Dis nie maklik om te kyk nie, maar die kykNET-reeks Afgrond, wat nou op Showmax beskikbaar is, is belangrike kykstof.
Afgrond is op ons lys van die top-vier Afrikaanse reekse op Showmax. Ons ander drie gunstelinge is Dwaalster, Waterfront en Fynskrif.
Magsmisbruik in intieme verhoudings en in die werkplek; manlike chauvinisme; narsisme; manipulasie; affairs en die duur prys wat mense betaal wanneer hulle uit vrees besluit om stil te bly, is ʼn paar van die komplekse en ontstellende temas wat in dié drama ondersoek word.
Volgens die reeks se skeppers, ondersoek Afgrond die vraag oor hoe naby ons aan die rand van die afgrond moet staan voordat ons besluit om verantwoordelikheid vir ons eie besluite te neem.
Vyf vroue – elk op ʼn afgrond van hul eie
Vyf vroue uit uiteenlopende agtergronde se stories raak (met slim skryfwerk) verweef.
Daar is die sielkundige Julia Cilliers (briljant vertolk deur Jana Kruger), wat met die dood van haar kind moet probeer saamleef terwyl sy vasgekeer is in ʼn ongelukkige huwelik met die hoof van ʼn prokureursfirma, Basson Brink (skrikwekkend kil vertolk deur Stian Bam). Dan is daar Lana Bridgett (Kim), ʼn sepiester wat uit ʼn vyf-jaar-lange koma ontwaak met geheueverlies. Ook Leora van Niekerk (Kanya Viljoen) en Nadine May (Gretchen Ramsden), ʼn kandidaatprokureur wat moet kies tussen haar loopbaan en die liefde.
Die aktrise en fotograaf Marguerite van Eeden vertolk die rol van die brose, maar verbasend sterk Hannelie Fourie. Haar verlede is vol seerkry en haar hede lyk nie veel anders nie. Sy gaan soek hulp by Julia omdat sy seksueel mishandel word by die werk. Dit dwing haar om bevrydende besluite te neem.
Marguerite, wat tans besig is met haar PhD-studie aan die dramadepartement by die Universiteit Stellenbosch, sê vroue en mans ervaar baie druk.
“Aan die einde van die dag kan jy kies hoe jy goed hanteer en wanneer jy aanbeweeg en vorentoe wil beweeg na verandering toe,” sê sy.
Marguerite gesels hier oor die reeks en haar rol.
Waarom kykers Afgrond op Showmax moet kyk
Ek sou mense aanraai om dit te kyk omdat dit gaan oor vyf vroue wat almal op húl (eie) afgronde staan waardeur hulle moet werk. Baie vroue sal kan vereenselwig met die dinge wat met die vroue in die reeks gebeur.
Oor wat haar aangetrek het tot haar karakter, Hannelie
“Hanelie was ’n ongelooflike lekker karakter. Ek is baie dankbaar dat Corné van Rooyen, die regisseur, dit vir my moontlik gemaak het. Dit was vir ons ’n baie veilige omgewing om in te werk.
Ek is baie bevoorreg, want ek speel net die rol. Soms ‘hum’ en ‘ha’ akteurs oor hoe moeilik dit is om ʼn karakter te vertolk en ek verstaan dit kán moeilik wees. Maar anders as Hannelie, was die nie vir my nodig om deur enige van daai emosionele trauma te gaan waardeur baie vroue gaan nie.
Dit sou vir my selfsugtig wees om dit oor myself te maak om te sê die rol was moeilik – want inherent was ek net daar om ’n storie te vertel, sodat mense kan sien wat in die werklikheid met soveel vroue gebeur.
Oor die regisseur en haar mede-akteurs
“Ek is mál oor Corné van Rooyen sy vrou René; hulle is so ’n ongelooflike span.
Corné is ’n totale akteurs-regisseur – hy maak alles moontlik en lekker en fun. Ek het met my eerste fliek, Vaselientjie, met hom gewerk en is van toe af mal oor hom! Hy is wonderlik, besonders en so begaafd met wat hy doen.
Dit was ook fantasties om saam met Jana Kruger en Stian Bam te werk. Ek is nog altyd ’n groot aanhanger van hulle albei. Om hulle dan te leer ken en te sien watter besondere mense hulle is van binne en buite, was absoluut ongelooflik.
Die crew wat op die reeks gewerk het, was ook absoluut wonderlike mense. Ons het Afgrond in Covid-tyd geskiet toe ons al kon werk, maar maskers op stel moes dra en almal het mekaar opgepas.
Oor waarom dit nodig is om ontstellende stories oor geweld teenoor vroue op televisie te vertel
“Geslagsgeweld is ʼn reuse-ding in ons land – iets wat algemeen gebeur. Dis goed dat vroue van enige kultuur- en taalgroep kan sien dat ander mense deur dieselfde goed gaan. Die reeks wys jou deur watter moeilike goed vroue gaan en omdat die wet nie vroue beskerm nie, is hulle bang om vir hulself op te staan. Ek was so kwaad oor Jaco Swart wat sy vrou slaan en net ʼn R20 000 boete gekry het daarvoor. Hy moes tronk toe gegaan het!”
