Iewers op ’n eiland met ’n toring staan nog ’n skatkis met R1 miljoen kontant daarin. Die enigste manier om daarby uit te kom is om ’n brug te bou – en jou medebouers te oortuig om vir jou oor die brug te laat loop om die prysgeld op te eis. kykNET se epiese realiteitsreeks, Die brug, is terug vir ’n groter, selfs meer gewaagde tweede seisoen, en die inskrywings is tot 31 Augustus oop by kykNET.tv.
Hoe werk dit?
Die brug los ’n groep vreemdelinge in ’n afgeleë wildernis met een eenvoudige taak: bou ’n brug van die oewer na ’n eiland waar die prys van R1 miljoen wag. En dít binne minder as 20 dae. Die spel gaan nie net oor die uitdaging om die brug te bou nie – dit gaan ook oor die toets van die spelers se sosiale vaardighede, morele, fisieke en geestelike krag en uithouvermoë. Hoe gaan hulle die klowe in hul eie lewens oorbrug en hul eie vooroordele bestuur om saam te werk vir sukses? Wie sal die eerste wees om hul pad oor die brug na die prys te onderhandel? En sal hulle by die beloftes hou wat hulle gemaak het om daar uit te kom?
Kykers wat die boeiende eerste seisoen gevolg het, mag dink hulle het nou alles uitgepluis. Die doelpale word egter verskuif in die tweede seisoen. Die spelers moet saamwerk om onstuimige waters oor te steek. Daar wag dus baie onverwagse kinkels, en selfs meer verrassings en versoekings as in die eerste seisoen.
Gewild onder kykers
“Die brug is ’n wêreldwye fenomeen en was een van die gewildste realiteitsprogramme op kykNET verlede jaar. Ons is dus opgewonde om ons kykers op ’n tweede seisoen te trakteer,” sê Waldimar Pelser, kanaaldirekteur van Premium-kanale by die MultiChoice-groep.
“Die program het vinnig ’n fanatiese gevolg gekry. Ons het hard gewerk om seker te maak dat daardie getroue aanhangers beloon word – en dat die spelers in die tweede seisoen op hul tone bly.”
Avril Albetti, een van die eerste seisoen se spelers, is ook as Persoonlikheid van die Jaar by vanjaar se Silwerskermtoekennings vir Film en TV benoem.
Die reeks word deur Red Pepper Pictures vervaardig en sal vroeg in 2025 op kykNET uitgesaai word.
