Voor Herman Lensing en Yolani Abrahams Suid-Afrika se volgende bobaashuiskokke in Kokkedoor: Son & see op Donderdag 20 November begin soek, kan kykers eers begin wonder – of dalk droom – oor die nuwe boere van die volgende seisoen van Boer soek ’n vrou.
Ja, ná talle kinkels en mooi liefdesverhale wat die pas afgelope seisoen van Boer soek ’n vrou opgelewer het, maak Kupido gereed om die eerste pyle in die 18de seisoen van dié maatsoekreeks af te vuur.
Kykers sal die tien boere om 20:00 op Donderdag 13 November op kykNET ontmoet, waarna hul profiele hier op Terloops gedeel sal word.
Die boere se ouderdomme wissel van 26 tot 43, en hulle verteenwoordig ses provinsies, met die Vrystaat wat die voortou met vier enkellopendes neem, terwyl Noordwes deur ’n vroueboer verteenwoordig word.
Die nuwe seisoen van Boer soek ’n vrou sal van Augustus 2026 op kykNET uitgesaai word. Kykers sal dan weer die boere se liefdesreise kan volg. Die reeks sal, soos altyd, fokus op die vyf boere wat die meeste briewe ontvang het.
Die boere vir die 18de seisoen is:
Arno (28) van Tzaneen, Limpopo
- Bosbouboer
- Vroulike pasmaat
David (43) van Vierfontein, Vrystaat
- Gemengde boerdery
- Vroulike pasmaat
Francois (34) van Hoedspruit, Mpumalanga
- Natuurbewaarder
- Vroulike pasmaat
Jack (30) van Hermanus, Wes-Kaap
- Appel- en peerboer
- Vroulike pasmaat
Jacques (32) van Nelspruit, Mpumalanga
- Makadamianeutboer
- Vroulike pasmaat
JD (28) van Reitz, Vrystaat
- Gemengde boerdery
- Vroulike pasmaat
Junior (35) van Bethlehem, Vrystaat
- Gemengde boerdery
- Vroulike pasmaat
Leandi (36) van Ventersdorp, Noordwes
- Beesboer
- Manlike pasmaat
Luan (26) van Strydenburg, Noord-Kaap
- Skaapboer
- Vroulike pasmaat
Willie (37) van Harrismith, Vrystaat
- Bees- en mielieboer
- Vroulike pasmaat
Wil jy vir ’n boer skryf?
Diegene wat vir een van die hubare boere ’n brief wil skryf moet ouer as 21 wees en ongetroud, geskei of ’n weduwee/wewenaar wees. Inskrywings moet voor middernag op 4 Desember 2025 ingedien word.
Soos voorheen sal voornemende pasmaats vir die boere briewe kan skryf of hul belangstelling in die boere op die gewilde Afrikaanse maatsoek-app KOER kan wys.
Persone wat die boere beter wil leer ken, kan dit op een van die volgende maniere doen:
- Besoek www.kyknet.tv
- Bel die vervaardigers, Wolflight, by 079 614 2229
- Stuur ’n e-pos na boer@wolflightsa.com
- Besigtig die boere se profiele op die Afrikaanse maatsoek-app, KOER
- Voornemende pasmaats sal ook briewe of pakkies per koerier vir die boere kan stuur na een van dié twee adresse: Boer soek ’n vrou, Postnet 211, Privaatsak X15, Somerset-Wes 7129 OF
Boer soek ’n vrou, Coronation-laan 11, Somerset-Wes 7130.
Digitale inskrywings, wat ook deur ’n video vergesel kan word, is welkom.
Die 17de seisoen van Boer soek ’n vrou is vir nog ’n wyle op DStv Catch Up beskikbaar. Kyk ook die vorige seisoene op Showmax.
