Die brug is die eerste Suid-Afrikaanse weergawe van dié internasionale formaatreeks – boonop in Afrikaans. En nie net plaaslike kykers is deur die asemrowende natuurtonele, die vindingryke en kreatiewe kamerawerk, die klankbaan en kunsregie, asook die storie se vele kinkels en kabels beïndruk nie. Die beoordelaars van die Internasionale Emmy-toekennings was duidelik ewe meegesleur en só is Die brug in die kategorie vir beste vermaak sonder ’n draaiboek (non-scripted entertainment) benoem. Die benoemings is in New York bekend gemaak.
“Toe Marguerite Albrecht, een van die opdraggewende vervaardigers by kykNET, in Mei 2022 voorgestel het kykNET pas die internasionale formaat The Bridge vir ons kykers aan, het ons geweet hier kom ’n ding,” sê Waldimar Pelser, M-Net-direkteur van Premium-kanale.
“Die eindproduk, vervaardig deur die produksiemaatskappy Red Pepper, het ons kykers buitensporig baie plesier verskaf. Om boonop op internasionale vlak erkenning te kry vir ’n Afrikaanse produksie wat naby die beeldskone Swellendam in die Suid-Kaap verfilm is, voel geweldig goed.”
Die brug, wat deur Frederick Louw en Lindi Lucouw van Red Pepper vervaardig is, se eerste seisoen is tans op Showmax te sien. Verfilming van die tweede seisoen begin eersdaags. Dit sal na verwagting volgende jaar op kykNET uitgesaai word.
Die wenner van Die brug se eerste seisoen was die oud-rugbyspeler van Pretoria, Robert Kruger.
Die Internasionale Emmy-toekenningsgeleentheid is op 25 November in New York. Daar is 14 kategorieë en 56 benoemdes uit 21 lande wat vir dié gesogte toekennings meeding. Die ander benoemdes in die katergorie waarvoor Die brug benoem is, is Anything Goes (Mexico), Restaurant Misverstand (België) en The Summit (Australië).
Kyk Die brug S1 nou op Showmax.
