Schalk Bezuidenhout is veral bekend as ’n stand-up-komediant, maar hy het stilletjies aan ’n ewe indrukwekkende loopbaan as akteur gebou. Hy het reeds vier Safta-benoemings vir toneelspel ontvang – vir onder meer sy vertolking van Johan Niemand in die speelfilm Kanarie, Attie in die komediereeks Taktiek en Danny in die mokumentêre komedie Hotel. Laasgenoemde het vir hom die Safta vir beste manlike byspeler in ’n TV-komedie gewen.
Sy nuutste uittog op die skerm is as ene Tjaart in Die Kantoor, die Afrikaanse verwerking van The Office.
Die storie
In Die Kantoor speel Schalk teenoor onder andere die 2025 Fleur du Cap- en Woordtrofee-wenner Albert Pretorius (Niggies; Nêrens, Noord-Kaap) as Flip, die kantoorbestuurder by die polonie-spesialiste Deluxe Processed Meats.
Flip, ’n groot aanhanger van Rassie Erasmus en Leon Schuster, verwelkom ’n dokumentêre span om sy opgang in die sakewêreld vas te lê – en ook só sy Schuster-agtige poetse. Tjaart is Flip se regterhand met sy blou sonbrille soos ’n ekstra ledemaat, en sy selfoon – waterdigte houer inkluis – aan sy belt vasgegordel. Die jeans sit hoog en sy belt sit hoër. Weg ook is die krullebos wat hom so herkenbaar maak. En met goeie rede, sê Schalk.
“Hy is amper die teenoorgestelde van Danny van Hotel, wat naïef en oulik was,” sê Schalk. “Tjaart is geskei met ’n kind. Hy kettingrook, en hy sit nooit stil nie. Hy is lekker kômmin. Ek het staatgemaak op my Kempton Park-wortels en van die mense waarmee ek daar grootgeword het om die karakter in te kleur. Ek het baie Tjaarts geken.”
Spanwerk
Schalk was medeskrywer van sewe van Die Kantoor se episodes. Die hoofskrywer en regisseur van die reeks is die veelbekroonde Bennie Fourie, met wie hy op Hotel gewerk het en goeie vriende is.
“Wanneer ek bloot ’n akteur in ’n reeks is, kom ek gewoonlik net aan die einde in om te help om van die grappe ’n bietjie sterker te maak. Dit was die eerste keer dat ek van die begin af saam met Bennie geskryf het,” sê Schalk oor hoe dié ervaring anders was.
“Hy het die harde werk gedoen. Ek was meer die ou wat idees rondgegooi het oor ’n glasie wyn en grappe gemaak het terwyl hy die storie en struktuur uitgesorteer het. So ons was ’n goeie span.”
In November 2024 het Schalk en Bennie in ’n gastehuis in Bellville gesit en gewonder wie en hoe die karakters gaan wees. “Ons het baie vryheid gehad,” vertel Schalk. “Ons kon die baas ’n swart man gemaak het. Of ’n vrou. Maar Albert Pretorius is so ’n goeie akteur dat ons hom eenvoudig die rol moes gee. Anders sou ons dalk meer oorspronklik kon wees.”
Ook in die rolverdeling is akteurs soos Carl Beukes, Daniah de Villiers, Gert du Plessis, Ilse Oppelt, Lida Botha, Mehboob Bawa en Sipumziwe Lucwaba. En dié is almal aangemoedig om te improviseer. “Bennie is mal oor improvisasie, so baie van die beste oomblikke het uit daardie spontaniteit gekom,” sê Schalk.
Hoë verwagtinge
Schalk erken om so ’n ikoniese reeks aan te pas het hulle laat sweet. “Mense het baie hoë verwagtinge. Ek is ’n puris. So, ek wys altyd daarop dat die Britse weergawe die oorspronklike is, maar Suid-Afrikaners ken die Amerikaanse weergawe beter, en Michael Scott is so geliefd as die baas. Ons wou regtig iets maak in dieselfde klas as die Amerikaanse en Britse weergawes – ’n reeks met net so ’n groot cringe-faktor en wat net so goed en snaaks is.”
