy die beste vir iemand anders wees.”
Maar Troukoors is nie net nog ’n Hollywood-sprokie, waar elke oomblik perfekte sonsondergange het met vuurwerke in die agtergrond, nie. “Wat verfrissend van hierdie reeks is, is dat Louis en Albert realistiese stories geskep het wat ook wys dat daar geen mens is wat heeltemal perfek vir jou gaan wees nie,” sê Armand. “Daar gaan iemand in jou lewe kom wat jou seksueel bevredig, maar dalk nie emosioneel nie. En dan kom iemand wat jou emosioneel vervul en dan werk die fisieke aantrekking nie. Of iemand is té rustig en jy wil meer intensiteit hê. Jy wil rigting hê, iemand wat nie beige is nie. Jy weet, daardie soort van ding.”
In ooreenstemming met ’n groeiende internasionale tendens , het Troukoors ’n intimiteitskoördineerder vir die intieme tonele aangestel. “Daar is baie meer fisieke tonele as in die gemiddelde Suid-Afrikaanse en Afrikaanse TV-reekse,” sê Albert. “Ons het met intimiteitskoördineerders gewerk, wat ons nog nooit voorheen gedoen het nie, en dit was nogal baie nice gewees. Hulle het ’n goeie manier om met die akteurs te werk om almal gemaklik en veilig te laat voel. As iemand in ’n Suid-Afrikaanse TV-reeks soen, is dit dikwels daai Egoli-soene van die laat 80s waar dit soos twee visse is met monde wat oopmaak, vasplak aan mekaar, en dan staan hulle net stil. So, om ’n intimiteitskoördineerder te hê, het baie gehelp met akteurs wat mekaar op ’n fisieke vlak moes vind en mekaar moet vertrou, sodat jy actual passie op die skerm kan hê.”
Troukoors bied ’n verfrissende blik op nie net liefde, VR-seks en deepfake pornografie nie, maar ook familie. “Wat die hele reeks so mooi maak, is hoe familie op ’n baie onkonvensionele manier voorgestel word,” sê Blyde. “Dit is so ’n eerlike voorstelling van moderne gesinne, insluitend egskeiding en dood en om te ondersoek hoe mense wat nie bloedverwant is nie, familie word.”
Dit is nie te sê Troukoors is swaar nie. “As jy wil lag, en net met ’n glimlag op jou bakkies sit vir ’n halfuur, dan is hierdie ding vir jou,” sê Christiaan. “Daar is ernstige temas wat ontleed word, maar daar’s altyd humor wat dit uitbalanseer. It’s just pure fun.”