Schalk sê hul grootste uitdaging was om aan die aanhangers van The Office se hoë verwagtinge te voldoen. “Dit was ’n fyn lyn: om naby genoeg aan die oorspronklike te bly sodat dit steeds soos The Office voel, maar anders genoeg dat dit ook soos ’n inheemse reeks voel. Al is dit deel van ’n franchise, wou ons dit ’n oorspronklike reeks maak, vol van ons mense en iets wat net in Suid-Afrika kon afspeel.”
‘Humor wat grense toets’
Schalk meen baie van die grappe op die reeks is gewaagd. “Ek is ’n groot aanhanger van humor wat die grense toets,” sê hy. “Die sleutel is om die gehoor te laat lag oor hierdie karakters se onkunde, eerder as saam met hulle oor ’n bedenklike grap of aanmerking. So, baie van die komedie kom uit die reaksies van die res van die rolverdeling op die dinge wat Flip en Tjaart kwytraak en aanvang.”
Wanneer hulle nie deel van ’n toneel was nie, moes die rolverdeling steeds by hul lessenaars bly, amper soos agtergrond-ekstras, om die gevoel van ’n 9-tot-5-kantoor te behou. “Ek het so baie Solitaire op my foon gespeel dat Bennie my uiteindelik moes dwing om dit te verwyder, want dit het soveel van my aandag geëis,” vertel hy verder.
Veranderende TV-wêreld
Kykers is deesdae meer gewoond aan die mokumentêr-genre, maar Schalk onthou nog die begindae van Hotel toe kykers nie geweet het wat om van dié reeks te maak nie. (Buiten Hotel is die briljante Magda Louw nog ’n goeie plaaslike voorbeeld. Internasionaal is die genre versterk deur reekse soos Parks and Recreation, Arrested Development, Modern Family en Abbott Elementary).
“Mense was baie verward. Ek was so trots op die reeks (Hotel), maar ek het nie gedink ons gaan ’n tweede seisoen kry nie omdat die reaksies op kykNET se Facebook-blad so oorweldigend negatief was. Ek onthou een spesifieke kommentaar wat gekla het dat die kamerawerk van die reeks onprofessioneel was omdat die beeld gedurig geskud het. Die kamera was op ’n driepoot en die fotografie-regisseur het die kamera doelbewus laat beweeg sodat dit kan lyk soos ’n dokumentêr wat rukkerig met ’n handkamera geskiet is.
“Dit was frustrerend, en ek het gedink: ‘Julle kyk almal na Modern Family. En hier is ’n reeks wat dieselfde doen met rukkerige kamera-onderhoude, en skielik verstaan kykers nie, net omdat dit in Afrikaans is.’
“Maar weet jy wat? Almal het baie te sê gehad oor Hotel aan die begin van die reeks. In seisoen 2 het dit momentum gekry en teen seisoen 5 was al daardie mense getroue kykers omdat hulle deur die innemende sjarme van die reeks oorrompel is. Teen die vyfde seisoen het ek geen negatiewe kommentaar meer gesien nie. Mense het soos die karakters aangetrek vir partytjies en Halloween. Die reeks het ’n kulturele fenomeen geword.
“Ons kry nou nog mense wat vir ons sê hulle was verveeld in Desember en het toe al vyf seisoene weer gekyk,” voeg hy by.
Grappe vir genesing
Schalk berei tans voor vir ’n toer in Australasië en Europa in Februarie met sy jongste stand-up-vertoning, Hey Hey Divorcé. Dié materiaal is deur sy egskeiding in 2024 geïnspireer. “Dit was regtig terapeuties,” sê hy oor die skryf van dié vertoning.
Nuwe episodes van Die Kantoor is weekliks op kykNET (DStv-kanaal 144) en Showmax beskikbaar –Sondae om 20:00 op kykNET en Dinsdae op Showmax.
